គុណសម្បត្តិរបស់ Miso មិនត្រឹមតែឆ្ងាញ់ ថែមទាំងល្អចំពោះសុខភាព

Miso និង Shoyu ត្រូវបានគេចាត់ទុកដូចជាគ្រឿងទេសដែលតំណាងឲ្យ​​ម្ហូប​ជប៉ុន។

តើអ្នកដឹងពីភាពអស្ចារ្យនៃការផលិត miso ដែរទេ?

មិនត្រឹមតែឆ្ងាញ់ទេ ថែមទាំងល្អចំពោះសុខភាពទៀតផង ដូច្នេះហើយ miso ជាគ្រឿងទេសថ្នាក់ខ្ពស់។ Miso ត្រូវ​បាន​គេ​ប្រើ​ជាមួយ​នឹង​មុខ​ម្ហូប​ជា​ច្រើន​ដូច​ជា Ramen ហើយ​ពេញ​និយម​បំផុត​គឺ​ស៊ុប Miso ។

ប្រសិនបើអ្នកធ្លាប់ភ្លក់មុខម្ហូបបែបជប៉ុន អ្នកប្រាកដជាធ្លាប់ទទួលទានជាមួយ Miso ។ ឥឡូវនេះ ចូរក្រឡេកមើល​​ទិន្នន័យ​​វេជ្ជសាស្រ្ដ​ អ្នក​នឹងមើលឃើញភាពអស្ចារ្យរបស់ miso ទាំងអស់គ្នា។

កាល់ស្យូមច្រើន

កាល់ស្យូមគឺជាសារធាតុចិញ្ចឹមដ៏សំខាន់សម្រាប់ការបង្កើតឆ្អឹង និងធ្មេញ។ ក្នុងសមាសភាព miso មានកាល់ស្យូម ប៉ុន្តែមិនត្រឹមតែប៉ុណ្ណឹង ពេលចម្អិនស៊ុប Miso ប្រជាជនជប៉ុនប្រើ Dashi (出汁) ។ Dashi ជាទឹកស៊ុបបន្ទាប់ពីស្ងោរ​​ត្រី និងសារ៉ាយសមុទ្រ ជាត្រីខកំប៉ុងក្រៀម (Niboshi – ប្រភេទ​ត្រី​តូច) ឬត្រីក្រៀមហាន់ស្តើងៗ (Katsuobushi) មាន​កាល់​ស្យូម​ច្រើន។ លើសពីនេះ គ្រឿងផ្សំដែលល្អចំពោះសុខភាពដូចជាតៅហ៊ូ សារ៉ាយសមុទ្រ និង​បន្លែ​ផ្សេងៗ​ទៀត​ក៏នឹងបន្ថែមទៅក្នុងស៊ុបផងដែរ។

មុខម្ហូបនេះសំខាន់សម្រាប់កុមារដែលកំពុងអភិវឌ្ឍឆ្អឹង ក៏ដូចជាមនុស្សចាស់ដែលមានប្រព័ន្ធឆ្អឹងខ្សោយ។

កាត់បន្ថយហានិភ័យជំងឺមហារីកក្រពះ

វិទ្យាស្ថានមហារីកជាតិបានប្រកាសថា miso ជួយកាត់បន្ថយអត្រាកើតជំងឺមហារីកក្រពះ និងហានិភ័យមរណ។

ជាពិសេសសម្រាប់បុរស មានភាពខុសគ្នា ៤៨% អត្រាមរណភាពរវាងអ្នកហូបស៊ុប miso រាល់ថ្ងៃ និងអ្នកមិនហូប។ នេះ​ជា​ភាព​ខុស​គ្នា​ជាក់​ស្តែង​ណាស់។

ការពារជំងឺមហារីកសុដន់

នេះ​ជាការ​ស្ទង់មតិ​ដែល​ធ្វើឡើង​ដោយ​ក្រុម​ស្រាវជ្រាវ​របស់​ក្រសួងសុខាភិបាល ការងារ និង​សុខុមាលភាព។ ពួកគេស្រាវជ្រាវប្រសិទ្ធភាពក្នុង​ការ​ទទួល​ទាន​ស៊ុប miso សណ្តែក និង Natto លើអត្រាកើតជំងឺមហារីកសុដន់រយៈពេល ១០ ឆ្នាំ។

ការស្ទង់មតិបង្ហាញថា អ្នកហូបស៊ុប miso ពីរចានក្នុងមួយថ្ងៃអាចកាត់បន្ថយជំងឺមហារីក ២៦% បើធៀបទៅនឹងអ្នកហូបស៊ុបមួយចានក្នុងមួយថ្ងៃ។ តួលេខនេះចំពោះអ្នកដែលហូបបីចានក្នុងមួយថ្ងៃគឺ ៤០% ។

កាត់បន្ថយស្នាមអុចខ្មៅ អាចម៍រុយ

ស្នាមអុចខ្មៅ និងអាចម៍រុយលើស្បែកដោយសារឥទ្ធិពលពន្លឺព្រះអាទិត្យខ្លាំង ហើយក៏ជាសត្រូវរបស់ស្រ្តីផងដែរ។

បច្ចុប្បន្នវិធីសាស្ត្រប្រើ miso កាត់បន្ថយស្នាមអុចខ្មៅ មិនទាន់ត្រូវបានធ្វើតេស្តទូលំទូលាយនៅឡើយទេ ទោះជាយ៉ាងណាលទ្ធផលបង្ហាញថាស្ត្រីហូបស៊ុប miso ដែលចម្អិនដោយ miso អង្កររាល់ថ្ងៃជួយកាត់បន្ថយកម្រិតស្នាមអុចខ្មៅលើថ្ពាល់ អាចម៍រុយ។

តើ miso អាចជួយសម្រកទម្ងន់ដែរទេ?

សណ្តែកសៀងផ្ទុកសារធាតុជួយកាត់បន្ថយកូឡេស្តេរ៉ុលអាក្រក់ ដូចជាអាស៊ីត linoleic, lecithin និង saponin ។

របាយការណ៍មួយចំនួនបង្ហាញថា ទទួលទានស៊ុប miso ម្តងក្នុងមួយថ្ងៃរយៈពេល ៦ ខែកាត់បន្ថយកម្រិតសារធាតុខ្លាញ់ក្នុងចរន្តឈាម។

ប្រសិនបើរបាយការណ៍នេះត្រូវបានបញ្ជាក់ Miso ល្អចំពោះរបបអាហារសម្រកទម្ងន់។

តើ​អ្នក​យល់​យ៉ាង​ណាចំពោះគុណសម្បត្តិរបស់ Miso ?

ចាប់ពីថ្ងៃស្អែកទៅ កុំភ្លេចទទួលទាន Miso ជារៀងរាល់ថ្ងៃ។

Abe Kengo