សិស្សស្រីជនជាតិជប៉ុនលួចបន្លំ និងបង្ហាញសំណួរប្រឡងចូលសកលវិទ្យាល័យ

ថ្ងៃព្រហស្បតិ៍ 03/02/2022 | 12:46 ល្ងាច

សិស្សស្រីអាយុ ១៩ ឆ្នាំម្នាក់ មកពី Osaka បានទៅដល់ស្ថានីយ៍ប៉ូលីសខេត្ត Kagawa ប្រទេសជប៉ុន ដើម្បីសារភាពទង្វើក្លែងបន្លំក្នុងការប្រឡងចូលសាកលវិទ្យាល័យ។ សិស្សស្រីរូបនេះផ្តល់សក្ខីកម្មថានាងបានចូលរួមការក្លែងបន្លំ និងបង្ហាញសំណួរប្រឡងចូល។ ហេតុការណ៍នេះកំពុងស្ថិតក្រោមការស៊ើបអង្កេត។

យោងតាមការបញ្ជាក់របស់សិស្សស្រីរូបនេះថា នាងបានប្រឡងនៅមណ្ឌលប្រឡងមួយក្នុងខេត្ត Osaka ។ ព្រោះតែខ្លាចពិន្ទុប្រឡងមិនជាប់ ហើយសង្ឃឹមថាអាចចូលសកលវិទ្យាល័យនៅទីក្រុងតូក្យូ សិស្សស្រីប្រើឧបករណ៍អេឡិចត្រូនិកថតសំណួរប្រឡងរួចផ្ញើចេញទៅក្រៅ។ នាងនិយាយថាខ្លួនគ្រាន់តែលួចបន្លំមុខវិជ្ជាប្រវត្តិសាស្ត្រពិភពលោកប៉ុណ្ណោះ ហើយមិនហ៊ានបន្លំបន្ថែមលើមុខវិជ្ជាផ្សេងទេ ព្រោះខ្លាចត្រូវគេចាប់។

ទីស្នាក់ការប៉ូលីសខេត្ត Kagawa

មុនពេលសិស្សស្រីចេញសារភាព ហេតុការណ៍នេះត្រូវបានគេប្រទះឃើញនៅពេលដែលនិស្សិតសាកលវិទ្យាល័យតូក្យូពីរនាក់ទទួលបានសំណួរប្រឡងប្រវត្តិសាស្រ្តពិភពលោកនៃការប្រឡងកាលពីថ្ងៃទី ១៥ ខែមករា ហើយជូនដំណឹងជាបន្ទាន់ដល់អាជ្ញាធរពាក់ព័ន្ធរបស់ក្រសួងអប់រំ។

នេះបើតាមប្រភពព័ត៌មានបានឱ្យដឹងថា និស្សិតពីរនាក់ដែលត្រូវបានមនុស្សម្នាក់អះអាងថាជា “សិស្សវិទ្យាល័យត្រៀមប្រលងចូលសកលវិទ្យាល័យ” ទាក់ទងតាមរយៈកម្មវិធី Skype នៅលើគេហទំព័រសេវាកម្មបង្រៀនដើម្បីផ្ញើសំណួរប្រឡង ដោយយកមូលហេតុថា “ចង់សាកល្បងសមត្ថភាពគ្រូ” ។

នៅពេលនោះពួកគេទាំងពីរនាក់មិនដឹងថានេះជាសំណួរក្នុងការប្រឡងចូលឡើយ។

និស្សិតរង់ចាំចាប់ផ្តើមប្រឡងភាសាអង់គ្លេស (ស្តាប់) នៅមណ្ឌលប្រឡង។ រូបភាពថតដោយ Tatsuya Shimada សាកលវិទ្យាល័យតូក្យូ Bunkyo-ku ទីក្រុងតូក្យូនៅល្ងាចថ្ងៃទី ១៥ ខែមករាឆ្នាំ ២០២២ ។

យោងតាមមជ្ឈមណ្ឌលប្រឡងចូលសាកលវិទ្យាល័យជប៉ុន បេក្ខជនត្រូវបានអនុញ្ញាតឱ្យយកឧបករណ៍អេឡិចត្រូនិកចូលក្នុងបន្ទប់ប្រឡង ប៉ុន្តែមិនអាចប្រើបានឡើយ។ បន្ទប់ប្រឡងនីមួយៗមានអ្នកមើលការខុសត្រូវគ្រប់គ្រាន់ ដើម្បីធានាថារកឃើញការបន្លំរបស់បេក្ខជន។

មនុស្សជាច្រើនបានចោទជាសំណួរថា ហេតុអ្វីបានជាបេក្ខជនអាចប្រើទូរស័ព្ទបញ្ជូនព័ត៌មានចេញទៅក្រៅ? ព្រោះរឿងនេះងាយនឹងត្រូវគេចាប់បាន។

បច្ចុប្បន្នករណីសិស្សស្រីអាយុ ១៩ ឆ្នាំកំពុងត្រូវបានសមត្ថកិច្ចស៊ើបអង្កេតបន្ថែមទៀត។

Yuki