អ្នកគាំទ្រ Ghibli បង្កើតកំណត់ត្រាហ្គីណេសដោយប្រមូលវត្ថុជាច្រើន

ក្នុងនាមជាអ្នកគាំទ្រ Ghibli អ្នករាល់គ្នាប្រាកដជាព្យាយាមប្រមូល Goods (ទំនិញដែលទាក់ទងនឹងស្នាដៃ តួអង្គមកពី Ghibli) ប៉ុន្តែការប្រមូលរហូតឈានដល់ការសម្រេចបានកំណត់ត្រាហ្គីណេសពិតជាគួរអោយសរសើរ។

កំណត់ត្រាហ្គីណេសមិនដែលធ្វើឱ្យយើងខកចិត្តនោះទេ ដោយបង្កើតប្រភេទដែលមិននឹកស្មានដល់ ហើយអ្នកគាំទ្រ Ghibli ក៏មិនធ្វើឱ្យ Studio ខកបំណងដែរ នៅពេលដែលពួកគេទទួលបានកំណត់ត្រាពិភពលោក ជា​មួយ​នឹងកិត្តិយស “ការប្រមូលវត្ថុអនុស្សាវរីយ៍របស់ Ghibli” ច្រើនបំផុតជាមួយនឹងចំនួន ១៣០៤ វត្ថុ។

រូបភាព https://www.guinnessworldrecords.jp/news/2022/2/its-my-life-worlds-largest-studio-ghibli-collection-confirmed-692170?fbclid=IwAR3H_TdrY97q0EttAR6DXvistR5EA9e-tJZgnTFBtEB6IhTt7WftHtMsQSQ

អ្នកឈ្នះរង្វាន់នេះគឺ Eloïse Jéglot ដែលជាអ្នកផាត់មុខ និងតារាម៉ូដែលសាក់រូប រស់នៅប្រទេសបារាំង។ កំណត់ត្រាហ្គីណេសបានប្រគល់រង្វាន់ជូន Jéglot នៅទីក្រុងប៉ារីស កាលពីថ្ងៃទី ៧ ខែតុលាឆ្នាំមុន ប៉ុន្តែរហូតមកដល់ពេល​នេះ​ទើបយើងអាចមើលឃើញការប្រមូល Goods របស់នាង ក្នុងវីដេអូដែលបង្ហោះដោយ Guinness World Records YouTube channel នៅថ្ងៃទី ១៧ ខែកុម្ភៈ។

Jéglot មានបន្ទប់ដោយឡែកសម្រាប់តាំង Goods ទាំងនេះ ក្នុងចំណោមនោះមានវត្ថុចំនួន ១០ ដែលមានអត្តន័យ​ពិសេសចំពោះនាងគឺ Figure របស់ Jiji ឆ្មាខ្មៅក្នុងរឿង “Kiki’s Delivery Service” ព្រោះវាបានរំលឹក Jéglot ឆ្មាដែលបានងាប់របស់នាង។ វត្ថុមួយផ្សេងទៀតគឺចង្កៀងខួបលើកទី ២០ រឿង “Spirited Away” (សព្វថ្ងៃអស់ពីស្តុក)។ Jéglot បាន​និយាយ​ថា “ទាំងនេះជាវត្ថុមានតម្លៃ” ។

តាំងពីពេលទទួលបានរង្វាន់កំណត់ត្រាហ្គីណេសរហូតមកដល់បច្ចុប្បន្ន ចំនួនវត្ថុដែល Jéglot ប្រមូលបានឡើងដល់ ១៤៩៦ មុខ ហើយទំនងនឹងច្រើនឡើងនាពេលអនាគត។ ក្នុងនាមជាអ្នកគាំទ្រ Ghibli នាងនិយាយថាការប្រមូល Goods “ជា​ចំណង់​ចំណូល​ចិត្ត ជាជីវិត” ។

សួនកម្សាន្តថ្មីរបស់ Ghibli នឹងបើកទ្វារនៅប្រទេសជប៉ុនក្នុងឆ្នាំនេះ ប្រហែលជា Jéglot កំពុងទន្ទឹងរង់ចាំស្វាគមន៍​​សមាជិក​​ថ្មីចូលរួមក្រុមគ្រួសារ​របស់នាង។

Sacchan