សាលារដ្ឋដំបូងគេនៅប្រទេសជប៉ុនបង្រៀនអំពីលំហអាកាស

វិទ្យាល័យមួយនៅទីក្រុង Kushimoto ខេត្ត Wakayama ជាសាលារដ្ឋដំបូងគេក្នុងប្រទេសជប៉ុនផ្តល់វគ្គសិក្សាលើការស្រាវ​ជ្រាវ​ផ្នែកអវកាស។

គោលបំណងវគ្គសិក្សាដើម្បីបណ្តុះទេពកោសល្យ ជាអ្នកដែលមានតួនាទីយ៉ាងសំខាន់ក្នុងឧស្សាហកម្មអវកាសនាពេល​អនាគត។

មន្ត្រី​ខេត្ត Wakayama បាននិយាយថា វគ្គសិក្សានៅវិទ្យាល័យ Kushimoto Koza ដែលគ្រប់គ្រងដោយខេត្តនឹងចាប់ផ្តើម​នា​ខែ​មេសា ឆ្នាំសិក្សា ២០២៤ ។ ជាពិសេសវគ្គសិក្សានឹងបើកសម្រាប់សិស្សទាំងអស់នៅទូទាំងប្រទេស​ជប៉ុន។

ការបង្ហាញឧបករណ៍បាញ់​គ្រាប់រ៉ុក្កែតដែលកំពុងសាងសង់នៅ Kushimoto ខេត្ត Wakayama

វគ្គបណ្តុះបណ្តាលអវកាសនៅ Kushimoto Koza នឹងត្រូវបានបង្កើតឡើងដូចជាផ្នែកមួយនៃវគ្គសិក្សាទូទៅ។

សាលាក៏កំពុងគ្រោងនឹងអញ្ជើញបុគ្គលិកមកពី Space One ដែលជាក្រុមហ៊ុនគ្រប់គ្រងកន្លែងបាញ់បង្ហោះរ៉ុក្កែត និងទីភ្នាក់ងាររុករកអវកាសជប៉ុន (JAXA) ធ្វើជាអ្នកណែនាំសិស្ស ទន្ទឹមនឹងការបង្រៀនអំពីប្រធានបទលំហ ក៏ដូច​ជា​ដំណើរ​ការរបស់រ៉ុក្កែត។

មុនពេលចាប់ផ្តើមវគ្គសិក្សា សាលានឹងផ្តល់ការបង្រៀនអំពីលំហដែលជាផ្នែកមួយនៃកម្មវិធី “ការស្រាវជ្រាវរួមបញ្ចូល​​គ្នា” ចាប់ពីឆ្នាំសិក្សា ២០២២ និងបន្ថែមមុខវិជ្ជាជ្រើសរើសដោយខ្លួនឯងសម្រាប់ឆ្នាំសិក្សា ២០២៣ ។

កម្មវិធីនេះក៏សង្ឃឹមថាសិស្សចូលរួមក្នុងព្រឹត្តិការណ៍ទាក់ទងនឹងលំហអាកាសដែលរៀបចំដោយរដ្ឋាភិបាលមូល​ដ្ឋាន។

អភិបាលក្រុង Wakayama លោក Yoshinobu Nisaka ថ្លែងក្នុងសន្និសីទសារព័ត៌មាន​នៅការិយាល័យខេត្តកាលពីថ្ងៃទី ១២ ខែមករា។ ក្នុងកិច្ចប្រជុំនោះលោកបានប្រកាសអំពីវគ្គសិក្សាលំហកម្រិត​វិទ្យាល័យ។

ទីក្រុង Kushimoto ជាតំបន់ឯកជនដំបូងគេនៅជប៉ុនសាងសង់កន្លែងបាញ់គ្រាប់រ៉ុក្កែតប្រភេទតូច។ ការ​​ដាក់​ឱ្យ​ដំណើរការ​ដំបូងគ្រោងធ្វើឡើងនាចុង​ឆ្នាំ​នេះ​។

ការសាងសង់កន្លែងបាញ់បង្ហោះមានឈ្មោះថា Space Port Kii ជិតរួចរាល់ ដែលរួមមានមជ្ឈមណ្ឌលគ្រប់គ្រងបេសកកម្ម​ហោះ​ហើរ ក៏ដូចជាកន្លែងបាញ់បង្ហោះ និងកន្លែងផ្សេងៗទៀត។

ក្រុមហ៊ុន Space One គ្រោងនឹងបាញ់បង្ហោះរ៉ុក្កែតដំបូងនៅចុងឆ្នាំ ២០២២ ក្រុមហ៊ុន​ក៏​មាន​បំណង​បាញ់​រ៉ុក្កែត​ចំនួន ២០ គ្រាប់​ក្នុង​មួយ​ឆ្នាំ គ្រាប់រ៉ុក្កែតនីមួយៗមានកម្ពស់ ១៨ ម៉ែត្រ និងអាចផ្ទុកផ្កាយរណបតូចមួយ។

រដ្ឋាភិបាលខេត្ត Wakayama រំពឹងថាទីក្រុង Kushimoto នឹងអភិវឌ្ឍទៅជាមជ្ឈមណ្ឌលនៃឧស្សាហកម្មអវកាសនាពេល​អនាគត។

ក្នុង​សន្និសីទ​សារព័ត៌មានលោក Yoshinobu Nisaka អភិបាលខេត្ត Wakayama បាននិយាយថា “យើងស្វាគមន៍សិស្សា​នុសិស្ស​ដែលមានចំណង់ចំណូលចិត្តលើលំហអាកាសទូទាំងប្រទេស យើងសង្ឃឹមថានឹងទាក់ទាញកុមារកាន់​តែ​ច្រើន​ចាប់អារម្មណ៍លើលំហ និងបច្ចេកវិទ្យាវិទ្យាសាស្ត្រទាក់ទងនឹងលំហ ក៏ដូចជាអភិវឌ្ឍចំណេះដឹងក្នុងផ្នែកទាំង​នេះ” ។

លោកបានសម្តែងក្តីសង្ឃឹមថាសាលា Kushimoto Koza នឹងបង្កើតកម្លាំងជម្រុញបង្វែរ Kushimoto ក្លាយជាមជ្ឈ​មណ្ឌល​ឧស្សាហកម្ម ជាកន្លែងដែលសិស្សអាចធ្វើការបន្ទាប់ពីប្អូនៗមានសមត្ថភាពគ្រប់គ្រាន់ផ្នែកដែលពួក​គេ​ជ្រើស​​រើស។

Japo Cambodia