ហេតុ​អ្វីបានជាវត្តមានជនសង្គមងងឹត Yakuza សំខាន់សម្រាប់សង្គមជប៉ុនពីមុន

ជនជាតិ​ជប៉ុន​និយាយ​ស្តីស្រពិចស្រពិល ហើយ​ច្រើន​តែ​ត្រូវគេនិយាយថាមិន​ដឹង​គិតអ្វីក្នុងចិត្ត។

ហេតុអ្វីបានជាភាសាជប៉ុនស្រពិចស្រពិល ព្រោះនៅក្នុងវប្បធម៌ជប៉ុនក៏មានភាពមិនច្បាស់លាស់ជាច្រើនផង​ដែរ។

ឧទាហរណ៍ភាពមិនច្បាស់លាស់នេះអាចត្រូវបានវិភាគតាមរយៈវត្តមានរបស់ Yakuza ។

ក្នុងភាសាជប៉ុនមានឃ្លាមួយ 必要悪 (Hitsuyou-aku) ប្រែថា “អំពើអាក្រក់ចាំបាច់” ។

យើងធ្លាប់តែស្តាប់រឿងដែលបង្ហាញពីយុត្តិធម៌ កម្ចាត់អំពើអាក្រក់ ដូច្នេះហេតុអ្វីបានជា “អំពើអាក្រក់” សំខាន់? ចំពោះ​ប្រជាជន​ដែលស្វែងរកភាពមិនច្បាស់លាស់ដូចជាប្រទេសជប៉ុន គ្មានអ្វីអាចកំណត់ថា “ដាច់ខាត” នោះទេ។

ហើយក៏ជាប្រធានបទដែលតែងតែឃើញក្នុងកម្មវិធីទូរទស្សន៍កាលពីមុនផងដែរ។ ក្នុងចំណោមនោះមានដូចជា Nezumi Kozō ។ តួអង្គ​សំខាន់ក្នុងរឿងនេះជាចោរម្នាក់។

ទោះជាយ៉ាងណា ចោរម្នាក់នេះលួច​តែ​អ្នក​មាន និង​មនុស្ស​អាក្រក់​ប៉ុណ្ណោះ ហើយយកប្រាក់ទៅឲ្យអ្នកក្រ។

ចោរជាអំពើអាក្រក់ មិនអាចចាត់ទុកការលួចជាអំពើសុចរិតឡើយ។

ប៉ុន្តែចោរបែរជាមានមនុស្សជាច្រើនគោរពស្រលាញ់ ហើយតាំងពីពេលនោះ “អំពើអាក្រក់ចាំបាច់” ត្រូវបានបង្កើតឡើង។

កម្មវិធីមួយផ្សេងទៀតមានឈ្មោះថា Shigoto-nin ya Shikake-nin និយាយអំពីក្រុមឃាតករ។

ក្រុមឃាតករទទួលតួនាទីសម្លាប់មនុស្សអាក្រក់ ជាឧក្រិដ្ឋជនលាក់កំបាំងដែលប៉ូលីសមិនអាចប៉ះពាល់។

សម្លាប់មនុស្ស ទោះសម្លាប់អ្នកទោសក៏មិនអាចចាត់ទុក​ជា​អំពើ​ល្អ​ដែរ។ ទោះជាយ៉ាងនេះក្តី សង្គមនៅតែត្រូវការមនុស្សបែបនេះ ទើបគេហៅថា “អំពើអាក្រក់ចាំបាច់” ។

តាំងពីដើមរហូតមក​ដល់​ពេល​នេះគ្រាន់តែជារឿង​ផ្សាយ​លើ​កញ្ចក់​ទូរទស្សន៍​មែន​ទេ? ស្រដៀងគ្នាដែរ គឺថាវត្តមានរបស់ Yakuza ។

នៅសម័យនេះ Yakuza គឺជាក្រុមគ្រោះថ្នាក់ ប្រព្រឹត្តអំពើអាក្រក់ដូចជាជួញដូរគ្រឿងញៀន ប៉ុន្តែប្រភពដើមវត្តមានរបស់ Yakuza ចេញមកពីគំនិត “អំពើអាក្រក់ចាំបាច់” ។ តួនាទី​របស់​ពួកគេ​គឺ​ដោះស្រាយ​បញ្ហា​ដែល​ច្បាប់ និង​​ប៉ូលិស​​មិន​អាច​ដោះស្រាយ​បាន។ ប៉ុន្តែដោយសាររបៀបធ្វើរបស់ Yakuza មិន​ស្រប​ច្បាប់ ដូច្នេះមិនអាចហៅថា “យុត្តិធម៌” ឡើយ។

កាលខ្ញុំនៅក្មេង ពេលក្មេងៗស្រែកឡូឡានឹងត្រូវ Yakuza ក្នុងភូមិស្តីបន្ទោស ពិតជាគួរឲ្យ​ខ្លាចណាស់។ ប៉ុន្តែតាម​រយៈ​រឿង​នេះ​ក្មេងៗ​ដឹង​ថា បើ​ឡូ​ឡា​នឹង​ត្រូវ​ស្តី​បន្ទោស។

យូរទៅ Yakuza ចាប់ផ្តើមផ្លាស់ប្តូរបន្តិចម្តងៗ ហើយបានងាកចេញពីយុត្តិធម៌។ នៅទីបំផុតប៉ូលិសត្រូវចាត់វិធានការ​បំផ្លាញ​ក្រុមYakuza ។

ប្រសិនបើវត្តមានរបស់ពួកគេបង្ក​បញ្ហា​ដល់​មនុស្សជា​ច្រើន នោះ​វា​លែង​ជា “អំពើអាក្រក់ចាំបាច់” ទៀតហើយ។

យ៉ាង​ណា​មិញ ទោះ Yakuza កំពុងត្រូវប៉ូលិសបង្ក្រាប ចំណុចនេះមិនមែនមានន័យថា “អំពើអាក្រក់” នឹងឈប់នោះទេ។ នៅ​តែ​មានសកម្មភាពរបស់ Mafia បរទេស និង​ឧក្រិដ្ឋជនវ័យក្មេង។

យើងមិនរំពឹងលើ “អំពើអាក្រក់” ទេ ប៉ុន្តែបើក្រឡេកមើលលើស្ថានភាពបច្ចុប្បន្ន ហើយពេលដែលមិនអាចរក​បាន​យុត្តិធម៌ យើង​ប្រាកដ​ជា​ដឹង​ថា “អំពើអាក្រក់ចាំបាច់” សំខាន់។

Kengo Abe