សំណើ​ពង្រីក​ទម្រង់​កន្លែងជ្រោះទឹក​ក្តៅដែល​អនុញ្ញាត​ឱ្យ​បុរស និងស្ត្រី​ងូត​ទឹករួមគ្នាតែ​ត្រូវស្លៀក​​បំពាក់

នៅកន្លែងងូតទឹកក្ដៅដែលអនុញ្ញាតឱ្យបុរស និងស្ត្រីងូតទឹករួមគ្នា អនុវត្តទម្រង់ស្លៀកពាក់ឈុតងូតទឹក ដើម្បីកំណត់​ការមើលឃើញរាងកាយកំពុងត្រូវបានលើកឡើង។ ក្នុងរយៈពេលប៉ុន្មានឆ្នាំថ្មីៗ កន្លែងងូតទឹកចម្រុះត្រូវគេងាកចេញ​ដោយ​សារ​អាកប្បកិរិយា​មិន​ល្អ ចំនួនភ្ញៀវមានទំនោរថយចុះ។ អ្នក​គ្រប់​គ្រង​កន្លែង​​ទាំង​​នេះ​បាន​និយាយ​ថា​៖ “តាម​រយៈ​ការ​ស្លៀក​ពាក់ អ្នក​រាល់​គ្នាអាចកាត់​បន្ថយ​ភាពខ្មាសអៀន អារម្មណ៍មិន​ស្រួល​ រីករាយជាមួយនឹងវប្បធម៌​ងូត​ទឹក​រួម​គ្នា មិនបែងចែកភេទ ឬជំនាន់” ។

ជ្រោះទឹកក្តៅ Sukayu នៅទីក្រុង Aomori ស្ថិតនៅតំបន់ដែលមានព្រិលធ្លាក់ខ្លាំងបំផុតក្នុងប្រទេសជប៉ុន។ នៅថ្ងៃទី ២៦ ខែមករា បុរស ​និង​ស្ត្រី​គ្រប់​វ័យ​ងូត​ក្នុង​អាង​ទឹក​ចម្រុះ​មួយ​ដែល​មាន​ឈ្មោះ​ថា “Hiba Sennin Furo” ។ បុរសស្លៀកខោខ្លី ស្ត្រីស្លៀកអាវ និងខោខ្លី។ នារី​ម្នាក់​វ័យប្រហែល ២០ ឆ្នាំ​មក​​ពី​​ខេត្ត Chiba ញញឹមហើយ​និយាយ​ថា៖ “អ្នកមិនចាំបាច់បារម្ភពីក្រសែភ្នែក ហើយក៏មិនចាំបាច់បិទបាំងរាងកាយ។ គ្រាន់តែរីករាយដូច​ធម្មតា” ។

រូបភាព https://www.yomiuri.co.jp/pluralphoto/20220216-OYT1I50091/

នៅ Sukayu Onsen កាលពីមុនពេលព្រឹក និងពេលល្ងាច កន្លែងងូតទឹកសម្រាប់តែស្ត្រីប៉ុណ្ណោះ។ ទោះជាយ៉ាង​ណា ដោយសារតែគំនិត “មិន​បែង​ចែក​​ពេល​វេលា បង្កើតបរិយាកាសដែលមនុស្សគ្រប់គ្នាអាចរីករាយ” ។ អ្នកគ្រប់គ្រងបានចាប់ផ្តើមសាកល្បងវិធីសាស្រ្តងូតទឹកចម្រុះបុរស និងស្ត្រីដែលមានស្លៀកពាក់។ បច្ចុប្បន្នពួក​គេ​កំពុង​សម្លឹង​មើលចេញជាទម្រង់ពេញលេញនាពេលខាងមុខ ខណៈពេលដែលតាមដានការឆ្លើយតបរបស់អតិថិជន។

នៅឆ្នាំ ២០១៩ Jigoku Onsen Seifuso នៅភូមិ Minamiaso ខេត្ត Kumamoto ដាក់ចេញបទបញ្ជាឱ្យស្លៀកពាក់​នៅ​ពេល​ចូលងូតទឹករួមគ្នាបុរស និងស្ត្រី។ អ្នកគ្រប់គ្រង Kenji Kawazu អាយុ ៥៨ ឆ្នាំបាននិយាយ​ថា “ដោយហេតុនេះយើងបានធ្វើឱ្យយុវជនជាច្រើន ក៏ដូចជាអ្នកដែលខ្លាចងូតទឹករួមគ្នាបុរស និងស្ត្រី កាន់តែមានអារម្មណ៍ស្រួលខ្លួន” ។

នេះបើតាម Kyoko Kitade ដែលជា “អ្នកជំនាញ Onsen” បំផុសភាពទាក់ទាញនៃជ្រោះទឹកក្តៅតាមរយៈការបង្រៀន និងអត្ថបទ កន្លែងងូតទឹកចម្រុះមានប្រមាណ ១២០០ កន្លែងនៅទូទាំងប្រទេសក្នុងឆ្នាំ ១៩៩៣ ប៉ុន្តែរហូត​ដល់​ឆ្នាំ ២០២១ នៅសល់តែ ៥០០ កន្លែងប៉ុណ្ណោះ។ លោក Kitade បាននិយាយថា “ទន្ទឹមនឹងរឿងយុវជនជំនាន់​ក្រោយមិនព្រមងូតទឹកអាក្រាត ក៏មានករណីគ្មានសីលធម៌ដូចបុរសសម្លឹងមើលរាងកាយរបស់ស្ត្រី ដែលជាមូល​ហេតុ​កន្លែងងូតទឹករួមត្រូវគេជៀសវាង” ។

ផ្ទុយទៅវិញកន្លែងខ្លះឱ្យតម្លៃលើការងូតទឹកអាក្រាតកាយ ភ្ញៀវជាច្រើនគិតថា “ស្លៀក​ឈុត​ងូត​ទឹក​លែង​ជា​ស្ទីល Onsen ទៀត​ហើយ” ។ ក្នុងឆ្នាំ ២០១៦ នៅ Yubara Onsen Sandyu ទីក្រុង Maniwa ខេត្ត Okayama ផ្លាកសញ្ញា​ដែលសរសេរថា “បាំងផ្នែកខាងក្រោម” ត្រូវបានដាក់ឡើងនៅបន្ទប់ប្តូរសម្លៀកបំពាក់ ដើម្បីលើកទឹកចិត្តអតិថិជន​​ប្រុសឱ្យរុំកន្សែង ហើយស្លៀកឈុតហែលទឹក។ ទោះជាយ៉ាង​ណា​នៅតែមានអតិថិជនមួយចំនួនចូលងូតទឹក​​មិន​​ស្លៀក​​ពាក់​អ្វី​ឡើយ ពួក​គេ​និយាយ​ថា “ខ្ញុំចង់អាក្រាតកាយ” ។

ដូចដែល Aya Uchida សាស្ត្រាចារ្យរងនៅសកលវិទ្យាល័យ Toyo ជំនាញផ្នែកទេសចរណ៍បានចង្អុលបង្ហាញថា “អ្វីដែលសំខាន់ត្រូវគិតធ្វើយ៉ាងណាថែរក្សាវប្បធម៌ងូតទឹករួមសម្រាប់តំបន់ និងកន្លែងនីមួយៗ” ។ Michio Ishikawa ប្រធាន​សមាគម​តំបន់​ទឹក​ក្តៅ​នៃ​ប្រទេស​ជប៉ុន​បាននិយាយថា “ដើម្បីឱ្យកន្លែងជ្រោះទឹកក្តៅអាចបំពេញតម្រូវ​ការ​ចម្រុះ​នា​ពេល​សព្វថ្ងៃនេះ ដូចជាមិនបែងចែកភេទ ការដាក់ចេញកន្លែងងូតទឹកក្តៅដែលស្លៀកពាក់ក៏​ជា​អនុសាសន៍​​មួយ​​ដែរ” ។

Sacchan