ក្រុមហ៊ុនជប៉ុនបើកការបញ្ជាទិញម៉ូតូហោះដែលអាចហោះហើរបាន ៤០ នាទី

ថ្ងៃពុធ 02/02/2022 | 11:47 ព្រឹក

ALI Technologies ដែលជាក្រុមហ៊ុនចាប់ផ្តើមផលិតម៉ូតូហោះដំបូង បានចាប់ផ្តើមទទួលការបញ្ជាទិញសម្រាប់អង្គភាពពាណិជ្ជកម្មដំបូងដែលចង់ធ្វើជាម្ចាស់យានជំនិះ។ ម៉ូតូបើកលក់ក្នុងតម្លៃ ៧៧,៧ លានយ៉េន ដោយសារមានការកំណត់ក្នុងច្បាប់ជប៉ុន ដូច្នេះម៉ូតូអាចធ្វើដំណើរនៅទីលានប្រណាំងប៉ុណ្ណោះ។

ម៉ូតូហោះនេះមានឈ្មោះថា XTurismo Limited Edition មានស្លាបកង្ហារ ៤ ដែលដាក់នៅគែមខាងក្រៅម៉ូតូដើម្បីរក្សាលំនឹង។

ALI Technologies បានអោយដឹងថា hoverbike XTurismo Limited Edition អាចឈានដល់ល្បឿន ១០០/ម៉ោង ហោះបានកម្ពស់ ២ ម៉ែត្រ ក្នុងរយៈពេលប្រហែល ៣០ ទៅ ៤០ នាទីសម្រាប់ម្តងសាកថ្មពេញ និងធុងសាំងពេញ។

ផ្នែកតួសរសៃកាបូនស្រាលមានទម្ងន់ប្រហែល ៣០០ គីឡូក្រាម អាចផ្ទុកទម្ងន់បានដល់ទៅ ១០០ គីឡូក្រាម។ ប្រព័ន្ធបញ្ជូនដំណើរការបង្កើតឡើងដោយ ALI Technologies និង Toda Racing ។ យានជំនិះក៏ប្រើឧបករណ៍បញ្ជាស្វ័យប្រវត្តិដែលត្រូវបានរចនាឡើងដើម្បីធានាសុវត្ថិភាពខ្ពស់។

ក្រុមហ៊ុនបានដាក់បង្ហាញផលិតផលនៅ Fuji Speedway ទីលានប្រណាំងម៉ូតូជិតភ្នំ Fuji នៅ Oyama ប្រទេសជប៉ុន។

ALI Technologies បានអោយដឹងថាខ្លួនគ្រោងនឹងផលិតចំនួនមានកំណត់ ២០០ គ្រឿង

នាយកប្រតិបត្តិ ALI Daisuke Katano បានបង្ហើបឱ្យដឹងថា គោលដៅនាពេលអនាគតគឺផលិតឧបករណ៍ដំណើរការដោយអគ្គិសនីក្នុងទីក្រុង ឬសម្រាប់ឆ្លើយតបគ្រោះមហន្តរាយក៏ដូចជាស្វែងរក និងជួយសង្គ្រោះ។