ករណីផ្ទុះភ្នំភ្លើងក្រោមដីនៅ Tonga ឆ្ងាយពីជប៉ុនដល់ទៅ ៨០០០ គីឡូម៉ែត្រនៅតែបង្កការខូចខាតធ្ងន់

កាលពីប៉ុន្មានថ្ងៃមុនមានករណីផ្ទុះភ្នំភ្លើងក្រោមដីនៅសមុទ្រ Tonga មហាសមុទ្រប៉ាស៊ីហ្វិកខាងត្បូង។

នៅ Fiji ដែលមានចម្ងាយ ៨០០ គីឡូម៉ែត្រ គេស្តាប់ឮសំឡេងហឹងត្រចៀកស្រដៀងនឹងសំឡេងផ្គរលាន់ខ្លាំង។ ថ្វីត្បិត​មិន​ទាន់​ច្បាស់​ស្ថានភាព ប៉ុន្តែឃើញថាការផ្ទុះប៉ះពាល់យ៉ាងខ្លាំងដល់ពិភពលោក។

សូម្បីតែប្រទេសជប៉ុនដែលមានចម្ងាយរហូតដល់ ៨០០០ គីឡូម៉ែត្រក៏ទទួលបានសេចក្តីជូនដំណឹងរលកយក្ស​ស៊ូណាមិ​ផង​ដែរ។

ទោះបីជារលកសមុទ្រមិនធំ ហើយសេចក្តីជូនដំណឹងរលកយក្សក៏ត្រូវបានលុបចោល ប៉ុន្តែនៅតែមានការខូចខាតយ៉ាងច្រើន តើអ្នកដឹងរឿងនេះទេ?

នៅតាមបណ្តាខេត្ត Miyagi, Kochi, Tokushima ទូកនេសាទសរុបចំនួន ៣០ ត្រូវវាយពន្លិច ក្រឡាប់។ លើសពីនេះ​ក្រុម​ហ៊ុន​វារីវប្បកម្មដូចជាអយស្ទ័រ លៀសសមុទ្រ និងសារ៉ាយសមុទ្រនៅ Iwate និង Miyagi ក៏ទទួលរងការ​ខាត​បង់​យ៉ាង​​ធ្ងន់​​ធ្ងរ។

ទោះបីជារលកយក្សមានកម្ពស់ត្រឹមតែ ៣០ សង់ទីម៉ែត្រ ប៉ុន្តែជាងពាក់កណ្តាលកន្លែងចិញ្ចឹមវារីវប្បកម្មត្រូវបំផ្លាញនៅ​ក្នុង​តំបន់​មួយ​ចំនួន។

តំបន់ទាំងនេះក៏រងការខូចខាតយ៉ាងធ្ងន់ធ្ងរពីគ្រោះមហន្តរាយក្នុង ២០១១ ។ នៅពេលដែលគិតថាអាចស្តារឡើងវិញ ស្រាប់តែជំងឺកូវីដ ១៩ វាយប្រហារ។ ដោយសារការរឹតបន្តឹងអនុវត្តចំពោះភោជនីយដ្ឋាន ការទទួលទានអាហារសមុទ្រក៏រងផលប៉ះពាល់ផងដែរ។

ហើយលើកនេះជាគ្រោះមហន្តរាយ Tonga ។

ទោះបីជាអ្នកនេសាទបានបញ្ចប់ការដឹកជញ្ជូនអយស្ទ័រដែលប្រមូលផលក្នុងរដូវកាលនេះ ប៉ុន្តែនេះក៏ជាពេលចិញ្ចឹមថ្មីដែលរំពឹងថានឹងដឹកជញ្ជូននៅរដូវស្លឹកឈើជ្រុះឆ្នាំក្រោយ។

ខ្ញុំមិនដឹងថាស្ថានភាពអាចស្តារឡើងវិញបានដល់កម្រិតណានោះទេ ប៉ុន្តែ​ការ​លំបាក​នៃ​ឧស្សាហកម្ម​វារីវប្បកម្ម​ត្រូវ​បាន​​គេ​​រំពឹង​​ថា​នឹង​បន្ត​ ហើយត្រូវចំណាយ​ពេល​ប៉ុន្មាន​ឆ្នាំ​ទើបអាចស្តារឡើងវិញ។

Kengo Abe