ចូលរួមសម្អាត Sento អាចងូតទឹកដោយឥតគិតថ្លៃ ដោះស្រាយបញ្ហាកង្វះកម្លាំងពលកម្ម និងជួយយុវជនសម្រេចក្តីស្រមៃរបស់ខ្លួន

Sento គឺជាលក្ខណៈវប្បធម៌ពិសេសរបស់ជប៉ុន វប្បធម៌នេះកើតឡើងដោយសារកាលពីមុនប្រជាជនជប៉ុនមិនធ្វើបន្ទប់​ទឹកក្នុងផ្ទះ។ សព្វថ្ងៃនេះគ្រួសារជាច្រើនសាងសង់បន្ទប់ទឹក ដូច្នេះវប្បធម៌នេះក៏បាត់បង់បន្តិចម្តងៗ។

នៅសម័យរបស់ខ្ញុំចាប់​ផ្ដើម​ពេញ​និយមងូត​ទឹក​តាម​ផ្ទះទៅហើយ ប៉ុន្តែពេលខ្លះខ្ញុំក៏ចង់ទៅ Sento ដើម្បី​ងូត​អាង​ទឹក​ធំដែរ។

តាមការចង់ចាំរបស់ខ្ញុំ Sento គឺជាអាងទឹកធំ ជាកន្លែងដែលក្មេងៗប្រឡែងលេងអ៊ូអរ និងត្រូវមនុស្សធំស្តីបន្ទោស។

ថ្វីត្បិតតែមនុស្សមួយចំនួនមិននិយាយស្តី ប៉ុន្តែរូបសាក់លើខ្លួនរបស់ពួកគេធ្វើអោយមនុស្សជាច្រើននៅស្ងៀម។

នោះជាកន្លែងដ៏ល្អសម្រាប់ក្មេងៗស្វែងយល់សង្គម។

ឥឡូវនេះផ្ទះជួលភាគច្រើនមានបន្ទប់ទឹក ម្យ៉ាងមនុស្សជាច្រើនរវល់ធ្វើការរហូតដល់ពាក់កណ្តាលអធ្រាត្រ ចំនួនអ្នក​ទៅ Sento ក៏ថយចុះយ៉ាងខ្លាំង​ផង​ដែរ។

ទោះជាយ៉ាងណា Chidori Onsen នៅ Osaka មានការផ្លាស់ប្តូរថ្មីក្នុងប្រព័ន្ធ Sento ដើម្បីស្ដារវប្បធម៌នេះ។ ក្រោយម៉ោង ១១ ម៉ោងបិទទ្វារ មាន​យុវជននៅ​សម្អាត​បន្ទប់ទឹក។

មនុស្សចំនួន ៩ នាក់ទាំងប្រុស ទាំងស្រីធ្វើការនៅតំបន់ Onsen នេះ។ ការងារសម្អាតបុរសជាអ្នកទទួលខុសត្រូវ ចំណែក​​ស្ត្រី​ទទួល​តួនាទី​ bandai (ស្រដៀងអ្នក​ទទួល​ភ្ញៀវ​)។ យុវជន​ដែល​ធ្វើ​ការ​នៅ​ទី​នេះ​​ក៏​ចូល​រួម​សកម្មភាព​សិល្បៈ​ដូច​​ជា​​តារា​ចម្រៀង សិល្បករ​ជាដើម។

ទាំងនេះ​ជា​យុវជនដែល​ខំប្រឹង​សម្រេច​ក្តី​ស្រមៃរបស់ខ្លួនតែគ្មានប្រាក់។ ភាគច្រើនពួកគេរស់នៅក្នុងផ្ទះជួលតូច ថែម​ទាំង​មិនមានបន្ទប់ទឹក។ ដោយសារមាន Sento ថ្មីនេះ ពួកគេកំពុងរស់នៅយ៉ាងសប្បាយរីករាយ។

ម្ចាស់​តំបន់ Sento នេះជា Salary man (បុគ្គលិកសុីឈ្នួល)។

ដោយដឹងថា Chidori Onsen ផ្អាកដំណើរព្រោះតែគ្មានអ្នកគ្រប់គ្រង ដូច្នេះ​បុគ្គល​ម្នាក់នេះ​លា​ឈប់​ពីការងារ ដើម្បីចាប់ផ្តើមការងារគ្រប់គ្រងបន្ទប់ទឹក។ ជារៀងរាល់ថ្ងៃត្រូវចាប់ផ្តើមរៀបចំអាងងូតទឹក ហើយបញ្ចប់ការងារនៅពាក់​កណ្តាល​អធ្រាត្របន្ទាប់ពីសម្អាតរួចរាល់។ គាត់​រវល់​ខ្លាំង​រហូត​ស្រក​ ៤ គីឡូក្រាម​ក្នុង​រយៈពេល ៤ ខែ។ ដោយឃើញថាគ្មានកម្លាំង​គ្រប់​គ្រាន់​ធ្វើការ គាត់បានបង្ហោះការងារនៅលើ Twitter ។

អ្នក​ដែល​មក​ជួយ​សម្អាត​អាច​ចូល​ងូត​ទឹកដោយឥតគិតថ្លៃ ថែមទាំងអាចជួលបន្ទប់បានដោយឥតគិតថ្លៃ។ យុវជន​​ដែល​​ចូល​​រួម​ក្នុង​គម្រោង​នេះត្រូវបានជ្រើសរើសម្តងម្នាក់ៗ។

ដោយផ្តើមចេញពីគំនិតគ្មានពេលវេលាសាងសង់ Chidori Onsen ប៉ុន្តែ​ក្រោយ​មក​សកម្មភាព​នេះបានងាកទៅ​ជួយ​យុវជន​ដែលមានក្តីស្រមៃចង់ធ្វើការខាងវិស័យសិល្បៈ។

តាមរយៈរឿងនេះ មនុស្សកាន់តែច្រើនចង់ជួយយុវជនសម្រេចក្តីស្រមៃរបស់ខ្លួន។ ម្ចាស់អាងងូតទឹក​គិត​ថា​ទីក្រុង​ទាំង​​មូល​​នឹង​មាន​ភាព​ស្រស់​ស្រាយ​ឡើង​វិញ។

យុវជនដែលមានក្តីស្រមៃដូចគ្នា អាចសម្អាតផង ចែករំលែករឿងរ៉ាវរបស់ខ្លួនផង នេះ​ជា​កន្លែង​ដ៏​ល្អ​សម្រាប់​យុវវ័យស្វែង​​រក​​ដៃ​គូ​​ឆ្ពោះ​​ទៅ​​កាន់​ក្តីស្រមៃរបស់ខ្លួន។

Kengo Abe