ករណីក្មេងស្រីអាយុ ៩ ឆ្នាំត្រូវបុរសអ្នកជិតខាងចាប់ខ្លួន​ធ្វើ​បាប​​អស់​​រយៈ​​ពេល ១០ ឆ្នាំ​ទើប​ទទួល​បាន​ការ​ជួយ​សង្គ្រោះ

នៅថ្ងៃមួយ ខែវិច្ឆិកា ឆ្នាំ ១៩៩០ នៅទីក្រុង Sanjo ខេត្ត Niigata ប្រទេសជប៉ុន ប្អូនស្រីឈ្មោះ Fusako Sano អាយុ ៩ ឆ្នាំ មិនបានត្រឡប់មកផ្ទះក្រោយពេលចេញពីសាលា។

ដំបូង​ឡើយ ឪពុក​ម្ដាយ​មិនចាប់អារម្មណ៍ព្រោះគិត​ថា​កូន​ស្រីដើរលេង។

ប៉ុន្តែរហូតដល់មេឃងងឹតនៅតែមិនឃើញ Fusako ត្រឡប់មកផ្ទះវិញ ឪពុកម្តាយរបស់ប្អូនមានការព្រួយបារម្ភ។ ពួក​​គេ​ទៅដល់សាលារកមើលកូន អ្នកគ្រូបានប្រាប់ថាប្អូន​ត្រឡប់ទៅផ្ទះហើយ។

បន្ទាប់ពីស្វែងរកគ្រប់ទីកន្លែងតែមិនឃើញ ពួកគាត់​រាយការណ៍​ប្រាប់​ប៉ូលិស។ ដំណើរការស្វែងរកត្រូវបានធ្វើឡើងក្រោម​វត្តមានរបស់ប៉ូលីសជាច្រើន ប៉ុន្តែនៅតែរកមិនឃើញប្អូនស្រី Fusako ។ ប្អូន​ហាក់​បី​ដូច​ជា​បាត់​ស្រមោល មិនបន្សល់ទុកដានអ្វីឡើយ។

ជាច្រើនថ្ងៃបានកន្លងផុតទៅ ប៉ូលិសនៅតែមិនអាចរកឃើញតម្រុយដែលមានប្រយោជន៍។ ចម្លែក​ត្រង់​ថា បើ​ត្រូវចាប់​ជំរិត​ ហេតុ​អ្វីជននោះមិនហៅទូរស័ព្ទ ហើយបើត្រូវសម្លាប់ប្រាកដជារក​ឃើញ​សាកសព តើមនុស្សនៅរស់ម្នាក់ធ្វើយ៉ាងណារលាយបាត់​ខ្លួន?

ក្រុមគ្រួសារនៅតែសង្ឃឹមថាកូនរបស់ខ្លួននៅរស់ ប្រសិន​បើ​មិនទាន់រក​ឃើញ​សាកសព។ ពួកគេបន្តស្វែងរក រង់ចាំទាំងថ្ងៃទាំងយប់ ដោយសង្ឃឹមថាថ្ងៃណាមួយអព្ភូតហេតុនឹងកើតឡើង។

ដប់ឆ្នាំក្រោយមក ករណីនេះហាក់ដូចជាស្ងប់ស្ងាត់ មានតែឪពុកម្តាយប្អូនស្រីតែងតែគិតដល់នាង ប៉ុន្តែក្នុងចិត្តពួក​គេក៏សង្ស័យថា កូនស្រីរបស់ខ្លួនបានស្លាប់បាត់ទៅហើយ។ សង្ឃឹម​ថាកូនអាចត្រឡប់មកវិញ ប្រហែលគ្រាន់តែជាក្តីស្រមៃប៉ុណ្ណោះ។

នៅថ្ងៃមួយស្រ្តីអាយុ ៧៣ ឆ្នាំម្នាក់បានទូរស័ព្ទទៅមណ្ឌលថែទាំសុខភាពដើម្បីសុំជំនួយ។ លោកស្រីបារម្ភ​អំពើ​ហិង្សា​របស់​​កូន​ប្រុសមកលើខ្លួន។

ជាក់ស្តែងកូនប្រុសឈ្មោះ Nobuyuki Sato បានប្រព្រឹត្តអំពើហឹង្សាធ្ងន់ធ្ងរ។ មិនដែលគិតថា ករណីនេះទាក់ទងនឹងករណី​​កាល​ពី ១០ ឆ្នាំមុនទេ ប៉ុន្តែបានក្លាយទៅជាគន្លឹះដោះស្រាយករណីបាត់ខ្លួនដ៏ចម្លែករបស់ប្អូនស្រី Fusako ។

បុគ្គលិកមណ្ឌលថែទាំសុខភាពបានមកដល់ផ្ទះរបស់ Sato ហើយធុំក្លិនស្អុយយ៉ាងខ្លាំងចេញពីបន្ទប់ជាន់ទី ២ ។ នៅពេលបើកទ្វារ មនុស្សគ្រប់គ្នាដែលមានវត្តមានភ្ញាក់ផ្អើលព្រោះតែភ័យខ្លាច។

បុគ្គលិក​មណ្ឌលថែទាំ​សុខភាពហៅ​ទូរស័ព្ទ​ទៅ​កាន់ប៉ូលិស បន្ទាប់ពីប៉ូលីសមកដល់ ពួកគេរកឃើញនារីម្នាក់ ស្គមស្គាំង កខ្វក់ រោគសញ្ញាក្រិនសាច់ដុំ ដំបូងមិនដឹងថានាងជាប្រុស ឬស្រីផង។ ស្ត្រី​ម្ចាស់ផ្ទះតក់ស្លុត​យ៉ាង​ខ្លាំង គាត់មិន​ដែលដឹងថា មានវត្តមាននារីម្នាក់ក្នុងផ្ទះរបស់ខ្លួនឡើយ។

បន្ទាប់ពីប៉ូលិសស៊ើបអង្កេត នារីម្នាក់នេះគឺ Fusako Sano ជាក្មេងស្រីបាត់ខ្លួនជិត ​១០​ ឆ្នាំ​មក​ហើយ។ អ្វីដែលគួរឲ្យ​ភ្ញាក់ផ្អើល គ្រួសាររបស់ Fusako Sano នៅជិតផ្ទះលោកស្រី Sato ដែលឪពុកម្តាយនាងតែងសុខទុក្ខជា​ប្រចាំ។

ដោយសារតែខ្សែពួររុំជុំវិញរាងកាយរបស់ប្អូនពីមួយឆ្នាំទៅមួយឆ្នាំ ឆ្អឹងសន្លាក់របស់ប្អូនរងការខូចខាតយ៉ាងធ្ងន់ធ្ងរ ដូច្នេះប្អូនមិនអាចដើរបានធម្មតាទេ។ ជាច្រើនឆ្នាំមកនេះ ប្អូនស្រីមិននិយាយស្តី ដូច្នេះមិនដឹងពីរបៀបទំនាក់ទំនង​ជា​មួយ​អ្នក​ដទៃ។ ព្រោះតែមិនដែលងូត​ទឹក ខ្លួន​ប្រាណ​របស់ប្អូនឡើងខ្ទុះច្រើន​ដង។

នៅពេលដែល Fusako Sano មានអាយុ ១៩ ឆ្នាំ ក្រោយពេលជាសះស្បើយអស់រយៈពេលយ៉ាងយូរ នាងព្រមបើកចិត្ត ប្រាប់​ប៉ូលិស​ពីរយៈពេលដ៏អាក្រក់នៃជីវិតរបស់នាង នៅពេលដែលត្រូវអ្នកជិតខាងឃុំ​ខ្លួន ​១០ ​ឆ្នាំ។

នៅថ្ងៃនោះ Fusako Sano តាមផ្លូវត្រឡប់ទៅផ្ទះ។ ពេលជិតមកដល់ផ្ទះ ក្មេងស្រីត្រូវបុរសអាយុ ២៧ ឆ្នាំ ឈ្មោះ Nobuyuki Sato អញ្ជើញចូលផ្ទះផឹកទឹកផ្លែឈើ។ Fusako Sano មិនសង្ស័យក៏យល់ព្រម រីករាយចូលផ្ទះបុរសនោះរួចត្រូវ​ចាប់​ខ្លួន។

រយៈពេល ១០ ឆ្នាំមកហើយនាងរស់ក្នុងជីវិតដ៏អាក្រក់។ កន្លែងឃុំខ្លួនរបស់ Fusako Sano គឺបន្ទប់ជាន់ទី ២ ចម្ងាយ​ពី​ប៉ុស្តិ៍​ប៉ូលីស​តែពីរបីរយម៉ែត្រប៉ុណ្ណោះ និងនៅទល់មុខផ្ទះរបស់នាង។

Fusako Sano បាននិយាយថា ជនចាប់ខ្លួនចងនាងជាច្រើនខែ ប្រសិនបើព្យាយាមរត់គេចនឹងត្រូវពិន័យ។ Fusako Sano មិន​បាន​ប្តូរ​សម្លៀកបំពាក់ មិន​ឲ្យ​ទៅ​បង្គន់ ឬងូត​ទឹកទៀងទាត់ឡើយ។

ទទួលបានអាហារ ឬមិនបានហូបអាស្រ័យ​លើ​អារម្មណ៍​របស់ Sato Nobuyuki ។ ប្រសិនបើអារម្មណ៍ល្អ ជននោះនឹងឲ្យ​ហូប​មីកញ្ចប់ នំប៉ាវសារ៉ាយសមុទ្រ ហើយប្រសិនបើអារម្មណ៍មិនល្អ Fusako Sano នឹង​ទុក​ឲ្យ​​អត់​ឃ្លាន។

Fusako Sano ក្លាយជាកន្លែងដែល Nobuyuki បញ្ចេញកំហឹងរាល់ពេលអារម្មណ៍មិនល្អ នៅពេលមិនសប្បាយចិត្ត ជន​នេះ​តែង​តែ​វាយ Fusako Sano យ៉ាងព្រៃផ្សៃ។

ដំបូងឡើយ Fusako Sano ព្យាយាមរត់គេចខ្លួន ប៉ុន្តែមិនបានសម្រេច លទ្ធផលត្រូវ Sato វាយធ្វើបាប។ ក្មេងស្រីទើប​តែ​អាយុ ៩ រស់ក្នុងទុក្ខវេទនា យូរ​ទៅ Fusako Sano លែង​មាន​កម្លាំង​រត់គេចខ្លួន ហើយ​លែង​តតាំង​បន្តទៀត នាងជ្រើសយកការ​ស្តាប់​បង្គាប់។

ពេល​នាង​ទទួលបានការជួយសង្គ្រោះ នាងស្ទើរតែមិនអាចកម្រើកដៃជើង។ ដោយសារមិនបានត្រូវពន្លឺថ្ងៃយូរ​មក​ហើយ ស្បែក​របស់​នាង​ខ្សោយ គ្មានជីវិត។

ខណៈដែលរាងកាយជានារីអាយុ ១៩ ឆ្នាំ ប៉ុន្តែផ្លូវចិត្តរបស់នាងដូចជាកូនក្មេងម្នាក់។ ដើមឡើយ ឪពុកម្តាយរបស់ Fusako មើលមិនស្គាល់កូនស្រីទេ។

ម្តាយរបស់ Nobuyuki នៅជាន់ក្រោម ហើយហាក់ដូចជាមិនដឹងពីទង្វើឃុំឃាំងខុសច្បាប់របស់កូនប្រុសគាត់ទេ ព្រោះ​ជន​នេះ​ខឹង​យ៉ាង​ខ្លាំងពេលម្តាយចូលបន្ទប់របស់ខ្លួន។

Fusako Sano ត្រូវបានជួយសង្គ្រោះ ចំណែក Sato Nobuyuki ត្រូវបញ្ជូនទៅមន្ទីរពេទ្យ ដោយសារស្ថានភាពផ្លូវចិត្តមិន​នឹង​នរ។ ជននេះត្រូវកាត់ទោសឲ្យ​ជាប់គុក ១៥ ឆ្នាំ នាខែមករា ឆ្នាំ ២០០២ ។

គ្រូពេទ្យវិកលចរិតបានបញ្ជាក់ថា Nobuyuki Sato មានសុខភាពគ្រប់គ្រាន់ទទួលយកការចោទប្រកាន់។ ក្រោយ​មក​ជន​នេះ​បាន​សារ​ភាព​ទង្វើ​របស់ខ្លួន។

ថ្វីត្បិតតែ Fusako Sano រួចផុតពីកណ្តាប់ដៃរបស់ Nobuyuki Sato ប៉ុន្តែរបួសផ្លូវចិត្តដែល​នាង​បាន​រងទុក្ខ​ខណៈពេល​​ជាប់​ឃុំឃាំង​ ១០ ឆ្នាំពិបាកព្យាបាលណាស់។ នាងតែងតែសុបិន្តអាក្រក់ ចំណែកផ្លូវចិត្តមិននឹងនរ។

គ្មាននរណាដឹងថាក្មេងស្រីត្រូវអ្នកជិតខាងចាប់ខ្លួននោះទេ។

Hana