អាពាហ៍ពិពាហ៍នយោបាយ និងសោកនាដកម្ម​ជា​បន្តបន្ទាប់​ក្នុង​ជីវិតរបស់​នារី​ម្នាក់

នៅសម័យសង្រ្គាមរដ្ឋជាតំណាក់កាលប្រយុទ្ធគ្នាដណ្តើមអំណាចរវាងពួកសាមូរ៉ៃ។ នៅសម័យនោះសាមូរ៉ៃវ័យក្មេងតិចណាស់ដែលមានសេរីភាពជ្រើសរើសគូរស្រករ។ ហើយថែមទាំងមានរឿងក្មេងស្រីអាយុ ៧ ឆ្នាំត្រូវបង្ខំឲ្យរៀបការ ក្រោយ​​មក​ជីវិត​របស់នាងអភ័ព្វណាស់។

កាន់តែឈឺចាប់ជាងនេះ ជីវិតរបស់នាងធ្លាក់ក្នុងដៃរបស់បុរសជាសាច់ញាតិ។

អំឡុងសម័យសង្រ្គាមរដ្ឋ សេ្តចក្រាញ់តំបន់ៗប្រយុទ្ធគ្នាទៅវិញទៅមក។ ព្រះចៅអធិរាជជាអ្នកដែលមានសិទ្ធិអំណាចបង្រួបបង្រួមប្រទេសជប៉ុន ប៉ុន្តែក្រោមការបង្រួបបង្រួមនោះកើតមានសង្រ្គាមប្រកួតប្រជែងដណ្តើមទឹកដី និងអំណាច។

ដើម្បីឲ្យ​កាន់តែងាយស្រួលយល់ សាកស្រមៃមើលអ្នកជាប្រមុខទឹកដីតូចមួយ។ មានប្រទេសមួយមានអំណាចខ្លាំងជាងគេ ហៅ​ថា​ប្រទេស ក នៅក្បែរអ្នក ហើយមានបំណងលើទឹកដីរបស់អ្នក។ ក្រៅពីនេះ ប្រទេស ខ ក៏នៅ​ក្បែរ​នោះ ហើយមានកម្លាំងយោធាប្រហាក់ប្រហែលប្រទេស ក ។

តើអ្នកនឹងធ្វើអ្វីក្នុងស្ថានភាពនេះ?

ប្រសិនបើអ្នកមិនធ្វើអ្វីសោះ ទឹកដីរបស់អ្នកនឹងត្រូវប្រទេស ក ឈ្លានពាន កាន់កាប់។ ប៉ុន្តែប្រសិនបើអ្នកបង្កើតទំនាក់ទំនងជាមួយប្រទេ ខ ដើម្បីទទួលបានការការពារ ឬឈ្លានពានប្រទេស ក នោះទឹកដីរបស់អ្នកនឹងទទួលបាន​ការ​ពារ។

តើធ្វើយ៉ាងណាបង្កើតទំនាក់ទំនងជាមួយប្រទេស ខ? យុទ្ធសាស្ត្រដែលគេប្រើក្នុងសម័យនោះគឺអាពាហ៍ពិពាហ៍នយោ​បាយ។

គេតែងតែនិយាយថា រៀបការជារឿងសំខាន់ក្នុងជីវិត ប៉ុន្តែចំពោះជនជាតិជប៉ុនអាពាហ៍ពិពាហ៍សង្កត់ធ្ងន់លើគ្រួសារ​ជា​ជាង​បុគ្គល។ ហេតុ​នេះរឿង​កូន​រៀបការ​ត្រូវ​សម្រេច​ដោយ​មនុស្ស​ធំ។

ក្នុងករណីខាងលើ អ្នកត្រូវលើកកូនស្រីរបស់ខ្លួនទៅឲ្យកូនប្រុសរបស់អ្នកគ្រប់គ្រងប្រទេស ខ ។ ចំណុចនេះនឹង​ពង្រឹង​ទំនាក់​ទំនងរបស់ភាគីទាំងសង​ខាង​រយៈ​ពេលយូរអង្វែង។

ទាំងនេះក៏មានន័យថា កូន​ស្រី​របស់​អ្នក​កំពុងទទួលបន្ទុកទំនាក់ទំនង និងវាសនា​ប្រទេសជាតិ។ តម្លៃដែលត្រូវលះ​បង់​គឺ​ជីវិត​របស់​នាង ប្រសិនបើអ្នកក្បត់ប្រទេស ខ កូនស្រីនឹងត្រូវគេសម្លាប់។

ត្រង់ចំណុចនេះ នាងមិនមែនរៀបការធ្វើជាកូនប្រសាស្រីឡើយ ប៉ុន្តែត្រូវទៅធ្វើជាចំណាប់ខ្មាំង។

តួអង្គក្នុងរឿងសោកនាដកម្មនេះគឺ Senhime ជាចៅស្រីរបស់ Ieyasu Tokugawa ដែលជាអ្នកបង្រួបបង្រួមប្រទេស​​​​ជប៉ុន។

ត្រកូល Tokugawa បង្រួបបង្រួមជប៉ុនក្នុងឆ្នាំ ១៦០៣ បង្កើតជា Bakufu Edo ។ មេទ័ពដំបូងដែល​ជា​ប្រមុខ Bakufu គឺ Ieyasu Tokugawa ។ Senhime ជាកូនស្រីរបស់ Hidetada Tokugawa កូនប្រុសរបស់មេទ័ពជំនាន់ទី ២ នាង​កើត​ឆ្នាំ ១៥៩៧ ។

នៅពេលដែលនាងកើត Ieyasu Tokugawa គឺជាមនុស្សដែលមានអំណាចលេខ ១ ប៉ុន្តែអំណាចដ៏គួរឲ្យ​ភ័យខ្លាចរបស់ Hideyoshi Toyotomi ក៏ធ្វើឲ្យ​មនុស្សជាច្រើនមានការប្រុងប្រយ័ត្នផងដែរ។ Ieyasu Tokugawa ធ្លាប់គាំទ្រ Hideyoshi តាំងពីដើមភាគីទាំងពីរមានទំនាក់ទំនងល្អ។ បន្ទាប់ពី Hideyoshi Ieyasu ស្លាប់ គាត់ដណ្តើមអំណាចវិញ និង​ឡើង​កាន់អំណាច ក្រោយមកបង្កកំហឹងនឹងពួកសាមូរ៉ៃ ឈរខាងត្រកូល Toyotomi ។

នៅឆ្នាំ ១៦០៣ Senhime ត្រូវលើកទៅឲ្យ​ Hideyori ដែលជាកូនប្រុសរបស់ Hideyoshi ។ នៅពេលនោះ Senhime ទើបអាយុ ៧ ឆ្នាំ ចំណែក Hideyori អាយុ ១១ ឆ្នាំ។

នេះ​ជា​អាពាហ៍ពិពាហ៍​បែប​នយោបាយ ប៉ុន្តែ​មិន​ត្រឹមតែ​ដើម្បីរក្សា​ទំនាក់ទំនង​រវាង​ភាគី​ទាំងពីរ​ប៉ុណ្ណោះ​ទេ សំខាន់ដាក់​សម្ពាធ​លើ​ភាគី​ម្ខាងកុំ​ឲ្យ​បះបោរ​។ យ៉ាង​ណា​មិញ ពួកគេទាំងពីររស់នៅស្និទ្ធស្នាលគ្នា មិនអាចនិយាយថាស្នេហានោះ​​ទេ ប៉ុន្តែ​ជាមិត្តភក្តិកុមារភាព។

រឿងនោះកាន់តែឈឺចាប់ នៅពេលដែល Senhime មានអាយុ ១៨ ឆ្នាំ។

ត្រកូលទាំងពីរសំបកក្រៅរក្សាទំនាក់ទំនងព្រោះតែឥទ្ធិពលអាពាហ៍ពិពាហ៍នយោបាយ។ ប៉ុន្តែនៅឆ្នាំ ១៦១៤ ត្រកូល Tokugawa ស្រាប់តែវាយលុក Osaka ជាកន្លែងដែលត្រកូល Toyotomi រួមទាំង Senhime កំពុងរស់នៅ។ លទ្ធផល​សង្គ្រាម ប្តីរបស់នាង Hideyori និងម្តាយរបស់គាត់ Yodogimi ធ្វើអត្តឃាត ត្រកូល Toyotomi ត្រូវបំផ្លាញ។

ក្នុងស្ថានភាពនោះ តាមបញ្ជាជីតារបស់នាង Ieyasu នាងត្រូវបានធានាសុវត្ថិភាព។ មនុស្សជាច្រើននិយាយថា Senhime ព្យាយាមធ្វើអត្តឃាតតាម Hideyori ។

Senhime កំពុងស្ថិតក្នុងស្ថានភាពលំបាកខ្លាំង ប្តី​របស់​នាងស្លាប់ ដោយសារ​ការ​វាយ​ប្រហារ​របស់ឪពុក និងជីតារបស់​នាង។ ប៉ុន្តែ​សោក​នាដកម្ម​របស់ Senhime មិនត្រឹម​តែប៉ុណ្ណឹងឡើយ។

Ieyasu ពេលនោះបានសន្យាលើក Senhime អោយបុរសវ័យកណ្តាលម្នាក់ ប្រសិនបើបុគ្គលនោះអាចជួយសង្រ្គោះនាង។

ប៉ុន្តែនៅពេលនោះ Senhime គ្រោងនឹងលើកឲ្យ​សាមូរ៉ៃម្នាក់ទៀត។ ដឹង​រឿង​នេះ បុរស​វ័យ​កណ្តាល​ខឹងខ្លាំង​ក៏​រៀប​​គម្រោង​​ប្លន់កូនក្រមុំ។

គម្រោង​ប្លន់កូនក្រមុំត្រូវលាតត្រដាង និងរារាំង។ នៅទីបំផុត​មេក្លោង​ធ្វើអត្តឃាត ហើយភាគីទាំងពីរត្រូវកាត់ផ្តាច់។

សោកនាដកម្មទាំងអស់ធ្លាក់មកលើ Senhime នាងមិនបានធ្វើអ្វីសោះ តាំងពីដើមដល់ចប់នាងជាជនរងគ្រោះ បែរជាត្រូវគេហៅថា “ស្ត្រីបិសាច” ។

នៅឆ្នាំ ១៦១៦ Senhime ត្រូវកំណត់រៀបការជាថ្មីជាមួយសាមូរ៉ៃដែលមានឈ្មោះថា Honda Tadatoki ។ បុគ្គលនេះជាចៅប្រុសរបស់មេទ័ពសំខាន់ម្នាក់ដែលស្ថិតក្រោមសម្ព័ន្ធមិត្តរបស់ត្រកូល Tokugawa ។ បុរស​ម្នាក់​នេះ​សង្ហា​ ថ្លៃ​ថ្នូរ។

Senhime ក៏ស្រលាញ់មនុស្សម្នាក់នេះដែរ ហើយយល់ព្រមរៀបការ។ ប៉ុន្តែមួយឆ្នាំក្រោយមក សោកនាដកម្មផ្សេងទៀតបានកើតឡើង។ ព្រោះតែត្រកូល Honda កាន់​តំណែង​សំខាន់​ក្នុង​ជួរ​យោធា ត្រកូលនេះ​កាន់​អំណាច​ច្រើន។ ក្នុងនាម​ជា​អ្នកគ្រប់គ្រង ត្រកូល Tokugawa មិនត្រូវប្រគល់អំណាចក្នុងដៃនរណាម្នាក់ច្រើនពេកទេ បើមិនចង់ត្រូវគេក្បត់ ដូច្នេះ​​បានបញ្ជាឲ្យទម្លាក់គ្រួសារ Honda ។

ចំណែក Senhime ពេលនោះនាងទៅរស់នៅប្រាសាទ Himeji នៅ Hyogo ។ នៅពេលរៀបការ នាងយកតាម ១០ ម៉ឺន​ត្បូង​មាន​តម្លៃ និងប្រាក់ច្រើនសន្ធឹកសន្ធាប់ ដែលប្រហែលជារាប់សិបពាន់លានយ៉េនគិតជារូបិយប័ណ្ណសព្វថ្ងៃ។

នៅឆ្នាំ ១៦១៨ នាងសម្រាលបានកូនស្រីម្នាក់ ហើយ​ឆ្នាំ​បន្ទាប់​​សម្រាល​បាន​កូន​ប្រុសម្នាក់។ ប៉ុន្តែសុភមង្គលមិនស្ថិត​ស្ថេរ​នោះទេ លុះកូនប្រុសអាយុ ៣ ឆ្នាំ ស្វាមីជាទីស្រលាញ់របស់ Senhime លាចាកលោក ដែលម្តងទៀតបណ្តាល​មក​ពីត្រកូល​របស់ខ្លួនបង្កឡើង។

យោងតាមផែនការ Senhime ត្រូវបានបញ្ជូនទៅវិញ ហើយបន្តក្លាយជាអុករបស់ Tokugawa ។ ប៉ុន្តែ​លើក​នេះ នាង​បាន​​តាំង​​ចិត្ត​​ចាក​ចេញ ទៅបួសធ្វើជាដូនជី។ 

ច្រើនឆ្នាំក្រោយមក មិនមានដំណឹងរបស់ Senhime ហើយក៏មិនច្បាស់ដែរថា តើត្រកូល Tokugawa ដេញតាមនាងដែរ​ឬ​អត់។

កូនចៅរបស់សាមូរ៉ៃខាងលើមានអំណាចច្រើន ប៉ុន្តែក្នុងពេលជាមួយគ្នានោះជាជនរងគ្រោះនៃសង្គ្រាមត្រកូល និងអាពាហ៍ពិពាហ៍នយោបាយ។ ដូច្នេះហើយស្នេហា និងជីវភាពធម្មតាគ្រាន់តែជាក្តីស្រមៃមិនអាចធ្វើបាន មិនដឹងថាសំណាង​ឬ​អភ័ព្វ​ឡើយ។

តើអ្នកគិតថាជីវិតបែបណាទើបមានសុភមង្គល?

Kengo Abe