ក្តីស្រមៃឡើងកំពូលភ្នំ Fuji របស់បុរសវ័យ ៧៩ ឆ្នាំបានក្លាយជាការពិត

ភ្នំ Fuji ជាភ្នំដែលខ្ពស់ជាងគេនៅប្រទេសជប៉ុនមានកម្ពស់ ៣៧៧៦ ម៉ែត្រ មានមនុស្សជាច្រើនប្រាថ្នាចង់ឡើង។ បុរស​ជា​ឪពុក​វ័យ ៧៩ ឆ្នាំ​ក្នុង​រឿង​នេះ​មាន​បំណង​ចង់​ឡើង​​កំពូល​ភ្នំ​។

ដូច្នេះបានជាកូនប្រុសជួយឪពុកធ្វើដំណើរសម្រេចក្តីស្រមៃ។ ទោះ​បីជា​មាន​ជំងឺ​ខ្លាចខ្ពស់ ក៏​លោក​នៅ​តែ​ចង់​​ឈរ​​លើ​​កំពូល​ភ្នំជប៉ុន។ នៅទីនោះមានទេសភាពស្អាតដែលគាត់មិនធ្លាប់បានឃើញពីមុនមក។

ឡើងភ្នំនៅអាយុ ៨០ ឆ្នាំ

នោះជាលើកទីមួយដែលលោក Tsuneo Moriya អាយុ ៧៩ ឆ្នាំ មកពីទីក្រុង Fukuyama ខេត្ត Hiroshima ឡើងភ្នំ។ នៅថ្ងៃទី ២៣ ខែកក្កដា ឆ្នាំ ២០១៧ ជាលើកដំបូងក្នុងជីវិតគាត់សម្រេចចិត្តឡើងភ្នំ Fuji ក្នុងដំណើរកំសាន្តមួយ។

ទោះគាត់ធ្វើដំណើរមកដល់ស្ថានីយ៍ទី ៥ ជាច្រើនដង ប៉ុន្តែគាត់មិនធ្លាប់ទៅឆ្ងាយជាងហ្នឹងឡើយ។ ហេតុនេះហើយ​ទើប​​លោក​​មាន​ក្តី​ស្រមៃ​ចង់​គយគន់​ទេសភាព​នៅលើ​កំពូលភ្នំ​ពេល​លោក​មាន​អាយុ​ ៨០ ​ឆ្នាំ​។

ថ្ងៃចេញ​ដំណើរ​ពីស្ថានីយ៍ទី ៥ ។

លោក Tsuneo កាល​នៅ​ក្នុង​ជួរ​កងទ័ពធ្លាប់ចូលរួមរត់ Half marathon ។ ទោះបីជាគាត់មានអាយុច្រើនជាងគេក្នុង​ក្រុម​ក៏​ដោយ ប៉ុន្តែគាត់មានទំនុកចិត្តយ៉ាងខ្លាំងចំពោះកាយសម្បទារបស់ខ្លួន ហើយគាត់ក៏មិនធ្លាប់ឡើងភ្នំ​ផង​ដែរ។

កូនប្រុសរបស់លោក Tsuneo ឈ្មោះ Koichi អាយុ ៥១ ឆ្នាំដោយមានការព្រួយបារម្ភសម្រេចចិត្តចូលរួមជាមួយឪពុក។

លោក Tsuneo ពេលមើលឃើញកូនរបស់ខ្លួនញញឹមនិយាយថា “ឡើងភ្នំជាមួយគ្នាក៏ល្អដែរ ប៉ុន្តែកូនមិនចាំបាច់ធ្វើដល់ថ្នាក់នឹងទេ។ ពុកមានអ្នក​ណែ​នាំ​ល្អ​​ម្នាក់​​ហើយ” ។

នៅ​ពេល​នោះក្តីស្រមៃ​មិន​អាច​ក្លាយ​ជា​ការ​ពិត

Koichi រំលឹកថា “នៅទីបំផុតពេលនោះ ឪពុកខ្ញុំមិនអាចឡើងដល់កំពូលភ្នំ” ។

នៅពេលក្រុមកំពុងឡើងកំពូល​ភ្នំ​មើល​ថ្ងៃ​រះ មេឃពេលនោះងងឹតសូន្យ។ ព្រោះតែលោក Tsuneo មានវ័យចំណាស់ និង​មានជំងឺដាច់សរសៃឈាមខួរក្បាល ដូច្នេះអ្នកណែនាំអនុញ្ញាតអោយគាត់នៅក្នុងតង់។ ថ្វីត្បិតតែក្នុងអុីម៉ែលផ្ញើ​អោយកូនប្រុសគាត់បានសរសេរថា “ដំណើរកម្សាន្តគួរឱ្យចាប់អារម្មណ៍ណាស់” ប៉ុន្តែកូនប្រុសដឹងថាឪពុករបស់ខ្លួន​នៅតែសោកស្តាយ។ ដោយ​សារ​តែ​មាន​ទំនុក​ចិត្ត​លើ​កម្លាំង​កាយ ដូច្នេះអារម្មណ៍សោកស្តាយកាន់​តែ​ធំ។

លោក Tsuneo បើកចិត្តនិយាយថា “ពិតជាគួរអោយសោកស្តាយណាស់។ ខ្ញុំសាកល្បងម្តងទៀត ប៉ុន្តែអាយុ ៧៩ ឆ្នាំទៅហើយ។ ខ្ញុំមិនដឹងថាអាចធ្វើបានយូរប៉ុណ្ណាទេ” ។

លោក Koichi សម្រេច​ចិត្ត​នាំ​ឪពុក​ឡើងភ្នំដើម្បី​បំបាត់​អារម្មណ៍សោកស្ដាយ​នេះ។ ដំបូងឡើយ លោក Tsuneo បានបដិសេធ ព្រោះខ្លាចរំខានដល់កូនប្រុស ប៉ុន្តែបន្ទាប់ពីបានឃើញការប្តេជ្ញាចិត្តរបស់កូន គាត់ក៏បានយល់ព្រម។

តាំងពីពេល Koichi អាយុ ១៨ ឆ្នាំ ឪពុកកូនលែងរស់នៅជាមួយគ្នា ហើយជួបគ្នាត្រឹម​ ២ ទៅ ៣ ដងក្នុងមួយឆ្នាំប៉ុណ្ណោះ។ នេះជាដំណើរកំសាន្តលើកដំបូងរបស់ពួកគាត់។

មួយខែក្រោយមក នៅថ្ងៃទី ២៥ ខែសីហា អ្នកទាំងពីរបានសាកល្បងឡើងវិញ នៅស្ថានីយ៍ទី ៥ ។

ពេលចាប់ផ្តើមរលូនល្អ ប៉ុន្តែស្រាប់តែមានបញ្ហាកើតឡើង

ដើមឡើយដំណើររបស់​ឪពុកកូនអំណោយ​ផល​ណាស់។ នៅស្ថានីយ៍ទី ៦ លោក Koichi ស្ពាយទាំងកាបូបរបស់ឪពុក។ មកដល់ស្ថានីយ៍ទី ៧ ល្បឿនរបស់ពួកគេលឿនជាង ៤០ នាទី។

ទោះជាយ៉ាងណា នៅស្ថានីយ៍បន្ទាប់មកទៀត ជំងឺខ្លាចខ្ពស់របស់លោក Tsuneo រើឡើង។ លោក Tsuneo ជជែកគ្នាជា​មួយ​កូននៅស្ថានីយ៍មុន ប៉ុន្តែមកដល់ស្ថានីយ៍ទី ៨ លោក​បាន​ត្រឹម​តែ​នៅ​ស្ងៀម។ គាត់តែងតែត្អូញត្អែរថាឈឺខ្នង ទោះគាត់មិនមែនជាមនុស្សត្អូញត្អែរក៏ដោយ។ ពេល​វេលា​សម្រាកច្រើនឡើង លោក Koichi ត្រូវទុកឱ្យ​ឪពុក​សម្រាក​នៅ​ពាក់​កណ្ដាល​ភ្នំ និងប្រើអុកស៊ីសែនចល័ត។

លោក Koichi បាននិយាយថា “ព្រោះតែធ្លាប់បរាជ័យម្តង ដូច្នេះខ្ញុំពិតជាមានការបារម្ភ។ ខ្ញុំគិតថាខ្លួនធ្វើខុសនៅ​ពេល​​ដែល​​ឡើង​ខ្ពស់ពេក” ។

ស្ទើរតែបោះបង់ចោល

ឪពុក​កូនព្យាយាម​ទៅ​ដល់​ស្ថានីយ​ទី ​៩ មានរយៈកម្ពស់ ៣៦០០ ម៉ែត្រ កំពូល​ភ្នំ​កំពុងខិតមកជិត។ ហើយលោក Tsuneo ក៏ឈានដល់ដែនកំណត់របស់គាត់ដែរ។ លោក Koichi ព្រួយបារម្ភ មិនដឹងថាគួរត្រឡប់ទៅស្ថានីយ៍ទី ៨ វិញ​ឬ​អត់ នៅ​ទី​នោះ​មាន​ផ្ទះសំណាក់មួយ។

ខណៈពេលកូនប្រុសរបស់គាត់កំពុងច្របូកច្របល់ លោក Tsuneo បាននិយាយថា “ពុកត្រូវតែឡើងដល់កំពូល” ។

ដោយ​ឮ​ពាក្យ​ទាំង​នេះ លោក Koichi ក៏​សម្រេច​ចិត្ត​បន្ត​ដំណើរ។ ដោយផ្ទាល់លោក Koichi ក៏ពិបាកណាស់ដែរ កា​បូប​ទាំង​​ពីរ​​មាន​​ទម្ងន់​ប្រហែល ៣០ គីឡូក្រាម។ ក្រៅ​ពី​សម្លៀក​បំពាក់ លោក​ក៏​បាន​ត្រៀម​ទឹក ​អាហារ និង​ថ្នាំ​មួយ​ចំនួន​​ផង​​ដែរ។ លោក Koichi ចូលចិត្តឡើងភ្នំ ហើយទម្ងន់មិនជាបញ្ហាសម្រាប់គាត់ទេ ប៉ុន្តែឡើងផង ជួយទាញលោក Tsuneo ផងពិតជាលំបាកណាស់។ ទោះ​បី​ជា​យ៉ាង​ណា កូន​ប្រុស​នៅ​តែ​ព្យាយាម​លើក​ទឹក​ចិត្ត​ឪពុក។

ក្រឡេក​មើលទៅ​លើ​កំពូល​ភ្នំ​ឃើញ​មាន​ក្រុម​យុវជន ​៣​ នាក់បក់​ដៃ។ លោក Tsuneo បាននិយាយថា “ខ្ញុំសប្បាយចិត្តខ្លាំងណាស់ មានអារម្មណ៍ថាខ្លួនរឹងមាំជាងនេះ” ។

ក្តីស្រមៃក្លាយជា​ការពិត

កំពូល​ភ្នំ​នេះ​ជា​លទ្ធផល​នៃ​ការ​ខិត​ខំ​របស់​ឪពុក​កូនទាំងពីរ។

នៅពេលពួកគាត់ទាំងពីរឡើងដល់កំពូលភ្នំ មេឃងងឹតនៅឡើយ។ ក្រឡេកមើលជើងភ្នំឃើញ Kagefuji ស្រមោលភ្នំលាត​សន្ធឹង ជាទិដ្ឋភាព​ដ៏​អស្ចារ្យ​លើ​ភ្នំដែលខ្ពស់ជាងគេនៅជប៉ុន។

ពេល​នោះ​គាត់​ក៏​និយាយប្រាប់​កូន​ថា “ពុកសប្បាយ​ចិត្ត​ណាស់ នេះ​ជា​អនុស្សាវរីយ៍​ដែល​គាត់​យកតាមពេលលាចាកលោក​” ។

ដោយសាររយៈពេលឡើងរបស់លោក Tsuneo យូរពេក ដូច្នេះគាត់​មិន​ត្រូវ​បាន​គេ​បញ្ចូល​ក្នុង​កំណត់ត្រាអ្នកឡើងភ្នំដែលមានអាយុជាង ៧០ ឆ្នាំទេ (គណនាតាមអាយុ)។ ទោះជាយ៉ាងណាក៏ដោយ លោក Tsuneo បានឃើញអ្វីដែលគាត់​ចង់​ឃើញ សម្រេច​ក្តីស្រមៃរបស់ខ្លួន ហើយជាងនេះទៅទៀត គាត់អាចធ្វើរឿងនេះជាមួយកូនប្រុសរបស់ខ្លួន។

Sacchan