រកឃើញសពនាង​មច្ឆាដែលគេរក្សាទុកមិនអោយរលួយនៅប្រាសាទជប៉ុន

តើអ្នកដឹងទេថា នៅប្រាសាទជប៉ុនមានរក្សាវត្ថុអាថ៌កំបាំងដែរទេ? ឧទាហរណ៍ដូចជាសពដែលគេរក្សាទុកមិនអោយ​រលួយ Kappa ប្រភេទបិសាច (yokai) រស់នៅក្បែរទន្លេ ចូលចិត្តលេងសើចនឹងកុមារ។ ហើយក៏អាចជាដៃរបស់​អារក្ស (Oni) ត្រូវកាត់ដាច់។

រួមទាំងសពនាង​មច្ឆាដែលគេរក្សាទុកមិនអោយរលួយ​ផង​ដែរ។

ទោះជាយ៉ាងណា វត្ថុ​ចម្លែក​ទាំង​នោះ​សុទ្ធ​តែ​ជា​ទ្រព្យ​សម្បត្តិ​របស់​ប្រាសាទ អ្នកវិទ្យាសាស្ត្រមិនអាចប៉ះពាល់បានទេ ដូច្នេះ​មិន​ដឹងថាវត្ថុទាំងនោះពិតឬមិនពិតឡើយ។

លើកនេះរឿងរ៉ាវសពនាង​មច្ឆាដែលគេរក្សាទុកមិនអោយរលួយបង្កការភ្ញាក់យ៉ាងខ្លាំង។

Enju-in ជាប្រាសាទមួយនៅ Okayama កំពុងរក្សាទុកសពនាង​មច្ឆាមានប្រវែងសរុបប្រហែល ៣០ សង់ទីម៉ែត្រ ដែលគេ​ជឿ​ថា​បន្សល់ទុកតាំងពីបុរាណ​កាល​មក។

ផ្នែករាងកាយខាងលើរួមមានដៃ និងមុខមាត់ជាមនុស្ស ប៉ុន្តែពាក់កណ្តាលខាងក្រោមគឺជាត្រី។

ប្រហែលពីឆ្នាំ ១៧៣៦ – ១៧៤១ សត្វដ៏ចម្លែកនេះជាប់សំណាញ់ទូកនេសាទ ហើយត្រូវយកទៅលក់នៅ Osaka ។ បន្ទាប់​មក​ត្រូវបានគ្រួសារមួយនៅ Hiroshima រក្សាទុកដោយប្រុងប្រយ័ត្ន ហើយនៅទីបំផុតយកទៅបរិច្ចាគអោយប្រាសាទ។

មនុស្សមួយចំនួនគិតថាសាកសពជាការរួមបញ្ចូលគ្នារវាងស្វា និងត្រី។

ទោះជាយ៉ាងណាទ្រព្យ​សម្បត្តិ​របស់​ប្រាសាទ​មិន​អាចយក​ទៅ​ធ្វើ​ការ​ស្រាវ​ជ្រាវ​បែប​វិទ្យាសាស្ត្របានទេ ដូច្នេះរហូតមក​ដល់​ពេល​នេះ រឿង​សាកសពដែលគេរក្សាទុកមិនអោយរលួយដូចជាញញើតណាស់។

ប៉ុន្តែហាក់បីដូចជាដល់ពេលលាតត្រដាងអាថ៌កំបាំង។

នាយកសមាគមប្រជាប្រិយ Okayama ដែលជំនាញក្នុងការស្រាវជ្រាវ Yokai និងទំនៀមទម្លាប់ប្រពៃណី បានបង្ហាញ​ចំណាប់​អារម្មណ៍​យ៉ាងខ្លាំងចំពោះ​សព​នាង​​មច្ឆា។ ប្រាសាទ​​ក៏បាន​អនុញ្ញាត​ឱ្យ​សាស្ត្រាចារ្យ​​ជំនាញ​ខាង​បុរាណវិទ្យា សាស្ត្រាចារ្យ​រង​ជំនាញ​ខាងរូបរាងត្រី និង​ពេទ្យសត្វបង្កើតក្រុមស្រាវជ្រាវ។

ប្រសិនបើសាកសពពិតជារួមបញ្ចូលគ្នារវាងស្វា និងត្រី ការធ្វើតេស្ត DNA អាចបង្ហាញពីអត្តសញ្ញាណពិតរបស់វា។

មិនថាពិតឬមិនពិត តើ​មនុស្ស​បុរាណ​គិតបែប​ណា ឬ​សង្ឃឹម​អ្វី​ពេល​បញ្ជូន​បន្ត​ទៅ​កូនចៅ? ឬអាចជាស្នាដៃរបស់​ជន​ឆបោក​ដែល​មានទេពកោសល្យម្នាក់ បានបោកបញ្ឆោតយើងរាប់រយឆ្នាំ។ ទោះ​ជា​យ៉ាង​ណា លទ្ធផលនៅតែគួរអោយ​ទន្ទឹង​រង់​ចាំ។

យោងទៅតាមដំណើរការ របាយការណ៍រំពឹងថាចេញនៅខែមីនា ហើយលទ្ធផលស្រាវជ្រាវនឹងប្រកាសនៅខែកញ្ញា។

Kengo Abe