រូបសំណាកព្រះម៉ែ Guanyin ដែលមានប្រវត្តិ ៤០ ឆ្នាំត្រូវរុះរើ

កោះ Awaji ស្ថិតនៅខេត្ត Hyogo ។

យន្តហោះជាច្រើនដែលចេញដំណើរពីអាកាសយានដ្ឋានអន្តរជាតិ Kansai នឹងហោះកាត់កោះនេះ។ ប្រសិនបើអ្នកអង្គុយលើយន្តហោះបែបនេះ អ្នកនឹងអាចមើល​ឃើញ​រូប​សំណាកដ៏​អស្ចារ្យ​របស់ព្រះម៉ែ Guanyin នៅលើទីខ្ពស់។

ជាមួយនឹងកម្ពស់សរុបជាង ១០០ ម៉ែត្រ រូបសំណាកព្រះម៉ែ Guanyin ខ្ពស់ជាងកម្ពស់រូបសំណាកសេរីភាពនៅទីក្រុង NewYork ហើយបានក្លាយជាប្រធានបទដ៏ក្តៅគគុកជុំវិញពិភពលោកខណៈពេលសាងសង់។ ដោយគួរឱ្យភ្ញាក់ផ្អើល ម្ចាស់​គម្រោង​រូបសំណាកព្រះម៉ែ Guanyin នេះជាមនុស្សធម្មតាម្នាក់។ ស្រុកកំណើតរបស់ម្នាក់នេះនៅកោះ Awaji គាត់​​ប្រកប​​អាជីវកម្ម​អចលនទ្រព្យ ហើយប្រើថវិកា​ផ្ទាល់ខ្លួន​ដើម្បី​សាងសង់​រូបសំណាកនេះ​ក្នុង​ឆ្នាំ ១៩៨២ ។

រូបសំណាកនេះត្រូវបានសាងសង់ឡើងដើម្បីបួងសួងសុំសន្តិភាពពិភពលោក ក៏ដូចជាកប៉ាល់ដែលចេញដំណើរ​ពី​ឈូង​សមុទ្រ Osaka ផុតគ្រោះថ្នាក់។ នៅខាងក្នុងរូបសំណាកជាកន្លែងសង្កេតការណ៍ អ្នកអាចឡើងទៅដល់ករូបសំណាកដោយ​ជណ្តើរ​យន្ត។ ក្រៅពីនេះផ្នែកជើង​ទម្រ​រូប​សំណាក​មាន​ភោជនីយដ្ឋាន និង​សារមន្ទីរ​សិល្បៈ។ នៅថ្ងៃបុណ្យជាតិកន្លែង​នេះ​ទទួល​ភ្ញៀវមកទស្សនាជាង ៤០០០ នាក់។

ក្រោយ​មក​ទាំង​ម្ចាស់​ និង​អ្នក​ស្នង​មរតកសុទ្ធតែទទួល​មរណ​ភាព គម្រោងទាំងមូលត្រូវបោះបង់ចោល ​ក្លាយ​ទៅ​ជាកន្លែង​​បាក់​​បែក។ នៅទីនេះមានករណីធ្វើអត្តឃាតលោតពីលើកន្លែងសង្កេតការណ៍ចុះមកក្រោម។

ជាងនេះទៅទៀត ស្រទាប់ខាងក្រៅរូបសំណាករបកចេញដោយសារតែសំណង់កាន់តែយ៉ាប់យ៉ឺន ហើយប្រជាជន​ចាប់​​ផ្ដើម​​ភ័យ​ស្លន់ស្លោ​ចំពោះ​ការ​បាក់​រលំ​របស់​រូបសំណាក​មិន​យូរ​មិន​ឆាប់។

នៅទីបំផុត​ការ​រុះរើ​រូបសំណាក​នេះ​ត្រូវ​បាន​សម្រេច ជាមួយនឹងប្រាក់ពន្ធ ៨០០ លានយ៉េនរបស់ប្រជាជន។

មើលទៅដូចរូបសំណាកកំពុងដណ្តប់ភួយដ៏ធំ។

រូបសំណាកព្រះម៉ែ Guanyin ត្រូវបានសាងសង់ឡើងដើម្បីបួងសួងសុំសន្តិភាពពិភពលោក ប៉ុន្តែក្រោយរយៈពេល ៤០ ឆ្នាំ ទេវតាក៏ត្រូវកោះហៅត្រឡប់​ទៅ​ឋាន​សួគ៌​វិញ។ សង្ឃឹមថាព្រះម៉ែ Guanyin នៅតែបន្តឃ្លាំមើលមនុស្សជាតិពី​លើ​ទី​ខ្ពស់។

Kengo Abe