សិស្សានុសិស្សជប៉ុនចូលរួមការប្រកួតប្រជែងធ្វើប៉មឈើចាក់ធ្មេញដែល​ធន់​នឹងរញ្ជួយដី

សាកលវិទ្យាល័យបច្ចេកទេសមួយនៅទីក្រុង Kumamoto ល្បីជាមួយនឹងការប្រកួតដ៏ពិសេស ដាក់ឱ្យសិស្សានុសិស្សប្រកួត​ប្រជែង​ធ្វើប៉មឈើ​ចាក់​ធ្មេញ​ដែល​អាច​ទប់​ទល់នឹងរញ្ជួយដី។

ដោយសារស្ថិតនៅក្នុងខ្សែក្រវ៉ាត់​ភ្នំភ្លើងប៉ាស៊ីហ្វិក ដែលជាកន្លែងមានរញ្ជួយដី និងភ្នំភ្លើងជាបន្តបន្ទាប់ ជប៉ុនជាប្រទេសដែលងាយកើតមានរញ្ជួយដីបំផុតនៅលើពិភពលោក។ ទោះបីជាទឹកដីប្រទេសនេះគ្របដណ្តប់ត្រឹមតែ ០,២៥% នៃផ្ទៃដីលើភពផែនដី ប៉ុន្តែ ១៨,៥% រញ្ជួយដីលើពិភពលោកកើតឡើងនៅទីនេះ។

តាំងពីឆ្នាំ ២០០៦ បន្ទប់ស្ថាបត្យកម្មផ្នែកវិស្វកម្ម សាកលវិទ្យាល័យ Sojo បានរៀបចំការប្រកួតដែលមានឈ្មោះថា “ការប្រកួតរញ្ជួយដីនៃប៉មឈើចាក់ធ្មេញ” ។ នេះ​ជា​ការ​ប្រកួត​ដ៏​ពិសេស​មួយ​ដែលក្រុមសិស្សធ្វើប៉មធន់​នឹងរញ្ជួយ​ដី ​ដោយ​​ប្រើ​​តែ​​ឈើ​​​ចាក់​​​ធ្មេញ និង​​កាវ​​ឈើ។

ប៉មរបស់ក្រុមនីមួយៗត្រូវបានដាក់នៅលើបន្ទះឈើប្រវែង ៣០ សង់ទីម៉ែត្រ និងដុំដែកដែលមានកម្រិត​ទម្ងន់​កើន​ជា​លំដាប់​ដាក់​នៅលើកំពូលប៉ម។

បន្ទាប់មកជើងទម្រផ្នែកខាងក្រោមចាប់ផ្តើមញ័រក្លែងធ្វើជារញ្ជួយដី។ នៅពេលដែលរំញ័រផ្តេកកើនឡើង ប៉មនឹង​ដួល​រលំ​ក្រោម​សម្ពាធទម្ងន់ដុំដែក។ ប៉មរបស់ក្រុមណាឈរដល់ទីបញ្ចប់នឹងទទួលបានជ័យជម្នះ។

ការប្រកួតធ្វើប៉មឈើចាក់ធ្មេញទទួលបានជោគជ័យតាំងពីពេលប្រារព្ធធ្វើឡើងដំបូង ហើយចាប់ផ្តើមតាំងនៅឆ្នាំ ២០១១ សាកលវិទ្យាល័យ Sojo បានពង្រីកការចូលរួមរវាងក្រុមសិស្សវិទ្យាល័យ ដោយគោលបំណងលើកកម្ពស់ចំណាប់​​អារម្មណ៍​​របស់​សិស្សវិទ្យាល័យក្នុងការសាងសង់ និងរចនាសម្ព័ន្ធធន់នឹងរញ្ជួយ​ដី។

ដើម្បី​ទទួល​បាន​ការ​អនុញ្ញាត​ឱ្យ​ចូល​រួម​ក្នុង​ការ​ប្រកួត ប៉មឈើចាក់ធ្មេញត្រូវតែមានកម្ពស់យ៉ាងតិច ៥០ សង់ទីម៉ែត្រ និង​ទម្ងន់​ក្រោម ៦៥ ក្រាម។ ប៉មត្រូវបិទជាប់នឹងបន្ទះឈើនីមួយៗ ដើម្បីកុំឱ្យវារអិលចេញពេលបន្ទះ​ឈើ​ញ័រ។

“ការប្រកួតរញ្ជួយដីនៃប៉មឈើចាក់ធ្មេញ” ត្រូវបានរចនាឡើងដើម្បីជំរុញភាពច្នៃប្រឌិត ស្មារតីជាក្រុម និងបង្កើនចំណាប់អារម្មណ៍លើរចនាសម្ព័ន្ធដែលធន់នឹងរញ្ជួយដី។

នៅឆ្នាំ ២០២១ ការ​ប្រកួត​ធ្វើ​ឡើង​នៅ​ថ្ងៃ​ទី ៣០ និង ៣១ ខែ​តុលា ដោយមានតែតំណាងក្រុមម្នាក់ត្រូវបានអនុញ្ញាត​ឱ្យ​ចូល​ទីលាន ដើម្បីធានាបាននូវការអនុវត្តត្រឹមត្រូវនៃការរឹតបន្តឹងការពារការឆ្លងក្នុងអំឡុងពេលជំងឺ​រាត​ត្បាត​កូវីដ ១៩ ។

Hana