សាលាបឋមសិក្សាជប៉ុនប្រើគំនូររបស់សិស្សធ្វើ Sticker ប្រឆាំងនឹងបញ្ហាសម្លុតធ្វើបាប

សមាគមមាតាបិតា និងគ្រូបង្រៀន (PTA) នៅសាលាបឋមសិក្សាមួយក្នុងទីក្រុងភាគខាងកើតប្រទេសជប៉ុន បាន​បង្កើត Sticker លើ​កម្មវិធី​ផ្ញើសារ Line ដែលមានប្រធានបទប្រឆាំងការគំរាមកំហែង។

Sticker ទាំងនេះត្រូវបានបង្កើតពីគំនូររបស់សិស្សសាលា​បឋមសិក្សាទីក្រុង Yokohama Yamauchi សង្កាត់ Aoba ។ អក្សរលើក​ទឹក​ចិត្ត​ដែលប្អូនៗគិតឃើញក៏​ត្រូវ​បាន​បញ្ចូលក្បែរគំនូរផងដែរ។

នាយកសាលា Seijun Sato បាននិយាយថា “ខ្ញុំសង្ឃឹមថាអ្នកដែលប្រើ Sticker នឹងមានអារម្មណ៍កក់ក្តៅ” ។

Sticker មួយចំនួននៃកម្មវិធីផ្ញើសារឥតគិតថ្លៃ Line ត្រូវបានបង្កើតឡើងដោយផ្អែកលើរូបភាពសិស្សសាលាបឋមសិក្សា Yamauchi ។

(រូបភាពនេះបានមកពី dokukinoko)

គំរូ Sticker មានចំនួន ១៧៨ រួមជាមួយនឹងខ្លឹមសារ “អរគុណ” “អ្នកធ្វើបានល្អណាស់” “ខ្ញុំតែងតែនៅក្បែរអ្នក” ជា​ដើម។ ជាមួយនឹងតួអង្គ mascot របស់សាលា Keyaleaf ត្រូវបានបង្កើតឡើងដោយផ្អែកលើរូបភាពស្លឹកឈើ Zelkova ជប៉ុន។

Sticker ត្រូវបានបង្កើតឡើងក្រោមចំណែករបស់វិចិត្រការិនី Dokukinoko ។ វិចិត្រការិនី​រូប​នេះ​ក៏មាន​កូន​ស្រី​ម្នាក់​កំពុង​រៀន​បឋម​សិក្សា​ផង​ដែរ។ នាងបានបង្កើត Sticker ដោយផ្អែកលើ Keyaleaf ជាមួយ PTA ក្នុងឆ្នាំ ២០១៩ ហើយចាប់ផ្តើមគម្រោងមួយផ្សេងទៀតនៅឆ្នាំ ២០២០ ដើម្បីបង្កើត Sticker ដោយផ្អែកលើគំនូររបស់សិស្ស។ គម្រោង​​នេះ​​ទទួល​បាន​គំនូរ​ពី​សិស្ស​ប្រមាណ​ ១០០ ​នាក់។

Dokukinoko យកឈ្នះរង្វាន់ខ្ពស់បំផុតនៃប្រភេទគំនូរ “yuru-chara” កាលពីខែមករា ឆ្នាំ ២០២១ ក្នុងការប្រកួតក្រោមប្រធានបទប្រឆាំងការធ្វើអត្តឃាតព្រោះជួបបញ្ហាសម្លុតធ្វើបាប ដែលរៀបចំដោយអង្គការមិនរកប្រាក់ចំណេញ​មាន​មូលដ្ឋាន​នៅ​ទីក្រុងតូក្យូ។

ក្នុង​អំឡុង​ពេល​ពិភាក្សា​ជាមួយ​ថ្នាក់​ដឹកនាំ​សាលា នាងស្នើឱ្យបង្កើត Sticker Line ជាមួយនឹងប្រធានបទការពារការសម្លុតធ្វើបាប។ នៅខែមិថុនា ក្រុមចាប់ផ្តើមប្រមូលរូបភាព និងអក្សរលើកទឹកចិត្តដ៏កក់ក្តៅសម្រាប់មិត្តភក្តិ ហើយទទួលបានស្នាដៃពីសិស្សចំនួន ១៧៨ នាក់។

អ្នករចនាត្រូវចំណាយពេលប្រហែលមួយខែដើម្បីបញ្ចប់ Sticker ដោយស្កែនគំនូរនីមួយៗនៅលើកុំព្យូទ័រ។ កាលនៅរៀន Dokukinoko ក៏ធ្លាប់ត្រូវគេសម្លុតធ្វើបាប នាងបាននិយាយថា៖

“នៅពេលនោះ ការសម្លុតធ្វើបាបមានទាំងការបៀតបៀនផ្លូវកាយ និងពាក្យសំដី ប៉ុន្តែយូរៗទៅកាន់តែពិបាកមើល​ដឹង​តាម​សំបក​ក្រៅ ដូចជាការគំរាមកំហែងតាមបណ្តាញសង្គមជាដើម។ ខ្ញុំសង្ឃឹមថាយើងអាចយល់ និងប្រើប្រាស់​បណ្តាញ​សង្គមជាមធ្យោបាយទំនាក់ទំនងស៊ីវិល័យ មិន​មែន​ធ្វើ​បាប​គ្នា​ទៅ​វិញ​ទៅ​មកទេ” ។

Sticker Line ទាំងនេះត្រូវបានសមាគមមាតាបិតា និងគ្រូបង្រៀនសាលាលក់តាំងពីខែកញ្ញា។ ពួកគេបាននិយាយ​ថា​នឹង​ពិចារណា​​របៀប​​ប្រើ​ប្រាស់​ប្រាក់​ចំណូល​សម្រាប់​សិស្ស។

AD