ស្នាដៃសិល្បៈនៃសិស្សវិទ្យាល័យជប៉ុនធ្វើប្រាសាទ Kumamoto ពីឈើចាក់ធ្មេញចំនួន ១១ ម៉ឺនដើម

ថ្ងៃអង្គារ 25/01/2022 | 7:00 ព្រឹក

ស្នាដៃសិល្បៈរបស់សិស្សវិទ្យាល័យមួយក្រុមដែលបានភ្ជាប់ឈើចាក់ធ្មេញចំនួន ១១ ម៉ឺនដើម បានទាក់ទាញចំណាប់អារម្មណ៍អ្នកស្រុកបន្ទាប់ពីដាក់តាំងនៅមជ្ឈមណ្ឌលផ្សារទំនើបទីក្រុងភាគនិរតីប្រទេសជប៉ុន។

ស្នាដៃនេះគឺជាការបង្កើតឡើងរបស់សិស្សឆ្នាំទី ២ ចំនួន ៣៨ នាក់នៅវិទ្យាល័យ Kyushu Gakuin Lutheran សង្កាត់ Chuo ទីក្រុង Kumamoto ។ បច្ចុប្បន្ននេះរូបភាពប្រាសាទត្រូវបានដាក់តាំងនៅជាន់ទី ៧ នៃមជ្ឈមណ្ឌលផ្សារទំនើប Amu Plaza Kumamoto ខាងក្នុងអគារស្ថានីយ៍។

ជាមួយនឹងកម្ពស់ ៩៦ សង់ទីម៉ែត្រ និងទទឹង ១៨៦ សង់ទីម៉ែត្រ ស្នាដៃសិល្បៈនេះប្រើគំនូរប្រាសាទ Kumamoto លើបន្ទះស្នោប្លាស្ទិកដើម្បីធ្វើជាស៊ុម រួចបិទឈើចាក់ធ្មេញខ្មៅ និងសពីលើបង្កើតជាអារម្មណ៍ 3D ។

ក្រុមសិស្សប្រើពេលឈប់សម្រាកពីសាលាដើម្បីបន្តគម្រោង ហើយបញ្ចប់ក្នុងរយៈពេលប្រហែល ២ សប្តាហ៍កាលពីខែតុលា ឆ្នាំ ២០២១ ។

ដោយសារឥទ្ធិពលជំងឺរាតត្បាតកូវីដ ១៩ ពិធីបុណ្យវប្បធម៌របស់សាលាត្រូវបានលុបចោល។ ផ្ទុយទៅវិញប្រាសាទ Kumamoto ត្រូវបានសម្ពោធក្នុងពិព័រណ៍វប្បធម៌។

ដោយបំណងចង់ប្រើស្នាដៃសិល្បៈដើម្បីលើកទឹកចិត្តស្រុកកំណើត Kumamoto បច្ចុប្បន្នស្ថិតក្នុងដំណើរការស្តារឡើងវិញបន្ទាប់ពីរញ្ជួយដីនៅឆ្នាំ ២០១៦ ស្នាដៃត្រូវបានដាក់តាំងនៅមជ្ឈមណ្ឌលផ្សារទំនើប Amu Plaza Kumamoto ជាកន្លែងដែលអ្នកស្រុកអាចគយគន់។

លោក Hiroshi Harada អាយុ ៥០ ឆ្នាំជាគ្រូបង្រៀនដែលបានណែនាំសិស្សឱ្យធ្វើគម្រោងនេះនិយាយថា៖ “ខ្ញុំចង់ឱ្យអ្នករាល់គ្នាមើលឃើញស្នាដៃដែលសិស្សបានធ្វើជាមួយគ្នា” ។

ស្នាដៃសិល្បៈប្រាសាទ Kumamoto ត្រូវបានដាក់តាំងរហូតដល់ថ្ងៃទី ១៥ ខែកុម្ភៈហើយបន្ទាប់មកប្តូរទៅតាំងនៅការិយាល័យតូក្យូនៃរដ្ឋាភិបាលទីក្រុង Kumamoto សង្កាត់ Chiyoda ទីក្រុងតូក្យូ។