កំណត់ត្រារបស់ជនល្មើសដែលបង្ហាញពី “ករណីបង្កអគ្គិភ័យសម្លាប់មនុស្សនៅអគារទីក្រុង Osaka”

ទើបតែកាលពីឆ្នាំមុន អ្នកប្រហែលជាមិនទាន់ភ្លេចករណីបង្កអគ្គិភ័យសម្លាប់មនុស្សនៅអគារ Kitashinchi ទី​ក្រុង Osaka ទេ។ នេះ​បើ​តាម​ព័ត៌មាន​ពី​ប៉ូលិស​មូលដ្ឋាន ជនល្មើស Morio Tanimoto (ស្លាប់នៅថ្ងៃទី ៣០ ខែធ្នូ ឆ្នាំនោះ) ផែនការលម្អិតរបស់ជននេះត្រូវបានរក្សាទុក ក៏ដូចជាឯកសារពាក់ព័ន្ធ និងកំណត់ត្រាមុនពេលប្រព្រឹត្តបទ​ឧក្រិដ្ឋ​ក្នុង​ស្មាត​ហ្វូន។

ទូរស័ព្ទ​ត្រូវ​​គេ​រក​ឃើញ​នៅ​ជាន់​ទី​ ៤ ​នៃ​អគារ​កើតហេតុ​ បន្ទាប់ពីធ្វើការវិភាគ ប៉ូលីសបានរកឃើញ “តើ​អ្វីទៅជាករណី​ហិង្សា​​ដ៏​​អាក្រក់​​បំផុត​នៅ​ប្រទេស​ជប៉ុន​?” ឬ “ខ្ញុំចង់ទាក់ទាញការចាប់អារម្មណ៍ យ៉ាងហោចណាស់នៅពេលខ្ញុំស្លាប់” ក្រៅពីនេះខ្លឹមសារករណីមុននោះ គ្រោះថ្នាក់កន្លងមកមានជនរងគ្រោះ​ជា​ច្រើន​ដូច​ជា “ករណីបង្កអគ្គិភ័យ​ដុត​ស្ទូឌីយ៉ូ Kyoto Animation” ឆ្នាំ ២០១៩ ឬ “ករណីភ្លើងឆេះហាង Sennichi Mae” ឆ្នាំ ១៩៧២ ។ ជនល្មើស​ក៏បាន​រក្សា​​ទុក​​ឯកសារ​ជាច្រើន​ពាក់ព័ន្ធ​នឹង​ឃាតកម្ម​ឬ​ការ​ដុត​បំផ្លាញ​។

ជននេះចុះឈ្មោះទូរស័ព្ទនៅថ្ងៃទី ២៣ ខែឧសភាឆ្នាំមុន។ នៅខែក្រោយ (ខែមិថុនា) Morio Tanimoto កត់ត្រាស្ថាន​ភាព​រៀប​ចំ​ប្រព្រឹត្តបទឧក្រិដ្ឋដោយប្រើកម្មវិធីកត់ត្រាកាលវិភាគ ជាពិសេស៖

ថ្ងៃទី ១៤ ខែមិថុនា៖ បើកទ្វារជាន់ទី ២ វាស់វែងតួលេខបច្ចេកទេស

ថ្ងៃទី ៩ ខែកញ្ញា៖ វេលាម៉ោង ៩:១៣ នាទីយប់ វេជ្ជបណ្ឌិតចេញពីអាគារពីច្រកទ្វារជាន់ទីមួយ

ថ្ងៃទី ៥ ខែវិច្ឆិកា៖ រឿងដាក់កាវទៅក្នុងបំពង់ពន្លត់អគ្គីភ័យនឹងកាន់តែងាយប្រសិនបើគ្មានអ្នកដើរទៅមក។

កំណត់ចំណាំរបស់ជននេះនៅថ្ងៃកើតហេតុគឺ “ត្រូវពិនិត្យមើលដែកកេះ Zippo អុជភ្លើងឆេះអត់” ។

ក្រៅពីនេះមិនរក្សាទុកលេខទំនាក់ទំនងក្នុងបញ្ជីរាយឈ្មោះទូរស័ព្ទ ប្រវត្តិការហៅទូរស័ព្ទកត់ត្រាតែការហៅទៅកាន់ក្រុមហ៊ុនអគ្គិសនីឬឧស្ម័នហ្គាសប៉ុណ្ណោះ ឃើញ​ថា​ជន​នេះ​ធ្វើដោយខ្លួនឯង។ លើស​ពី​នេះបញ្ជាក់​ថាជនល្មើសមាន​ជីវភាពខ្វះខ្វាត។ កាលពីខែមករា ឆ្នាំ ២០១៥ ក្នុងគណនីធនាគាររបស់ជននេះដាក់ប្រាក់ប្រហែល ១,៥ លានយ៉េន បន្ទាប់មកចំនួន​ប្រាក់​ថយ​ចុះបន្តិចម្តងៗ។ រហូតដល់ខែមករាឆ្នាំមុន សមតុល្យគណនីស្មើសូន្យ។ ហើយនៅខែឧសភា អគ្គិសនី និងឧស្ម័នត្រូវផ្តាច់នៅកន្លែងដែលជននេះរស់នៅ Konohana-ku ទីក្រុង Osaka ។

នៅខែមីនា ឆ្នាំ ២០១៧ Tanimoto ចាប់ផ្តើមទៅកាន់គ្លីនិកដោយត្អូញត្អែរថា “ខ្ញុំគេងមិនលក់” ។ រហូត​មក​ដល់​ថ្ងៃ​ទី ​៣ ខែ​ធ្នូ ឆ្នាំ​មុន គាត់បានទៅជួបគ្រូពេទ្យ ១១២ ដង។ ក្នុងទូរស័ព្ទមិនបានកត់ត្រាព័ត៌មាន​ដែល​បង្ហាញ​ថា​បុគ្គល​​​នេះ​​​មាន​​ការ​​មិន​​ពេញ​ចិត្ត ឬ​មាន​បញ្ហា​ជាមួយ​នឹង​គ្លីនិក​នោះ​ទេ។

*** ករណីអគ្គីភ័យកើតឡើងនៅថ្ងៃទី ១៧ ខែធ្នូ ឆ្នាំ ២០២១ គ្លីនិកព្យាបាលរោគផ្លូវចិត្តនៅជាន់ទី ៤ នៃអគារ Kita-ku Osaka ត្រូវអគ្គីភ័យបំផ្លាញ សម្លាប់មនុស្ស ២៥ នាក់ ស្រីម្នាក់រងរបួសធ្ងន់។ នាយកដ្ឋានប៉ូលីសមូលដ្ឋានបានបញ្ជាក់​ថា​ករណីជាប់ពាក់ព័ន្ធនឹង Tanimoto ។ គាត់​ត្រូវ​​គេ​បញ្ជូន​ទៅ​កាន់​មន្ទីរពេទ្យ​ក្នុងស្ថានភាពគ្រោះថ្នាក់ ហើយ​​ស្លាប់​ក្នុង​រយៈពេល ១៣ ថ្ងៃ​ក្រោយ​មក។ ក្នុង​ចំណោម​ជន​រង​គ្រោះទាំង ​២៥​ នាក់​ដែល​បាន​ស្លាប់ មាន​ ២៤​ នាក់​​ស្លាប់​​ដោយ​​សារ​​ពុល​ carbon monoxide (CO) ។

Sacchan