ព្រឹត្តិការណ៍សំខាន់ៗនៃទំនាក់ទំនងដ៏ស៊ីជម្រៅរវាងរាជវង្សជប៉ុន និងអង់គ្លេសតាំងពី ១៥០ ឆ្នាំមុន

ទំនាក់ទំនងស៊ីជម្រៅរវាងរាជវង្សជប៉ុន និងរាជវង្សអង់គ្លេសមានតាំងពី ១៥០ ឆ្នាំមុន។ ប្រទេស​ទាំង​ពីរ​មាន​ទំនាក់​ទំនង​​ជិត​​ស្និទ្ធ​​រហូត​​ដល់​​សង្គ្រាម​​លោក​លើក​ទី​ពីរ​បាន​ធ្វើ​ឱ្យ​ពួក​គេក្លាយ​ជា​សត្រូវ​នឹង​គ្នា​។

សមាជិកគ្រួសាររាជវង្សទាំងសងខាងដើរតួយ៉ាងសំខាន់ក្នុងការផ្សារភ្ជាប់សម្ព័ន្ធភាពជប៉ុន និងអង់គ្លេស បន្ទាប់​ពី​សង្គ្រាម​បាន​បញ្ចប់​រហូត​មក​ដល់​សព្វថ្ងៃនេះ។

ចូរយើងក្រឡេកមើលប្រវត្តិទំនាក់ទំនងដ៏ពិសេសនេះ ទំនាក់ទំនងមានឥទ្ធិពលយ៉ាងសំខាន់លើសម្ព័ន្ធភាពអង់​គ្លេស និង​ជប៉ុន​ថ្មី។

ក្រោយពេលចាកចេញពីសហភាពអឺរ៉ុប អង់គ្លេសបានបង្ហាញការយកចិត្តទុកដាក់ដែលមិនធ្លាប់មានពី​មុន​មក​លើ​ទំនាក់​ទំនង​ជា​មួយ​ជប៉ុន។ អង់គ្លេស និង​ជប៉ុនគឺជា​ប្រទេស​កោះ​ទាំងពីរ​ដែល​គ្រប់គ្រង​ដោយ​រាជាធិបតេយ្យ​អាស្រ័យ​​រដ្ឋធម្មនុញ្ញ​ ហើយ​គ្រួសារ​រាជវង្សទាំងសងខាងបាន​បង្កើត​ទំនាក់ទំនង​ការទូត​ប្រហែល ១៥០ ឆ្នាំ។

នៅការិយាល័យប័ណ្ណសាររាជវង្សក្នុងវិមាន Windsor ប្រទេសអង់គ្លេស នៅតែរក្សាទុកវត្ថុអនុស្សាវរីយ៍ដែលបង្ហាញពីទំនាក់​ទំនង​ពិសេសរវាងគ្រួសាររាជវង្សទាំងពីររួមមាន៖

• សេចក្តីព្រាងទូរលេខរបស់ស្តេច George ផ្ញើអធិរាជ Hirohito អបអរសាទរខួបលើកទី ២៦០០ ឆ្នាំនៃទិវាជាតិប្រទេសជប៉ុននៅថ្ងៃទី ១១ ខែកុម្ភៈឆ្នាំ ១៩៤០ និងសំបុត្រឆ្លើយតបរបស់អធិរាជទៅកាន់ស្តេច​នៅ​ថ្ងៃទី ១២ ខែកុម្ភៈឆ្នាំ ១៩៤០ ។
• សេចក្តីព្រាងទូរលេខរបស់ស្តេច George ទៅកាន់ព្រះចៅអធិរាជ Hirohito ចែករំលែកទុក្ខចំពោះការ​សោយ​ទីវង្គតរបស់ព្រះនាង Masako បុត្រីទី ៦ របស់អធិរាជ Meiji និងមហេសីរបស់ព្រះអង្គម្ចាស់ Takeda Tsunehisa នៅថ្ងៃទី ៩ ខែមីនា ឆ្នាំ ១៩៤០ និងសេចក្តីថ្លែងអំណរគុណរបស់ព្រះមហាក្សត្រនៅថ្ងៃទី ៣ ខែ​វិច្ឆិកា ឆ្នាំ ១៩៤០ ។
• សេចក្តីព្រាងទូរលេខរបស់ស្តេច George អបអរសាទរដល់ព្រះចៅអធិរាជក្នុងពិធីរៀបអភិសេករបស់​ព្រះ​អង្គម្ចាស់ Mikasa Takahito នៅថ្ងៃទី ២២ ខែតុលា ឆ្នាំ ១៩៤១ និងសំបុត្រឆ្លើយតបរបស់អធិរាជនៅថ្ងៃ​ដដែល។

ក្នុងចំណោមបណ្ណសារខាងលើ ជាពិសេសសារទូរលេខអបអរសាទរពិធីរៀបអភិសេករបស់ព្រះអង្គម្ចាស់ Mikasa Takahito ត្រូវបានផ្ញើត្រឹម​ ២ ខែមុនពេលជប៉ុនវាយប្រហារកំពង់ផែ Pearl Harbor ហើយចាប់ផ្តើមយុទ្ធនាការ Malaya ជាការចាប់ផ្តើមសង្គ្រាមប៉ាស៊ីហ្វិក។ រាជវង្សនៃប្រទេសទាំងពីរនៅតែចូលរួមសន្ទនាគ្នាយ៉ាងជិតស្និទ្ធ រហូតដល់ប៉ុន្មានសប្តាហ៍មុនសង្រ្គាមធ្វើឱ្យពួកគេក្លាយជាសត្រូវ។

ទំនាក់ទំនងរវាងរាជវង្សអង់គ្លេស និងគ្រួសារអធិរាជជប៉ុនចាប់ផ្តើមនៅឆ្នាំ ១៨៦៩ នៅពេលដែលកូនប្រុសទីពីររបស់​ម្ចាស់​ក្សត្រី Victoria ព្រះអង្គម្ចាស់ Alfred បានធ្វើទស្សនកិច្ចនៅប្រទេសជប៉ុន។

មិត្តភាពនេះឈានដល់កម្រិតកំពូលក្នុងរជ្ជកាលអធិរាជ Showa ។ នៅឆ្នាំ ១៩២១ ខណៈពេលនៅជាព្រះអង្គម្ចាស់ Hirohito ទ្រង់បានក្លាយជាសមាជិករាជវង្សដំបូងទៅបំពេញទស្សនកិច្ចនៅអង់គ្លេស។ ទ្រង់ចាកចេញពីទីក្រុង Yokohama កាលពីថ្ងៃទី ៣ ខែមីនាតាមនាវាចម្បាំង Katori ដែលបង្កើតឡើងដោយអង់គ្លេស ដើម្បីធ្វើដំណើរទៅកាន់​ប្រទេស​អឺរ៉ុប​ទាំងប្រាំ ទទួលស្វាគមន៍ព្រះអង្គម្ចាស់ Hirohito គឺស្តេច George V ។

នៅពេលនោះស្តេច George V ដែលជាជីតារបស់ម្ចាស់ក្សត្រី Elizabeth មានព្រះជន្ម ៥៥ ព្រះវស្សា ខណៈដែលព្រះអង្គម្ចាស់ Hirohito ទើបតែមានព្រះជន្ម ២០ ព្រះវស្សា។ ព្រះរាជាមានព្រះទ័យស្រឡាញ់ចំពោះព្រះអង្គម្ចាស់ជាខ្លាំង ហើយ​​ប្រទាន​បដិសណ្ឋារកិច្ច​យ៉ាង​ក្លៀវក្លា​ដល់​ព្រះអង្គ ខណៈ​ពួកគេ​ជិះរទេះ​ជាមួយ​គ្នា នៅក្នុងក្បួនដង្ហែទទួលស្វាគមន៍។

ក្នុងដំណើរនោះ ព្រះអង្គម្ចាស់ Hirohito បានដឹងអំពីសារៈសំខាន់ និងភាពកក់ក្តៅនៃទំនាក់ទំនងគ្រួសាររាជវង្ស​អង់​គ្លេសសម័យទំនើប ដូចជានិមិត្តរូបនៃការផ្សារភ្ជាប់ជាមួយប្រជាជនរបស់ពួកគេ។ 

អតីតអ្នកយកព័ត៌មាន Yomiuri Shimbun Murao Kiyokazu បានសរសេរអត្ថបទមួយដែលមានចំណងជើងថា “Kōtaishi no kekkon” (ពិធីរៀបអភិសេករបស់ព្រះអង្គម្ចាស់) នៅក្នុងសន្និសីទសារព័ត៌មានមួយក្នុងឆ្នាំ ១៩៦១ ក្នុង​ឱកាស​ជម្រើន​ព្រះជន្ម ៦០ ព្រះវស្សា ព្រះចៅអធិរាជបានរៀបរាប់ពេលវេលាដ៏រីករាយបំផុតក្នុងជីវិតរបស់​ទ្រង់ នៅពេលដែលទ្រង់យាងទៅកាន់ប្រទេសអង់គ្លេស។

“ខ្ញុំបានទៅដល់ប្រទេសអង់គ្លេសកាលខ្ញុំមានព្រះជន្ម ២០ ឆ្នាំ ខ្ញុំចំណាយពេល ៣ ថ្ងៃនៅវិមាន Buckingham ជា​មួយ​ស្តេច George V ហើយទ្រង់បានបង្រៀនខ្ញុំ និងកូនប្រុសរបស់គាត់ (ព្រះអង្គម្ចាស់នៃប្រទេស Wales និងស្តេច Edward VIII នាពេលអនាគត) របៀបក្លាយជាអ្នកដឹកនាំរបបរាជានិយមអាស្រ័យរដ្ឋធម្មនុញ្ញ … ខ្ញុំគិតដល់ស្តេច George V ដូចជាបិតាទីពីររបស់ខ្លួន” ។

ឆ្នាំ ១៩៧៩ ភូមិគ្រះរាជវង្សនៅ Nasu អធិរាជបានរំលឹកថា៖ “អ្វី​ដែល​ខ្ញុំ​ស្តាប់​ឮ​ពី​ស្តេច George V ​លក្ខណៈ​នៃ​របប​រាជា​និយម​​អាស្រ័យ​​រដ្ឋធម្មនុញ្ញ បាន​ក្លាយ​ជា​ឫសគល់​នៃ​ការ​គិត​របស់​ខ្ញុំ​អស់​មួយ​ជីវិត” ។

នេះបើតាម Eikoku ōshitsu shijiten (សព្វវចនាធិប្បាយប្រវត្តិនៃគ្រួសាររាជវង្សអង់គ្លេស) ស្តេច George V “ជាទីប្រឹក្សាដ៏គួរឱ្យគោរពដល់គណៈរដ្ឋមន្ត្រី ទ្រង់ធានាបានកេរ្តិ៍ឈ្មោះរបស់ខ្លួនក្នុងរបបរាជាធិបតេយ្យអាស្រ័យរដ្ឋធម្ម​នុញ្ញ​ប្រកប​ដោយ​ជោគជ័យ ដែលកម្រមាននៅក្នុងប្រវត្តិសាស្រ្តសម័យទំនើប” ។

ស្តេច George V ជារឿយៗតែងមានប្រសាសន៍ដោយផ្ទាល់ទៅកាន់រដ្ឋាភិបាល ហើយដើរតួនាទីយ៉ាងសកម្មក្នុងនយោបាយ។ ទ្រង់បានបង្រៀនព្រះអង្គម្ចាស់គោលការណ៍នៃរបបរាជានិយមអាស្រ័យរដ្ឋធម្មនុញ្ញ ក្នុង​នោះ​ព្រះ​មហាក្សត្រ​​ជា​និមិត្ត​រូប ហើយក៏មាន “សិទ្ធិចេញសេចក្តីព្រមាន” នៅពេលជ្រៀតជ្រែកក្នុងកិច្ចការនយោបាយ។

ដំណើរ​ទស្សនកិច្ច​នេះ​ក៏​មាន​ឥទ្ធិពល​យ៉ាង​ខ្លាំង​ដល់​ការ​រស់នៅ​របស់​គ្រួសារ​រាជវង្ស។ ចាប់ពីឆ្នាំ ១៩២៣ មិនយូរប៉ុន្មាន​បន្ទាប់​ពី​ការ​យាង​របស់អធិរាជ Showa ទៅកាន់ប្រទេសអង់គ្លេស ទ្រង់ចាប់ផ្តើមបញ្ជាទិញសំលៀកបំពាក់ពីជាង​កាត់ដេរដ៏ល្បីម្នាក់នៅ Savile Row ទីក្រុងឡុងដ៍ ដោយផ្លាស់ប្តូរពីសម្លៀកបំពាក់ប្រពៃណីជប៉ុនទៅជាសម្លៀកបំពាក់​ផ្លូវ​ការ​របស់លោកខាងលិច។

ទ្រង់ក៏ចូលចិត្តសាច់ ស៊ុត និងនំប័ុងអាំងសម្រាប់អាហារពេលព្រឹក ជំនួសឱ្យស៊ុប miso និងបាយបែបប្រពៃណីជប៉ុន។ ក្រោយ​សង្គ្រាមទ្រង់បន្តជ្រើសរើស​មុខ​ម្ហូប​អង់គ្លេស​មួយ​ចំនួន​ដូច​ជាម្សៅធញ្ញជាតិ ស្ពៃក្តោមដាក់ទឹក​សាឡាត់ និង​នំប័ុង​អាំង។

ព្រះចៅអធិរាជក៏បានលុបចោលរបបយកប្រពន្ធច្រើន ទំនៀមទម្លាប់ដែលត្រូវបានអនុម័តដើម្បីបង្កើនចំនួនអ្នក​ស្នងមរតកបុរស គាំទ្រអាពាហ៍ពិពាហ៍រាជវង្សប្តីមួយប្រពន្ធមួយ។ ទ្រង់ថែមទាំងបោះបង់ការផ្ទុំលើ Futon ដើម្បីប្តូរ​ទៅ​ផ្ទុំលើគ្រែ។

ការផ្លាស់ប្តូរដ៏សំខាន់មួយគឺថាបុត្រនៅក្នុងគ្រួសាររាជវង្សមិនត្រូវបានចិញ្ចឹមបីបាច់ដោយអ្នកថែទាំទៀតទេ ប៉ុន្តែនៅជាមួយមាតាបិតារបស់ខ្លួន។ នេះជាការដែលគ្រួសារអធិរាជត្រូវបានទទួលស្គាល់ជាគ្រួសារពិតក្នុងក្រសែភ្នែករបស់ប្រជាជនជប៉ុន។

ជប៉ុន ​និង​អង់គ្លេស​បាន​ចុះ​ហត្ថលេខា​លើ​សម្ព័ន្ធភាព​យោធា​ក្នុង​ឆ្នាំ ១៩០២ ដោយសារប្រទេសទាំងពីរទទួលស្គាល់​រុស្ស៊ី​ជា​សត្រូវ​រួម។ នៅពេលដែលជប៉ុនឈ្នះសង្គ្រាមរុស្ស៊ី-ជប៉ុនពីឆ្នាំ ១៩០៤ ដល់ ១៩០៥ ដោយពឹងលើជំនួយរបស់អង់​គ្លេស។

ទោះជាយ៉ាងណាអាមេរិក​កាន់តែ​ប្រយ័ត្នប្រយែង​ចំពោះ​សម្ព័ន្ធភាព​អង់គ្លេស​-​ជប៉ុន ខណៈពេលដែលបានឃើញការ​ងើប​ឡើងរបស់ជប៉ុន។ អាមេរិក​បង្ខំឱ្យ​អង់គ្លេស​បញ្ចប់​ទំនាក់ទំនង​ការទូត​ជាមួយ​ជប៉ុន។ នៅពេលដែរបង្កើតសម្ព័ន្ធ​ប្រជាជាតិ អង់គ្លេស​បាន​ជំទាស់​នឹង​ការ​ទទូច​របស់​ជប៉ុន​ក្នុង​ការ​ដាក់​ចេញ​ឃ្លា​បដិសេធ​ការ​រើសអើង​ពូជសាសន៍​​ក្នុងកិច្ចព្រមព្រៀង ហើយរឿងនោះធ្វើឱ្យជប៉ុនមិនទុកចិត្តអង់គ្លេស។

បន្ទាប់​ពី​ព្រះអង្គម្ចាស់​យាង​ត្រឡប់​មក​ពី​ដំណើរ​របស់ទ្រង់ នៅខែវិច្ឆិកា ឆ្នាំ ១៩២១ ទ្រង់ដើរតួជារាជានុសិទ្ធិ ហើយនៅខែបន្ទាប់ក្នុងសន្និសីទទីក្រុងវ៉ាស៊ីនតោន រដ្ឋាភិបាល​ដែល​ចូល​រួម​បាន​សម្រេច​ចិត្ត​បញ្ចប់​សម្ព័ន្ធភាព​អង់​គ្លេស​-ជប៉ុន​ចាប់​ពី​ឆ្នាំ ​១៩២៣ ។ ពីរទសវត្សរ៍ក្រោយមក នៅឆ្នាំ ១៩៤១ សង្រ្គាមប៉ាស៊ីហ្វិកបានបណ្តាលឱ្យ​ប្រទេសទាំង​នេះ​ចូលរួមសង្រ្គាមដ៏កាចសាហាវ។ ទោះជាយ៉ាងនេះក្តី ការស្នាក់នៅរយៈពេលបីសប្តាហ៍របស់ព្រះអង្គម្ចាស់នៅ​អង់​គ្លេស​ដើរ​តួនាទី​យ៉ាង​សំខាន់​ក្នុងទំនាក់ទំនងរវាងប្រទេសទាំងពីរ។

ទំនាក់ទំនងរវាងគ្រួសាររាជវង្សទាំងពីរត្រូវផ្អាក ហើយទើបតែបន្តឡើងវិញបន្ទាប់ពីសង្គ្រាមលោកលើកទីពីរបញ្ចប់។ ការសង្ស័យចំពោះជប៉ុននៅតែបន្តកើតមាននៅអង់គ្លេស ជាពិសេស​ក្នុងចំណោម​អតីត​ទាហាន​ដែល​ត្រូវ​ជប៉ុន​ចាប់​ឃុំ ប៉ុន្តែ​រាជវង្សអង់គ្លេស និងរាជវង្សជប៉ុនព្យយាមដោះស្រាយបញ្ហានេះ។

នៅឆ្នាំ ១៩៥៣ មួយឆ្នាំបន្ទាប់ពីអធិបតេយ្យភាពរបស់ជប៉ុនត្រូវបានស្ដារឡើងវិញ ព្រះអង្គម្ចាស់ Akihito បានធ្វើទស្សនកិច្ចអន្តរជាតិលើកដំបូងដើម្បីចូលរួមក្នុងពិធីឡើងគ្រងរាជ្យរបស់ម្ចាស់ក្សត្រី Elizabeth ។ ព្រះអង្គម្ចាស់សិក្សា​ប្រវត្តិសាស្ត្រនៃចក្រភពអង់គ្លេសតាមរយៈជីវប្រវត្តិ George V របស់ Harold Nicholson ហើយត្រូវបាននាយក​រដ្ឋមន្ត្រី Winston Churchill ចាត់ទុកជាភ្ញៀវកិត្តិយស។

ក្នុង​ពិធី​ទទួល​ស្វាគមន៍​ដែល​មាន​ការ​ចូល​រួម​ពី​ម្ចាស់​កាសែត​ដ៏​ល្បី​ធ្លាប់​ចុះ​ផ្សាយ​អត្ថបទ​ប្រឆាំង​នឹង​ជប៉ុន បុគ្គលិក​លក្ខណៈ​សុភាពរាបសាររបស់ភ្ញៀវជនជាតិជប៉ុនបានធ្វើឱ្យអ្នកចូលរួមនៅអង់គ្លេសចាប់អារម្មណ៍ ហើយទំនាក់ទំនង​រវាង​ជប៉ុន និងអង់គ្លេសចាប់ផ្តើមប្រសើរឡើង។

ឆ្នាំ ១៩៧១ នៅពេលដែលអធិរាជ Hirohito បានធ្វើទស្សនកិច្ចផ្សេងទៀតទៅកាន់ប្រទេសអង់គ្លេស ៥០ ឆ្នាំបន្ទាប់​ពី​ការ​បំពេញ​ទស្សន​កិច្ចលើកដំបូងរបស់ទ្រង់ក្នុងនាមជាព្រះអង្គម្ចាស់ សមាជិករាជវង្ស Lord Mountbatten មិនបានចូលរួមក្នុងពិធីជប់លៀងផ្លូវការរបស់រដ្ឋនោះទេ។ Mountbatten ធ្លាប់ជាមេបញ្ជាការសម្ព័ន្ធមិត្តកំពូលនៅ​រោង​មហោស្រព​ប៉ាស៊ីហ្វិកអាគ្នេយ៍ ហើយបានបាត់បង់មនុស្សមួយចំនួនធំ​ក្នុងសង្គ្រាមប្រឆាំង​នឹង​ជប៉ុន។

ទោះជាយ៉ាងណាម្ចាស់ក្សត្រី Elizabeth បានបន្ធូរបន្ថយភាពតានតឹងដោយនិយាយថា៖ “យើងមិនអាចធ្វើពុតថាទំនាក់​ទំនង​រវាង​ប្រជាជាតិ​ទាំងពីរតែងតែមានសន្តិភាព និងមិត្តភាពនោះទេ ជាបទពិសោធន៍ដែលនឹងធ្វើឱ្យយើងទាំងអស់គ្នាតាំង​ចិត្តមិន​បណ្តោយរឿង​នោះ​កើត​ឡើង​វិញ​ឡើយ” ។

ម្ចាស់ក្សត្រីតែងតែខិតខំរក្សាទំនាក់ទំនងជិតស្និទ្ធជាមួយរាជវង្សជប៉ុន ហើយចំណុចនេះបានធ្វើឱ្យគាត់ទទួលបានការស្វាគមន៍យ៉ាងកក់ក្តៅនៅប្រទេសជប៉ុនក្នុងដំណើរទស្សនកិច្ចលើកដំបូងក្នុងនាមជាសមាជិកគ្រួសាររាជវង្សនៅ​ឆ្នាំ ១៩៧៥ ។

ឆ្នាំ ១៩៩៨ រួមជាមួយនឹងដំណើរទស្សនកិច្ចអង់គ្លេសរបស់ព្រះចៅអធិរាជ Akihito នាយករដ្ឋមន្ត្រី Hashimoto Ryūtarō បានសរសេរអត្ថបទមួយនៅលើកាសែត The Sun នៃចក្រភពអង់គ្លេសបង្ហាញការសោកស្តាយយ៉ាងជ្រាលជ្រៅ និងការសុំទោសដោយស្មោះ ជាមួយគ្នានេះរដ្ឋាភិបាលអង់គ្លេសបានសម្រេចផ្តល់អត្ថប្រយោជន៍ពិសេសដល់អតីតអ្នកទោសសង្គ្រាមជប៉ុន។ អតីតឯកអគ្គរដ្ឋទូតអង់គ្លេសប្រចាំប្រទេសជប៉ុន David Warren បានចង្អុលបង្ហាញថាដំណើរទស្សនកិច្ចឆ្នាំ ១៩៩៨ ដើរតួនាទីយ៉ាងសំខាន់ឆ្ពោះទៅរកការផ្សះផ្សា។

ទំនាក់ទំនងដ៏រឹងមាំរវាងរាជវង្សជប៉ុន និងរាជវង្សអង់គ្លេសជួយបង្កើតទំនាក់ទំនងថ្មីរវាងប្រទេសទាំងពីរ ខណៈពេលមានការសង្ស័យថាសង្រ្គាមនឹងបន្ត។ ព្រះចៅអធិរាជ Akihito បានធ្វើទស្សនកិច្ចទៅកាន់ប្រទេសអង់គ្លេសម្តងទៀតនៅឆ្នាំ ២០១២ ដើម្បីអបអរសាទរ ៦០ ឆ្នាំនៃការឡើងគ្រងរាជ្យរបស់ម្ចាស់ក្សត្រី Elizabeth ។

បច្ចុប្បន្នព្រះចៅអធិរាជជប៉ុន Naruhito ក៏បានជ្រើសរើសទៅសិក្សានៅប្រទេសអង់គ្លេសកាល​នៅ​ជា​ព្រះអង្គម្ចាស់។ ព្រះចៅអធិរាជ Naruhito ធ្លាប់សិក្សាប្រវត្តិដឹកជញ្ជូនផ្លូវទឹកនៅលើទន្លេ Thames កាលជាសិស្សនៅ Oxford ។ នៅឆ្នាំ ២០១៥ ព្រះអង្គម្ចាស់ Naruhito និងព្រះនាង Masako បានជួបព្រះអង្គម្ចាស់ William ក្នុងអំឡុងទស្សនកិច្ចនៅ​ប្រទេស​ជប៉ុន​ឆ្នាំ ២០១៨ ។ បុត្រីច្បងរបស់ពួកគាត់ ព្រះនាង Aiko បានចូលរៀនសាលារដូវក្តៅនៅ Eton College ។ គ្រួសារ​រាជវង្ស​ជប៉ុន និង​អង់គ្លេស​បាន​បង្កើត​ទំនាក់ទំនង​គ្រួសារ​បី​ជំនាន់។

ទំនាក់ទំនងនៃគ្រួសាររាជវង្សានុវង្សទាំងពីរដើរតួនាទីយ៉ាងសំខាន់ក្នុងការផ្សះផ្សារវាងប្រទេសទាំងពីរ។ អត្ថិភាពនៃបណ្តាញការទូតបន្ទាប់បន្សំ ក្រៅពីទំនាក់​ទំនង​រដ្ឋាភិបាល​ធម្មតាអាចជួយយ៉ាងច្រើនក្នុងការពង្រឹងទំនាក់ទំនង។

នៅឆ្នាំ ២០២១ កត់សម្គាល់ ១០០ ឆ្នាំព្រះអង្គម្ចាស់ Hirohito ចុះចតលើកោះ Wight ។ ប្រសិនបើជំងឺរាតត្បាតកូវីដ ១៩ ថយចុះ ដំណើរទស្សនកិច្ចអន្តរជាតិលើកដំបូងរបស់ព្រះចៅអធិរាជ និងមហាក្សត្រីនឹងទៅកាន់ចក្រភពអង់​គ្លេស។ ខណៈដែលប្រទេសជប៉ុន និងអង់គ្លេស ដែលជាប្រទេសកោះពីរមកពីបូព៌ា និងលោកខាងលិចបង្កើតសម្ព័ន្ធភាព​ថ្មី យុគ​សម័យ​ថ្មី​នៃ​ការផ្លាស់ប្តូររវាងរាជវង្សនឹងកាន់តែរឹងមាំ។

yuki