ហេតុអ្វីបានជាល្ខោន Kabuki មិនមានស្រ្តីចូលរួមសម្តែង?

ល្ខោន Kabuki ជាទម្រង់ល្ខោនជប៉ុនបុរាណ ដែលត្រូវបានយូណេស្កូទទួលស្គាល់ជា “បេតិកភណ្ឌវប្បធម៌អរូបីនៃមនុស្ស​ជាតិ” ។

លក្ខណៈពិសេសនៃល្ខោន Kabuki ស្ថិតលើសម្លៀកបំពាក់សម្តែង ផាត់មុខក្រាស់ ទេពកោសល្យក្នុងការសម្តែងរបស់​តួអង្គ ប៉ុន្តែ​​មិន​​មាន​​វត្តមាន​តារា​សម្តែង​​ស្រី​​នោះ​​ទេ។

ល្ខោន Kabuki ចាប់ផ្តើមដោយក្រុមតារាសម្តែងស្រី

សិល្បៈ Kabuki ត្រូវបានរកឃើញដោយស្រ្តីម្នាក់ឈ្មោះ Izumo no Okuni ក្នុងសតវត្សទី ១៧ ។ ក្នុងនាមជា Miko (អ្នក​របាំ) នៃទីសក្ការៈបូជា Izumo នាងចាប់ផ្តើមរៀបចំការសម្តែងតូចៗដូចជាច្រៀង និងរាំ (ន័យចំពាក្យ “Kabuki” គឺជំនាញរបាំ) នៅលើទន្លេ Kamo ទីក្រុងក្យូតូ។

តួអង្គសម្តែងដែលរៀបចំដោយ Okuni ច្រើនតែមកពីវណ្ណៈទាបក្នុងសង្គមជប៉ុនសម័យនោះ រួមមានស្រ្តីពេស្យា អ្នក​សុំ​ទាន និងមនុស្សដទៃទៀតដែលត្រូវសង្គមបោះបង់ចោល។

ចំណុច​មួយ​ទៀតគឺថាពួកគេសុទ្ធតែជាស្ត្រី ការសម្តែងរបស់ Okuni និយាយពីព្រឹត្តិការណ៍ប្រវត្តិសាស្ត្រ ស្នេហា និងបទពិសោធជីវិតបានក្លាយទៅជាប្រធានបទគួរឲ្យ​ចាប់អារម្មណ៍នៅសម័យនោះ។

មិនយូរប៉ុន្មាន Okuni និងក្រុមរបស់នាងចូលសម្តែងក្នុងរាជវាំងក្យូតូ។ ដោយសារភាពជោគជ័យរបស់ក្រុម Okuni ក្រុមនារីជាច្រើនផ្សេងទៀតត្រូវបានបង្កើតឡើងនៅជុំវិញក្យូតូ។ ពួកគេគួរតែអាចរីករាយនឹងភាពរុងរឿង និងអនាគត​ភ្លឺ​ស្វាង ប៉ុន្តែសោកនាដកម្មបានកើតឡើងចំពោះក្រុមនារីទាំងនេះ។

Kabuki ក្លាយជាទម្រង់សិល្បៈសម្រាប់បុរស

នៅឆ្នាំ ១៦២៩ Bakufu Tokugawa ហាមឃាត់ស្ត្រីទាំងអស់សម្តែង Kabuki ដោយហេតុផលថា Kabuki ដែលស្រ្តីសម្តែង​ធ្វើ​ឲ្យ​ខូច​សីលធម៌សាធារណៈ។

មូលហេតុ​ដែលត្រូវបានលើកឡើងព្រោះខ្លឹមសារធ្វើឲ្យ​ស្រើបស្រាល ប៉ុន្តែមូលហេតុ​ពិតប្រាកដដោយសារតួអង្គសម្តែង Kabuki ភាគច្រើនជាស្រ្តីពេស្យា។

ជាក់ស្តែងមុននោះនៅឆ្នាំ ១៦១៧ រដ្ឋាភិបាលបានអនុម័តការបង្កើត Yoshiwara ដែលជាតំបន់ភ្លើងក្រហមធំមួយនៅ Edo (ទីក្រុងតូក្យូសព្វថ្ងៃ) ។ មិនចម្លែងទេដែល Kabuki ត្រូវបានសម្តែងនៅទីនេះ។

អ្វីដែលធ្វើឲ្យ​ល្ខោន Kabuki ក្លាយទៅជាបន្លាក្នុងភ្នែករបស់មន្ត្រី ដោយសារតែល្ខោនមានប្រជាប្រិយភាពទាំងវណ្ណៈខ្ពស់ និងទាប។ អ្នកគាំទ្រល្ខោន Kabuki មានគ្រប់ស្រទាប់វណ្ណៈ។

ដោយសារតែអ្នកគាំទ្រចម្រុះធ្វើឲ្យ Bakufu ដែលមានមនោគមវិជ្ជាបែងចែកវណ្ណៈច្បាស់លាស់ ចង់ឲ្យ​ពួកអភិជនមាន​ទំនាក់ទំនងជាមួយពួកអភិជនប៉ុណ្ណោះ ដូច្នេះព្យាយាមកម្ចាត់ Kabuki ។ ទ្រឹស្ដីមួយទៀតលើកឡើងថា មន្ត្រីនៅ​សម័យនោះ​ហាម​ស្រ្តី​សម្តែង​នៅ​លើ​ឆាក Kabuki ដោយសង្ឃឹមថានឹងធ្វើឲ្យ​ទម្រង់សិល្បៈ Kabuki បាត់បង់ភាពទាក់ទាញ និងរលាយបាត់។

ទោះជាយ៉ាងណា ការហាមឃាត់ស្ត្រីសម្តែង Kabuki បានឆ្ពោះទៅរកផ្លូវសម្រាប់អ្នកស្រឡាញ់​ភេទ​ដូច​គ្នា LGBT+ ។

*** តើអ្នកដឹងទេ៖ ល្ខោន Kabuki រួមចំណែកបង្កើតវប្បធម៌ប្រអប់បាយ Bento របស់ជប៉ុនសព្វថ្ងៃនេះ។ ដោយ​សារ​តែ​ការ​សម្តែង Kabuki ពេលខ្លះចំណាយពេលពេញមួយថ្ងៃ ដូច្នេះទស្សនិកជន​ចាប់​ផ្ដើម​យក​ប្រអប់​បាយអាហារ​ថ្ងៃត្រង់​ចួលរួមកម្មវិធី។

Onnagata ៖ តារាសម្តែងប្រុសតែងខ្លួនជាស្រីក្នុងល្ខោន Kabuki 

ដោយបញ្ជាហាមឃាត់ស្ត្រីសម្តែង បុរសទទួលខុសត្រូវការសម្តែងទាំងអស់។ យូរៗទៅតារាសម្តែងប្រភេទថ្មីត្រូវបានបង្កើត​ឡើង​មាន​ឈ្មោះ​ហៅ​ថា Onnagata បុរសដើរតួជាស្ត្រីនៅលើឆាក។

ប្រហែលសតវត្សទី ១៨ នៅពេលដែលល្ខោន Kabuki កំពុងមានប្រជាប្រិយភាព Onnagata ដែលគួរឲ្យ​គោរពបំផុតគឺជាអ្នកដែលរស់នៅ សម្តែង និងស្លៀកពាក់ដូចស្ត្រី រួមទាំងពេលដែលពួកគេមិនសម្តែង។ ចំណែក​អ្នក​ដែល​ស្លៀក​ពាក់ជាបុរស ​មាន​ប្រពន្ធ​កូន សុទ្ធតែត្រូវ​រិះគន់​លើកាសែត។

ការហាមឃាត់របស់រដ្ឋាភិបាលត្រូវដកចេញនៅចុងសតវត្សទី ១៩ ប៉ុន្តែស្ត្រីមិនត្រលប់មកសម្តែងវិញឡើយ។

មានមូលហេតុ​ជាច្រើនដែលគេរក្សា Onnagata គឺថាស្ត្រីគ្មានកម្លាំងពាក់សក់ក្លែងក្លាយ និងសម្លៀកបំពាក់សម្តែង Kabuki ធ្ងន់ ឬសូម្បីតែស្ត្រីក៏មិនដឹងថាខ្លួនជាស្ត្រីដែរ។

អ្នកអភិរក្សអះអាងថា Onnagata តែងតែវិភាគអត្តន័យក្លាយទៅជាស្រ្តីមួយរូប។ ពួកគេជឿថាទស្សនៈរបស់អ្នកក្រៅ​ធ្វើ​ឲ្យ​កាន់​តែ​ងាយស្រួលក្នុងការយល់អំពីលក្ខណៈពិតរបស់ស្រ្តីជាងស្ត្រីខ្លួនឯង។

ជាមួយនឹង “logic” នេះ តើយើងអាចសន្និដ្ឋានបានថាតួប្រុសគួរតែទុកឲ្យ​ស្រ្តីសម្តែងទេ?

ស្រ្តីមិនសម្តែងល្ខោន Kabuki ​បានរួមចំណែក​បង្កើត Ninja នាសម័យ​ទំនើប​ដោយ​របៀប​ណា?

Bakufu មិនត្រឹមតែហាមឃាត់ស្ត្រីមិនឲ្យសម្តែង Kabuki ប៉ុណ្ណោះទេ ក្រោយមកថែមទាំងហាមឃាត់យុវជនមិនឲ្យ​ដើរតួជាស្ត្រីផងដែរ។ នៅ​ពេល​នោះតួ​ស្រី​ទាំង​អស់ រួម​ទាំង​តួស្រី​វ័យ​ក្មេង សុទ្ធតែត្រូវសម្តែងដោយតួបុរសវ័យកណ្តាល។ ចំណុចនេះតម្រូវឲ្យ​ចំណាយពេលផាត់មុខ ធ្វើសក់ និងសម្លៀកបំពាក់ពិសេស ដើម្បីអាចក្លាយទៅជាស្រីស្អាតតាមដែលអាចធ្វើទៅបាន។

ល្ខោន Kabuki ទាំងអស់អាចសម្តែងបានយ៉ាងរលូននៅលើឆាក វត្តមានអ្នកជួយស្លៀកពាក់ពណ៌ខ្មៅដែលគេហៅ​ថា “Kuroko” ឬ “Kurogo” ។ ពួកគេ​ទទួល​បន្ទុក​ជួយ​ប្តូរ​សំលៀកបំពាក់តួអង្គសម្តែងឬសម្ភារៈ​ជាដើម។

Kuroko ស្លៀកពាក់ពណ៌ខ្មៅតាំងពីក្បាលរហូតដល់ចុងជើង ហើយព្យាយាមមិនឱ្យទស្សនិកជនឃើញវត្តមានរបស់ពួកគេលើឆាក។

បន្ទាប់មកល្ខោន Kabuki ចាប់ផ្តើមអនុញ្ញាតអោយ Kuroko ដើរតួជា Ninja ។ ដោយពឹងលើសម្លៀកបំពាក់ពណ៌ខ្មៅ Kuroko អាចបំបាំងកាយ ដែលជាសមត្ថភាពបំបាំងកាយរបស់ Ninja ។

អ្នកប្រាជ្ញមួយចំនួនគិតថាចំណុចបង្កើត Ninja ដែលជាអ្នកធ្វើឃាតស្លៀកពាក់ពណ៌ខ្មៅ។ ជាក់ស្តែង Ninja ដើម​ឡើយ​ស្លៀក​ពាក់​ធម្មតា ដើម្បីកុំឱ្យខ្លួនឯងលេចធ្លោខ្លាំងពេក។

តើអនាគតនារីអាចបង្ហាញខ្លួនក្នុងល្ខោន Kabuki ឡើងវិញទេ?

សព្វថ្ងៃនេះតារាសម្ដែងស្រីក្នុងពិភពល្ខោន Kabuki នៅតែមាន ប៉ុន្តែមានចំនួនតិចតួចប៉ុណ្ណោះ។ សព្វ​ថ្ងៃគ្មាន​នរណា​​ម្នាក់​​អាច​​រារាំង​​ស្ត្រី​មិន​ឱ្យ​ចូល​រួម​ក្នុង​ការ​សម្ដែង​ Kabuki បាន​ឡើយ។

មិនអាចបដិសេធចំពោះតួនាទីរបស់ស្ត្រីក្នុងការបង្កើត និងអភិវឌ្ឍវប្បធម៌ល្ខោន Kabuki នោះទេ។ ដូច្នេះប្រហែលជាថ្ងៃណាមួយ ស្ត្រីនឹងត្រលប់មកចូលរួមល្ខោនបែបប្រពៃណីនេះ។

Yuk