រឿងអ្នកទោសប្រហារជីវិត និង​សោកនាដកម្ម​កើត​ឡើង​ចំពោះ​ក្រុម​គ្រួសារ

មិនថានៅប្រទេសណាក៏ដោយ ប្រព្រឹត្តខុសត្រូវទទួលទោស។

ថ្វីត្បិតតែមានភាពមិនស្របគ្នាចំពោះការផ្តន្ទាទោសឧក្រិដ្ឋជនណាមួយធ្ងន់ពេក ឬស្រាលពេក ខ្ញុំគិតថាមនុស្ស​តិច​ណាស់ដែលជំទាស់នឹងការដាក់ទោសឧក្រិដ្ឋជន។ ចុះករណីមនុស្សម្នាក់ត្រូវមូលបង្កាច់វិញ?

​ហើយបើទោះជាបាន​ប្រព្រឹត្ត​បទ​ល្មើស តើ​អ្នក​គិត​យ៉ាង​ណា​​ចំពោះ​គ្រួសារ​របស់​ពួក​គេត្រូវសង្គម​ដាក់ទោស​?

មុន​នឹង​ឆ្លើយ​សំណួរ​ សូម​អាន​រឿង​ខាង​ក្រោម​នេះ។

រឿងនេះក៏ទើបតែកើតឡើងដែរ កាលពីខែមិថុនា ឆ្នាំ ២០២១ ។

នៅអាកាសយានដ្ឋានអន្តរជាតិ Kansai នៅ Osaka ស្រ្តីអាយុ ៣៧ ឆ្នាំម្នាក់ឳបក្មេងស្រីអាយុ ៤ ឆ្នាំ លោតពីលើស្ពាន Sky Gate Bridge R ធ្វើអត្តឃាត។

ស្ត្រី​នោះ​ជា​កូន​ស្រី​របស់​អ្នក​ទោសប្រហារជីវិត Hayashi Masumi ចំណែកក្មេងស្រីជាកូនរបស់នាង។

នៅមុនពេលកើតហេតុ នាយកដ្ឋានពន្លត់អគ្គីភ័យទទួលបានរបាយការណ៍ពីស្ត្រីអាយុ ៣៧ ឆ្នាំ (នៅជប៉ុនការផ្តល់​រថយន្ត​សង្គ្រោះបន្ទាន់ស្ថិតក្រោមសមត្ថកិច្ចរបស់នាយកដ្ឋានពន្លត់អគ្គីភ័យ) ។ មូលហេតុមកពីកូនស្រីច្បងបាត់​បង់​ស្មារតី ពេល​រថយន្ត​ពន្លត់​អគ្គិភ័យ​ទៅ​ដល់​កន្លែង​កើតហេតុ​បាន​បញ្ជាក់​ថា កូនស្រី​អាយុ​ ១៦ ​ឆ្នាំ​ស្លាប់​បាត់​ទៅ​ហើយ។ មូលហេតុ​ស្លាប់ដោយសាររងរបួសធ្ងន់ ទំនងជានាងត្រូវគេធ្វើបាបរាងកាយរាល់ថ្ងៃ។ ប៉ុន្តែភាគីប្រើអំពើហិង្សា​ជា​ក្រុម​គ្រួសារ ឬ​ជា​សាលា​មិន​ទាន់​ដឹង​ច្បាស់ទេ។​

ឥឡូវនេះងាកមកមើលរឿង​អ្នក​ទោសប្រហារជីវិត Masumi Hayashi (ម្តាយ​របស់​តួអង្គខាងលើ)។

នៅឆ្នាំ ១៩៩៨ ក្នុងព្រឹត្តិការណ៍សមាគមសង្កាត់ ជនរងគ្រោះ ៤ នាក់ រួមមានសិស្សបឋមសិក្សា និងសិស្សវិទ្យាល័យស្លាប់​​ដោយ​សារ​បរិភោគការីដែល​មាន​ជាតិពុល។ រហូតដល់ឆ្នាំ ២០១៩ តុលាការកំពូលកំណត់ទោសប្រហារជីវិតចំពោះ Masumi Hayashi ដែលចាត់ទុកជាមេក្លោង។ នៅពេល​នោះអ្នក​ទោស​ត្រូវ​​ឃុំ​ខ្លួន​នៅ​មណ្ឌល​ឃុំឃាំង Osaka ។

Masumi Hayashi មានកូនបួននាក់។ អ្នកដែលឱបកូនធ្វើអត្តឃាតជាកូនច្បង នៅពេលដែលករណីរបស់ម្តាយនាងបានកើតឡើង នាង​គ្រាន់​តែ​ជា​សិស្ស​វិទ្យាល័យ​ម្នាក់។ ករណីនេះគឺជានរកនៃគ្រួសារមួយ។

កូន​ស្រី​ច្បង​សួរ​ម្តាយ​ដែល​ត្រូវ​ឃុំ​ខ្លួន​ក្នុង​មន្ទីរ​ឃុំឃាំង Osaka ថា៖

“តើម៉ែ​ពិត​ជា​បាន​ធ្វើ​ដូច្នេះ​មែន​ទេ? សូមប្រាប់អោយកូនដឹងការពិត” ។

នៅចំពោះមុខកូនដែលមិនអាចទប់ចិត្តបាន Masumi Hayashi ឆ្លើយថា “ម៉ែមិនបានធ្វើដូច្នេះទេ” ។

ទោះបីជានាងបន្តរៀនវិទ្យាល័យក៏ពិតមែន ប៉ុន្តែក្រោយពេល ១ ឆ្នាំនាងឈប់រៀន ហើយទៅធ្វើការនៅ Osaka ។ ដោយ​គ្មាន​សាច់​ញាតិពឹង​ផ្អែក ប្រហែលមួយសប្តាហ៍នាងក្លាយជាមនុស្សគ្មានផ្ទះសម្បែង។ ក្រុមហ៊ុន និង​ហាង​ក្រៅ​ម៉ោង​ដឹង​រឿងនេះក៏បានបណ្តេញនាង ហើយរឿងនេះបន្តកើតឡើងម្តងហើយម្តងទៀតមិនចេះចប់។

កូនទាំង ៤ នាក់ក្នុងគ្រួសារជឿថា ម្តាយរបស់គេគ្មានកំហុស ទោះជាយ៉ាងណា ការដែលម្តាយរបស់ពួកគេ (នៅពេលនោះ) ស្ថិតក្រោមការកាត់ទោសប្រហារជីវិត ក្នុងក្រសែភ្នែកសង្គមច្បាស់ណាស់ទៅហើយ។ ក្នុង​នាម​ជា​ពាណិជ្ជករ ក៏​មិន​អាច​បន្ទោស​អាជីវកម្ម​មិន​ព្រម​ជួល​កូន​អ្នកទោសដែរ។

ទោះ​បី​ជា​សង្គមទាំងមូលមិនអើពើ កូនស្រីច្បងនៅតែស៊ូទ្រាំរស់នៅ។ ថ្វីត្បិតតែជួបទុក្ខលំបាក នាងនៅតែអាចរកបានដៃគូជីវិត ថែមទាំងនាំកូនរបស់ខ្លួន (ចៅរបស់ Masumi Hayashi) ទៅសួរសុខទុក្ខយាយ។ កូន​ស្រី​តែង​​ជឿ​​ថា​​ ម្ដាយ​​គ្មាន​កំហុស ហើយ​តាំង​ចិត្ត​តស៊ូ​ដល់​ទី​បញ្ចប់។

ទោះ​ជា​យ៉ាង​ណា តុលាការ​កំពូល​បាន​សម្រេច​ដាក់​ទោស​ប្រហារ​ជីវិត។ លុះត្រាតែមានករណីពិសេស បើមិនដូច្នេះ​សាល​​ក្រម​មិន​អាច​លុបចោលបានទេ

ចាប់​ពីពេលកាត់​សេចក្តី​មក កូន​ស្រី​មិនបានបង្ហាញ​ខ្លួន​ក្នុងការប្រជុំអ្នកគាំទ្រម្តង​ណា​ឡើយ។ ហើយលទ្ធផលរបស់នាង​ដូចដែលបានឃើញនៅដើមអត្តបទ។

Masumi Hayashi តែងតែបដិសេធកំហុសរបស់ខ្លួន។ ប៉ុន្តែទោះជាយ៉ាងនេះក្តី ភស្តុតាងដោយប្រយោល (ភស្តុតាងផ្អែកលើការប៉ាន់ស្មាន ឧទាហរណ៍ស្នាមម្រាមដៃ ផ្ទុយនឹងភស្តុតាងផ្ទាល់បញ្ជាក់ពីការពិត ដែលមិនចាំបាច់សន្និដ្ឋាន ឬភស្តុតាងផ្សេងទៀតទេ) សុទ្ធតែប្រឆាំង​​នឹង​​គាត់ ហើយឈានដល់ការកាត់ទោសប្រហារជីវិត។

សាលក្រម​ត្រូវ​បានធ្វើ​ឡើង ប៉ុន្តែ Masumi Hayashi ពិត​ជា​មេក្លោងមែនឬ ហើយ​តើគាត់គួរ​ទទួល​ទោស​ប្រហារ​ជីវិតដែរទេ?

ជាងនេះទៅទៀត មិនថាអ្នកគិតយ៉ាងណានោះទេ សមាជិកគ្រួសាររបស់ Masumi Hayashi មិនបានប្រព្រឹត្តខុសអ្វីឡើយ។ ដូច្នេះ តើ​ត្រឹមត្រូវ​ទេ​ដែល​ពួកគេ​ត្រូវ​រស់នៅ​យ៉ាង​វេទនា ហើយ​រង​​ទុក្ខ​បែបនេះ​?

អ្នកដែលកំពុងទទួលទោសប្រហារជីវិតទទួលបានដំណឹង​កូនស្រី​ធ្វើ​អត្តឃាត​ នឹងមានអារម្មណ៍បែបណា? នៅ​ពេល​នោះ​កំហុស​ស្ថិត​នៅ​លើប្រព័ន្ធ​ច្បាប់ ឬ​ប្រព័ន្ធ​ផ្សព្វផ្សាយ?

ចម្លើយ​មិន​ងាយនោះទេ ប៉ុន្តែចូរសួរខ្លួនឯង តើអ្នកមានអារម្មណ៍យ៉ាងណាពេល​អាន​ព័ត៌មានបែបនេះ?

Kengo Abe

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: