ប៉ូលិស Osaka បានសុំទោស និងសារភាពចាប់មនុស្សច្រឡំក្រោយរយៈពេល ១០ ឆ្នាំ

ថ្ងៃពុធ 09/03/2022 | 14:11 ល្ងាច

នៅថ្ងៃទី ៤ ខែមីនា ប៉ូលិសខេត្ត Osaka បានសារភាពថាពួកគេចាប់ច្រឡំបុរសអាយុ ៣១ ឆ្នាំម្នាក់ ដោយឃុំខ្លួនគាត់ប្រហែល ១០ ខែមុនពេលត្រូវកាត់ទោសពីបទលួចប្រាក់ ១ ម៉ឺនយ៉េននៅកន្លែងគិតប្រាក់នៃហាងលក់ទំនិញកាលពីខែមិថុនា ឆ្នាំ ២០១២ ។

ប៉ូលិសខេត្តនិយាយថា ពួកគេបានសុំទោសបុរសដែលមិនបញ្ចេញឈ្មោះ។

បុរសរូបនោះត្រូវចាប់ខ្លួននៅខែសីហា ឆ្នាំ ២០១២ ពីបទសង្ស័យប្លន់ ហើយសាខា Kishiwada នៃការិយាល័យព្រះរាជអាជ្ញា Osaka បានចោទប្រកាន់គាត់ពីបទលួច។

កាមេរ៉ាសុវត្ថិភាពចាប់យកទិដ្ឋភាពមនុស្សម្នាក់បើកទ្វារដោយស្វ័យប្រវត្តិ ជិតទ្វារចេញចូលខណៈដែលជនសង្ស័យកំពុងរត់គេច ហើយស្នាមម្រាមដៃដែលបន្សល់ទុកលើទ្វារត្រូវបានយកធ្វើជាភស្តុតាង។

កាលពីខែកក្កដា ឆ្នាំ ២០១៤ សាខា Kishiwada នៃតុលាការសង្កាត់ Osaka កត់សម្គាល់ថាគាត់ទៅកាន់ហាង ៥ ថ្ងៃមុននោះ ហើយចង្អុលបង្ហាញថា “ប្រហែលស្នាមម្រាមដៃត្រូវបានបន្សល់ទុកនៅទីនោះមុនថ្ងៃកើតហេតុ” ។ ដូច្នោះតុលាការបានប្រកាសថាគាត់មិនមានទោស។

ការស៊ើបអង្កេតថ្មីនៅខែតុលា ឆ្នាំ ២០២១ បានប្រទះឃើញស្នាមម្រាមដៃលើថង់ប្លាស្ទិកមួយដែលរកបាននៅកន្លែងកើតហេតុ ដោយបង្ហាញថាមានបុរសម្នាក់ទៀតវ័យ ៣០ ឆ្នាំមានវត្តមាននៅទីនោះ។

បុរសទីពីរបានសារភាពថាខ្លួនពិតជាមានទាក់ទងនឹងហេតុការណ៍នេះមែន។ ប៉ូលិសខេត្តបានបញ្ជូនឯកសាររបស់គាត់ទៅព្រះរាជអាជ្ញានៅថ្ងៃទី ៤ ខែមីនា ប៉ុន្តែការកំណត់ ៧ ឆ្នាំលើសំណុំរឿងបានផុតកំណត់នៅឆ្នាំ ២០១៩ និងការិយាល័យព្រះរាជអាជ្ញាសង្កាត់ Osaka បានសម្រេចមិនកាត់ទោសគាត់នៅថ្ងៃទី ៤ ខែមីនាថ្ងៃដដែល។

Takashi Atsuta នាយកដ្ឋានព្រហ្មទណ្ឌនៃស្នងការដ្ឋាននគរបាលខេត្តបាននិយាយថា៖ “យើងផ្តោតលើស្នាមម្រាមដៃនៅលើទ្វារ ហើយមិនបានពិចារណាភស្តុតាងផ្សេងទៀត។ នេះជាចំណុចដែលត្រូវពិនិត្យអោយបានហ្មត់ចត់” ។

ទន្ទឹមនឹងនេះ Masaharu Ueno នៃការិយាល័យព្រះរាជអាជ្ញាសង្កាត់ Osaka បាននិយាយថា៖ “គួរឱ្យសោកស្ដាយដែលការពិនិត្យលើភស្តុតាងមិនគ្រប់គ្រាន់។ យើងនឹងពង្រឹងការស៊ើបអង្កេត និងសកម្មភាពកាត់ទោសនៅតែគោរពតាមច្បាប់មូលដ្ឋាន” ។

មេធាវី Masakazu Hirayama តំណាងឱ្យបុរសដែលចាត់ទុកថាគ្មានទោស រិះគន់ភ្នាក់ងារស៊ើបអង្កេត៖ “ប៉ូលិស និងព្រះរាជអាជ្ញាមិនបានវាយតម្លៃភស្តុតាងឱ្យបានត្រឹមត្រូវ ហើយឃុំខ្លួនបុរសនោះរយៈពេល ៣០០ ថ្ងៃ។ ពួកគេគួរតែសុំទោសអោយបានឆាប់”។

នៅពេលសម្ភាស បុរសវ័យ ៣១ ឆ្នាំរូបនេះបាននិយាយថា៖ “សមាជិកជាន់ខ្ពស់មួយចំនួនមកពីប៉ូលីសខេត្តបានសុំទោស ប៉ុន្តែខ្ញុំគិតថាមិនគ្រប់គ្រាន់ទេ។ ខ្ញុំចង់ឱ្យអ្នកស៊ើបអង្កេត និងព្រះរាជអាជ្ញាដែលចាត់ចែងការស៊ើបអង្កេតពេលនោះមកសុំទោសខ្ញុំដោយផ្ទាល់” ។