ជប៉ុន​កំពុង​សាកល្បងជើងហោះហើរអនុញ្ញាតឱ្យម្ចាស់ និងសត្វចិញ្ចឹមអាចធ្វើដំណើរជាមួយគ្នា

ប្រសិនបើអ្នកធ្លាប់ចិញ្ចឹមសត្វ មិនថាឆ្កែ ឆ្មា Hamster ជាដើម អ្នកប្រហែលជាគិតថាសត្វចិញ្ចឹមជាសមាជិកម្នាក់ក្នុង​គ្រួសារ។ ហេតុ​នេះបានជាមានសេវាកម្មកាន់តែច្រើនអនុញ្ញាតឱ្យម្ចាស់ និងសត្វចិញ្ចឹមមានពេលវេលារីករាយដូចជា៖

ទៅកាន់ហាងកាហ្វេសត្វចិញ្ចឹមជាមួយគ្នា។

ស្នាក់នៅផ្ទះសំណាក់សត្វចិញ្ចឹម។

ហើយថែមទាំងអាចត្រាំ Onsen ជាមួយគ្នាផងដែរ។

ចំពោះការធ្វើដំណើរ បើ​ប្រើ​ឡាន​ផ្ទាល់​ខ្លួន​មិន​មាន​បញ្ហា​ក្នុងការដឹកជញ្ជូនសត្វចិញ្ចឹមនោះទេ ប៉ុន្តែបញ្ហាស្ថិតលើការដឹកជញ្ជូនសាធារណៈ ជា​ពិសេស​យន្តហោះ។

ឥឡូវនេះអ្នកអាចដឹកជញ្ជូនសត្វចិញ្ចឹមតាមយន្តហោះ ប៉ុន្តែត្រូវទុកកន្លែងដាក់ឥវ៉ាន់។ ព្រោះតែចាត់ទុកសត្វចិញ្ចឹមដូចសមាជិកគ្រួសារ បានជាម្ចាស់សត្វ​មិនចង់ធ្វើដូច្នេះ។ សត្វចិញ្ចឹមដូចជាកូនក្មេងអញ្ចឹង នៅឆ្ងាយអ្នកវាមិនសប្បាយ​ចិត្ត​ទេ ទាំងបារម្ភបរិយាកាសនៅកន្លែងដាក់ឥវ៉ាន់មានសុវត្ថិភាពដែរអត់ ក្តីបារម្ភជាច្រើនធ្វើឱ្យម្ចាស់មិនចង់យកសត្វចិញ្ចឹម​ធ្វើដំណើរតាមយន្តហោះ។

ក្នុងនាមជាម្ចាស់សត្វចិញ្ចឹម ប្រហែលជាអ្នកចង់ឱ្យសេវាកម្មអាកាសចរណ៍អនុញ្ញាតឱ្យនាំសត្វចិញ្ចឹតាម ហើយដាក់នៅជិតកន្លែងអង្គុយរបស់អ្នក។

ដើម្បីឆ្លើយតបទៅនឹងតម្រូវការនោះ ក្រុមហ៊ុនអាកាសចរណ៍ StarFlyer បានធ្វើការសាកល្បងជើងហោះហើរដែលអនុញ្ញាតឱ្យសត្វចិញ្ចឹមអាចរួមដំណើរ។ ក្នុងអំឡុងពេលទទួលយកបទពិសោធន៍នេះ អ្នកដំណើរអាចនាំសត្វចិញ្ចឹម (ឆ្កែ និងឆ្មា) ឡើងអង្គុយលើយន្តហោះពី Haneda ទៅ Kitakyuushuu ។ ចូលរួមដំណើរហោះហើរសាកល្បងមានទាំងអ្នកដំណើរអាឡែស៊ីនឹងរោមសត្វ។ ដូច្នេះម្ចាស់​ត្រូវ​ដាក់​សត្វ​ចិញ្ចឹម​របស់​ខ្លួន​ក្នុង​ទ្រុង​ឯកទេស ដើម្បី​ការពារ​មិន​ឱ្យ​រោមហើរ​ទៅ​គ្រប់​ទីកន្លែង។

រូបភាព https://news.yahoo.co.jp/articles/e5a2b92e554ca0a868d10420435e4a9b14c5efd5/images/000

នៅលើយន្តហោះកៅអីជួរចុងក្រោយសម្រាប់តែសត្វចិញ្ចឹមប៉ុណ្ណោះ។ នៅពេលយន្តហោះចេញដំណើរអ្នកដែលមានសត្វ​ចិញ្ចឹមមានអាទិភាពទទួលបានការណែនាំឡើងយន្តហោះមុន។ ពេលចុះចតពួកគេត្រូវរង់ចាំអ្នកដំណើរធម្មតា​ទាំងអស់ចុះពីយន្តហោះមុនម្តង។ តាមរបៀបនេះអ្នកដំណើរមានសត្វចិញ្ចឹមនឹងស្ងប់ចិត្ត ព្រោះអាចកាត់បន្ថយ​ផល​ប៉ះពាល់ដល់អ្នកដំណើរផ្សេងទៀត។

ក្រៅពីនេះពេលចុះចត អ្នកដំណើរនឹងត្រូវបានបញ្ជាក់បន្ថែមអំពីមធ្យោបាយធ្វើដំណើរពីអាកាសយានដ្ឋានទៅកាន់កន្លែងស្នាក់នៅ។

សត្វចិញ្ចឹមដូចជាសមាជិកសំខាន់ក្នុងគ្រួសារ ក្នុងនាមជាម្ចាស់សត្វចិញ្ចឹម យើងប្រាកដជាចង់យកសត្វចិញ្ចឹមទៅ​ជា​មួយ​គ្រប់​ទី​កន្លែង។

ដោយផ្ទាល់ ខ្ញុំកំពុងទន្ទឹងរង់ចាំលទ្ធផលនៃជើងហោះហើរសាកល្បងនេះ។

Kengo Abe