សិស្សវិទ្យាល័យជប៉ុនយកឈ្នះការប្រកួតច្នៃប្រឌិតផលិតផល “ម៉ាស៊ីនកាត់នំជាចំណែកស្មើគ្នា”

សិស្សវិទ្យាល័យជប៉ុនយកឈ្នះការប្រកួតប្រជែងច្នៃប្រឌិតផលិតផល “ម៉ាស៊ីនកាត់នំជាចំណែកស្មើគ្នា” ។ ចាប់​ពី​ពេល​​នេះ​​ទៅ​​​លែង​មានករណី​ដណ្តើម​នំមួយ​ដុំ​ចុង​ក្រោយ​ទៀត​ហើយ។

ដោយមានការបំផុសគំនិតដណ្តើមនំគ្នានៅក្នុងគ្រួសារ សិស្សវិទ្យាល័យមួយក្រុម ៣ នាក់ មកពីខេត្ត Oita បានបង្កើត​ឧបករណ៍​ដែល​អាច​កាត់នំស្មើៗគ្នា។

ឧបករណ៍នេះប្រើសម្រាប់នំ Pizza និងប្រភេទនំផ្សេងទៀតដែលមានរាងមូល មិនថាអ្នកចង់បែងចែកនំជាប៉ុន្មាន​ចំណែក​នោះ​ទេ ម៉ាស៊ីនអាចបែងចែកស្មើៗគ្នា។ ការច្នៃប្រឌិតរបស់ប្អូនៗយកឈ្នះរង្វាន់ខ្ពស់បំផុតក្នុងការប្រកួត​ប្រចាំ​ខេត្ត Oita នៅឆ្នាំ ២០២១ ។

សិស្សទាំងបីនាក់ជាសមាជិកក្លឹបបច្ចេកវិទ្យាឧស្សាហកម្មនៅវិទ្យាល័យ Kunisaki ខេត្ត Oita ។ ការច្នៃប្រឌិតរបស់ប្អូនៗទាក់ទងនឹងបញ្ហាប្រចាំថ្ងៃ ដូច្នេះទទួលបានការចាប់អារម្មណ៍យ៉ាងខ្លាំង។

ឧបករណ៍យកឈ្នះរង្វាន់កំពូលនេះហៅថា “ការចែករំលែកភាពរីករាយ” ត្រូវបានបង្កើតឡើងដោយនិស្សិតឆ្នាំទី ២ រួមមាន Wataru Onoda, Rinto Kimura និង Mitsumi Zaizen ដែលត្រូវបានបំផុសគំនិតដោយការ​ដណ្តើម​នំ​ខួប​កំណើត​នៅក្នុងគ្រួសាររបស់ Wataru Onoda ។

Wataru Onoda ត្រូវយកឈ្នះប្អូនស្រីពីរនាក់តាមរយៈការប៉ាវសុីងស៊ុម ដើម្បីដណ្តើមយកចំណែកនំចុងក្រោយ ព្រោះ​នំ​តែង​ត្រូវ​កាត់​ជា ៨ បំណែក រីឯសមាជិកគ្រួសារមានតែ ៧ នាក់។

ដោយផ្អែកលើគំនិតរបស់ Onoda ក្នុងការបែងចែកនំជាប្រាំពីរចំណែកស្មើៗគ្នា Kimura បានរចនាគំនូរ និងកម្ម​វិធី​កុំព្យូទ័រ ដើម្បីបង្កើតឧបករណ៍យ៉ាងជាក់លាក់។

ដោយសារត្រៀម​ប្រលង​ចូល​មហាវិទ្យាល័យ Zaizen មិនអាចចូលរួមក្នុងការផលិតជាក់ស្តែង ដូច្នេះនាងយកបទពិសោធឈ្នះរង្វាន់រយៈពេល ២ ឆ្នាំរបស់ខ្លួនដើម្បី​ធ្វើ​បទ​បង្ហាញ​វីដេអូ។

ក្រោយរយៈពេលសាកល្បង និងកែសម្រួល ២ ខែ ឧបករណ៍បានសម្រេច។ ពេលដាក់នំរាងមូលនៅលើតុ កាំរស្មីឡា​ស៊ែរ​នឹង​បែង​ចែក​នំជាចំណែកស្មើៗគ្នាតាមចំនួនដែលចង់បាន។

ឧទាហរណ៍សម្រាប់មនុស្សចំនួន​ ៥ នាក់ ម្នាក់ៗនឹងទទួលបាននំដែលកាត់តាមមុំ ៧២ ដឺក្រេ។ ដំណើរការ​នេះ​ក៏​ធា​នា​បាន​អនាម័យ ព្រោះ​​គ្មាន​អ្នក​ណា​ប៉ះ​ពាល់អាហារ​ឡើយ។

ក្នុងការវាយតម្លៃ​របស់​គណៈ​កម្មាធិការ​កាលពីខែតុលា ឆ្នាំ ២០២១ ការបង្កើតឧបករណ៍នេះត្រូវបាន​កោត​សរសើរ ដោយសារមូលហេតុ​រួមបញ្ចូលការច្នៃប្រឌិត ដែលអនុញ្ញាតឱ្យអ្នកប្រើកាត់ចំណែកនំស្មើគ្នាទោះមាន​ចំនួនសេសក៏​ដោយ។

Kimito Kotani នាយកប្រតិបត្តិនៃវិទ្យាស្ថានច្នែប្រឌិត និងផ្លាស់ប្តូរថ្មីខេត្ត Oita អ្នក​រៀបចំ​ការ​ប្រកួត​បាន​សរសើរ​ចំពោះ​ស្នាដៃ “ខណៈពេលដែលរីក​រាយ​នឹងដំណើរការច្នៃប្រឌិត ប្អូនៗក៏បានដោះស្រាយបញ្ហាដែលកើតឡើងក្នុងជីវិត​ប្រចាំ​ថ្ងៃ” ។

Shinji Matsuda ដែលជាអ្នកណែនាំ និងជាគ្រូហាត់ក្លឹបបានបន្ថែមថាគាត់នឹងបន្តជួយប្អូនៗផ្នែកបច្ចេកទេស។

“ដោយទទួលបានការសរសើរចំពោះការច្នៃប្រឌិតដែលខ្លួនបង្កើតឡើង ចំណុចនេះបង្កើនទំនុកចិត្ត និងផ្តល់ឱ្យប្អូន​ៗ​ជម្រើស​អាជីព​បន្ថែម​ទៀត” ។

Japo Cambodia