គំនិតចាស់គំរិលរបស់មនុស្សមួយចំនួនដែលចាប់កំហុសរបៀបស្លៀក Kimono

សម្លៀកបំពាក់បែបប្រពៃណីជប៉ុនគឺ Kimono ដែលរចនាឡើងយ៉ាងស្រស់ស្អាត និងពិសេសពីគេ ហើយល្បីលើ​ឆាក​អន្តរ​ជាតិ​ផង​ដែរ។ យ៉ាង​ណា​មិញ Kimono ស្លៀកក្នុងព្រឹត្តិការណ៍សំខាន់ៗដូចជា​ពិធីពេញវ័យ ឬ​រៀបមង្គលការ។

កាលពីមុនប្រជាជនជប៉ុនស្លៀក Kimono ដូចជាសម្លៀកបំពាក់ប្រចាំថ្ងៃ ប៉ុន្តែចាប់តាំងពីពេលនាំចូលសម្លៀកបំពាក់​លោក​ខាង​លិច រចនាប័ទ្មរបស់ប្រជាជនជប៉ុនក៏ផ្លាស់ប្តូរបន្តិចម្តងៗ។

ទោះជាយ៉ាងណា មានមូលហេតុមួយឆ្ពោះទៅរកបាតុភូត “ប៉ូលិស Kimono” ។

“ប៉ូលិស Kimono” សំដៅទៅលើអ្នកមីងដែលរំខានចូលចិត្តចាប់កំហុសអ្នកស្លៀក Kimono ។ សរុបទៅពួកគាត់ជាអ្នកស្រលាញ់សម្លៀកបំពាក់បែបប្រពៃណីជប៉ុន មានចំណេះដឹងស៊ីជម្រៅអំពី Kimono ប៉ុន្តែពួកគាត់បង្កើត​រនាំងធ្វើឲ្យ​វប្បធម៌ Kimono ធ្លាក់ចុះ។

តើ “ប៉ូលិស Kimono” នេះបាន​ធ្វើ​អ្វីខ្លះ?

និយាយ…និយាយ… ហើយនិយាយ…

យុវវ័យ​ដែល​មិនធ្លាប់ ឬមិន​អាច​ស្លៀក Kimono ដោយ​ខ្លួន​ឯង​បាន​។ នៅជប៉ុនមានសេវាកម្មមួយឈ្មោះថា Kitsuke ប្រែថាជំនួយស្លៀក Kimono ។ សូម្បីតែសាកសួរសេវាកម្មក៏យុវវ័យទាំងនេះ​មិន​អាច​ប្រាកដ​ថាស្លៀក Kimono តាមស្តង់ដារ​ដែរ។

ទាំងការចង Obi (ខ្សែក្រវ៉ាត់ចង្កេះ Kimono) មានច្រើនរបៀប ដូច្នេះអាចចងតាមការច្នៃប្រឌិត។

ទោះជាយ៉ាងនេះក្តី “ប៉ូលិស Kimono” គ្រាន់តែមើលឃើញចំណុចមិនត្រូវនឹងនិយាយថា៖

“ណ៎ែក្មួយ របៀបស្លៀក Kimono របស់ក្មួយរាងចម្លែកបន្តិច” ឬ “ក្មេងៗសម័យនេះពិតជាមិនដឹងពីរបៀបស្លៀក Kimono ទេ” ។

“ប៉ូលិស Kimono” មួយចំនួនរហូតដល់ថ្នាក់អូសអ្នកចូលបន្ទប់ទឹក ហើយស្រាយ Obi របស់អ្នកចេញ។ ទោះដឹងថាគាត់គ្រាន់តែចង់ជួយចង Obi ប៉ុន្តែមកពីណាអ្នកមីងម្នាក់ដែលមិនស្គាល់ សុំដោះ Obi របស់អ្នក ចម្លែកណាស់មែនទេ?

អ្នកខ្លះថែមទាំងស្ទាបគូទអ្នកដទៃទៀត…

មាន​មនុស្ស​ម្នាក់​ស្លៀក Kimono ដើរលេងក្នុងហាងទំនិញ ស្រាប់តែមានអ្នកមីងម្នាក់មកនិយាយថា “Obi មើលទៅចម្លែកបន្តិច” ហើយស្ទាបគូទ។ ប្រហែលគាត់គ្រាន់តែចង់កែ Obi ប៉ុណ្ណោះ ប៉ុន្តែស្រាប់តែមានអ្នក​មក​ប៉ះកន្លែងសំខាន់ មនុស្សគ្រប់គ្នាប្រាកដជាមានអារម្មណ៍មិនស្រួល។

ខ្ញុំយល់ ព្រោះតែស្រលាញ់ Kimono ទើបពួកគាត់ធ្វើបែបនេះ ប៉ុន្តែ Kimono ទោះបីជាសម្លៀកបំពាក់​​​ប្រពៃណី ក៏មានការប្រែប្រួលទៅតាមសម័យកាលដែរ។ កាលពីមុន Kimono មិនស្អាតដូចសព្វថ្ងៃទេ ទាំងសាច់ក្រណាត់ និងរបៀបស្លៀក រួមទាំងរបៀបចង Obi ក៏ផ្លាស់ប្តូរច្រើនដែរ។ នៅពេលដែលរបៀបរស់នៅផ្លាស់ប្តូរ រចនាប័ទ្មក៏ត្រូវតែផ្លាស់ប្តូរផងដែរ។

ខ្ញុំយល់ស្របទាំងស្រុងជាមួយនឹងគំនិត “ច្នៃប្រឌិត” Kimono ក៏ដូចជាការផ្លាស់ប្តូររបៀបស្លៀក Kimono យ៉ាង​ណា​ឲ្យសម​នឹង​សម័យ​កាល។ ជាការពិតណាស់ អ្នកដែលចង់រក្សារចនាប័ទ្មបុរាណក៏មានហេតុផលរបស់ពួកគេដែរ។ ហើយ​អ្នក​ដែល​ចង់​បង្កើត​វប្បធម៌ថ្មីគ្រាន់តែចង់ឲ្យប្រសើរឡើង។

ដោយទទួលយកការផ្លាស់ប្តូរថ្មី ប៉ុន្តែយល់ពីតម្លៃប្រពៃណី នោះហើយជាវិធីថែរក្សាវប្បធម៌។ ការ​បង្ខំតែ​ម្ខាងក៏ជា​ទង្វើ​​​បំផ្លាញ​​​វប្បធម៌​ Kimono ដែរ។ សង្ឃឹមថា “ប៉ូលិស Kimono” អាចយល់ពីរឿងនេះ។

Abe Kengo