រឿងរ៉ាវសាមូរ៉ៃ Saigo Takamori ជាវីរៈបុរសលំដាប់លេខមួយក្នុងដួងចិត្តប្រជាជនជប៉ុន

Saigo Takamori ជាសាមូរ៉ៃចុងក្រោយនៃប្រទេសជប៉ុន ដែលបានបង្កើតយុគសម័យថ្មី បន្ទាប់មកងើបឈរបះ​បោរ​​ប្រឆាំង​នឹង​សម័យ​កាលនោះ ហើយ​​ត្រូវ​​បាន​​គេ​​គោរព​​បូជា​ដូច​​​វីរបុរស។

នៅ Ueno ទីក្រុងតូក្យូមានរូបសំណាកសំរិទ្ធរបស់សាមូរ៉ៃរូបនេះ សម្លឹងមើលទៅកាន់ទីក្រុងយ៉ាងស្ងៀមស្ងាត់។

រូបសំណាកនេះមើលទៅស្ងប់ស្ងាត់ដូចជាកំពុងរៀបរាប់ប្រវត្តិសាស្ត្រវីរភាពរបស់វីរៈបុរសសាមូរ៉ៃដ៏ល្បីឈ្មោះ។

ដូចអ្នកទាំងអស់គ្នាដឹងហើយថាក្នុងសម័យសាមូរ៉ៃ ថ្វីត្បិតតែអធិរាជជាអ្នកដឹកនាំ ប៉ុន្តែជាក់ស្តែងអំណាចពិតប្រាកដស្ថិតលើសាមូរ៉ៃ។ នៅចុងសម័យសាមូរ៉ៃជាសម័យអេដូ ដែលគ្រប់គ្រងដោយគ្រួសារ Tokugawa ។ បន្ទាប់​មក​មាន​កំណែទម្រង់​ជា​បន្តបន្ទាប់​ក្រោម​ឥទ្ធិពល​របស់​ប្រទេស​លោកខាងលិច បញ្ចប់សម័យសាមូរ៉ៃមានរយៈពេលប្រហែល ២៦០ ឆ្នាំ។

កប៉ាល់បើកដោយចំហាយទឹកដ៏ធំដែលជនជាតិជប៉ុនមិនធ្លាប់ឃើញពីមុនមក ប្រទេសលោកខាងលិចបានគំរាមប្រើកម្លាំងបង្ខំប្រទេសនេះឲ្យបើកទ្វារ។

ក្នុងបរិបទ​ដែល​ប្រទេស​កំពុង​បែកបាក់​គ្នា​ដោយសារ​ការ​ជជែក​ដេញដោល​​យ៉ាង​ខ្លាំង​អំពី​ការ​បន្ត “បិទទ្វារ” ដូចបច្ចុប្បន្ន ឬបើកទ្វារតាមសំណើរបស់ប្រទេសលោកខាងលិច របប Bakufu ដួលរលំដោយជ័យជំនះរបស់ក្រុមប្រឆាំង បើកផ្លូវទៅកាន់ប្រទេសជប៉ុនទំនើប។

បុគ្គលដែលសកម្មបំផុតក្នុងរដ្ឋប្រហារទាំងនេះគឺ Saigo Takamori ប៉ុន្តែលោកក៏ជាអ្នកប្រកាសសង្រ្គាមជាមួយរដ្ឋាភិបាលថ្មីផង​ដែរ ហើយនៅទីបំផុតធ្វើអត្តឃាតខ្លួនឯង។ ចំពោះសកម្មភាពទាំង​នេះ មនុស្សមួយចំនួនគិតមិនយល់ អ្នក​​ខ្លះ​គិត​ថា​គាត់​គ្រាន់​តែ​ជា​អ្នក​បង្ក​ជម្លោះ។

ដើមឡើយ Saigo ជាមន្ត្រីមានឋានៈខ្ពស់ ទទួលភារកិច្ចត្រួតពិនិត្យគុណភាពស្ពាន ផ្លូវ។ គាត់បានស្នើទៅកាន់ថ្នាក់​លើ​អំពី​គោល​នយោបាយកសិកម្មម្តងហើយម្តងទៀត ហើយចាប់តាំងពីពេលនោះត្រូវបានវាយតម្លៃខ្ពស់។ ទោះបីជាក្នុង​​រយៈ​​​ពេល​​ខ្លី គាត់បានបង្កើតបណ្តាញភ្ជាប់សាមូរ៉ៃតាមតំបន់ចូលគ្នា។

Saigo ធ្លាប់​​និយាយ​ចំៗ​អំពី​ចំណុច​ខ្វះខាត​របស់​ជប៉ុន និងស្នើ​កំណែទម្រង់ ហើយ​ទទួល​បាន​ការ​គាំទ្រជា​ច្រើន​។ គួរឲ្យ​ស្តាយចាប់តាំងពីពេលអ្នកជួយលោកស្លាប់ Naosuke Ii នៃក្រុមអភិរក្សនិយមគ្រប់គ្រង Bakufu គាបសង្កត់ Saigo យ៉ាងព្រៃផ្សៃរហូតធ្វើឲ្យគាត់គិតចង់ធ្វើអត្តឃាត។ ជាការពិត Saigo ជាមនុស្សមនោសញ្ចេតនា គ្មានល្បិច​កល មិនសមនឹងនាមជាសាមូរ៉ៃមួយរូបឡើយ។

បុគ្គលនេះធ្លាប់មានបទពិសោធន៍រស់នៅលើកោះដាច់ស្រយាលរយៈពេល ៥ ឆ្នាំ។ ចាប់ពីអាយុ ៣១ ដល់ ៣៦ ឆ្នាំ គាត់ក្លាយជាឧក្រិដ្ឋជន ហើយត្រូវនិរទេសព្រោះតែធ្វើឲ្យ​អ្នកគ្រប់គ្រងមូលដ្ឋានសម័យនោះខឹង។

ការ​រស់​នៅ​លើ​កោះធ្វើឲ្យគាត់មានពេលសញ្ជឹង​គិត​ពី​ជីវិត អំពីកិច្ចការដែលគាត់គួរសម្រេចនៅថ្ងៃក្រោយ។ ក្នុង​កំឡូង​​ពេល​នោះ លោកបានបន្សល់ទុកពាក្យសម្តីដូចខាងក្រោម៖

ដោយ​សារ​មាន​កិច្ចការ​ជា​ច្រើនដែល​​ត្រូវ​ធ្វើ បានជាទេវតាសង្គ្រោះជីវិតខ្ញុំ

ហេតុ​នេះបន្ទាប់ពីយើងបានបំពេញការងារដែលត្រូវធ្វើ ទេវតាក៏មកដកយកជីវិត

ដូច្នេះនៅពេលដែលទេវតាប្រើយើង យើងត្រូវបំពេញបេសកកម្មរបស់ខ្លួន

លោក​បាន​សរសេរ​សំបុត្រ​បន្សល់​ទុក​អក្សរ​បួន​តួ 敬天愛人 (Keitenaijin) – មាន​ន័យ​ថា​គោរពទេវតា ស្រឡាញ់​មនុស្ស។

រូបភាព https://www.nippon.com/ja/views/b07204/

ក្រោយមកនៅឆ្នាំ ១៨៦៤ Saigo បានវិលត្រឡប់មកនយោបាយវិញក្នុងនាមជាមេបញ្ជាការយោធានៃ Satsuma ។

ជាមួយនឹងសម្ព័ន្ធមិត្តរបស់ខ្លួន Saigo ដឹកនាំកងទ័ពទៅភាគខាងជើង ទម្លាក់ទីក្រុងក្យូតូ បន្ទាប់មកអេដូ (ទីក្រុង​​តូក្យូ​សព្វ​ថ្ងៃ) ។ លោកមិនបានប្រយុទ្ធនៅអេដូ ហើយក៏មិនចាំបាច់បង្ហូរឈាម នៅ​តែ​រំដោះក្រុងដោយជោគ​ជ័យ។

លទ្ធផលគាត់បានធ្វើឲ្យសម័យអេដូវិនាស ហើយក្នុងពេលជាមួយគ្នានេះបើកផ្លូវឆ្ពោះទៅកាន់យុគសម័យទំនើប​នៃ​រដ្ឋាភិបាល Meiji ។ ចូលរួមបដិវត្តដ៏អស្ចារ្យនេះជាមួយ Saigo រួមមាន Toshimichi Okubo និង Takayoshi Kido ដែលសរុបមានវីរបុរស ៣ រូប។ ទោះជាយ៉ាងណា គុណសម្បត្តិធំនៅតែជារបស់ Saigo ប្រសិនបើមិន​ពឹង​លើ​ជំនាញបញ្ចុះបញ្ចូលដ៏ឆ្នើមរបស់ Saigo ទេ តំបន់អេដូទាំងមូលនឹងធ្លាក់ក្នុងភ្លើងឆេះ។

ថ្វីត្បិតតែមិនអាចប្រៀបនឹងអ្នកនយោបាយពីរនាក់ផ្សេងទៀត ប៉ុន្តែបើនិយាយពីទឹកចិត្តរបស់ប្រជាជន គ្មាននរណាម្នាក់អាចប្រៀបនឹង Saigo នោះទេ។ នៅពេលដែលរដ្ឋាភិបាល Meiji ត្រូវបានបង្កើត Saigo ឡើងឋានៈជាឧត្តមសេនីយ៍កងទ័ពទៅហើយ។

នៅលើផ្លូវទំនើបភាវូបនីយកម្ម ជប៉ុនលេចឡើងចលនា​ដណ្តើម​យក​កូរ៉េ​។ ដោយបរាជ័យក្នុងការជជែកពិភាក្សាជុំវិញបញ្ហានេះ Saigo ត្រឡប់ទៅស្រុកកំណើតនៅ Kagoshima វិញ។

អំឡុងពេលនោះ គាត់រស់នៅយ៉ាងស្រួលនៅស្រុកកំណើតដោយពឹងលើ​កសិផល និង​បរបាញ់​សត្វ​ព្រៃ។ ប៉ុន្តែនៅឆ្នាំ ១៨៧៧ ព្រោះតែអតីតសមមិត្តពីមុនអូសទាញ Saigo ចូលរួមក្នុងការបះបោរប្រឆាំងនឹងរដ្ឋាភិបាល Meiji ដែល​ហៅថា “ការបះបោរ Satsuma” ។ ការបះបោរបរាជ័យ គាត់ធ្វើអត្តឃាតខ្លួនឯងនៅអាយុ ៤៩ ឆ្នាំ រឿងនេះ​ក៏​ត្រូវ​​គេ​ចាត់​ទុក​ថា​ជា​សង្គ្រាម​ស៊ីវិល​ចុង​ក្រោយ​របស់​ជប៉ុន​ផង​ដែរ។

Saigo បានក្លាយជាគំរូតួអង្គក្នុងរឿង The Last Samurai ដែលជាតួឯកសម្តែងដោយកំពូលតារា Tom Cruise ។ តួអង្គ​នេះត្រូវបានសម្តែងដោយ Ken Watanabe ជាសាមូរ៉ៃដែលប្រយុទ្ធជាមួយតួអង្គ Tom Cruise ។

ថ្វីត្បិតតែ ចាកចេញក្នុងនាមជាអ្នកបះបោរម្នាក់ នៅឆ្នាំ ១៨៨៩ កិត្តិយសរបស់វីរបុរសត្រូវបានស្តារឡើងវិញក្រោយ​លើក​លែង​ទោស។

រយៈពេល ១៥០ ឆ្នាំបានកន្លងផុតបន្ទាប់ពីការបង្កើតរដ្ឋាភិបាល Meiji ដោយសារតែបរាជ័យក្នុងសង្រ្គាម ស្ថាប័នរបស់ជប៉ុនក៏ផ្លាស់ប្តូរតិច ឬច្រើន ប៉ុន្តែនៅតែធ្វើតាមគោលការណ៍របស់ Meiji ។ ការផ្លាស់ប្តូរគោលនយោបាយទាំងនេះ គឺជារឿងដែល Saigo វីរៈបុរសលំដាប់លេខមួយក្នុងដួងចិត្តប្រជាជនជប៉ុនពេលនោះគោរពបូជា រហូតដល់​បាត់​​បង់​កិត្តិ​យស​របស់ខ្លួន។

យើងដែលជាជនជាតិជប៉ុនជំនាន់ក្រោយតែងតែត្រូវបានបង្រៀនថា គោលការណ៍របស់ Meiji គឺត្រឹមត្រូវ។ ជាការពិតនោះជាទ្រឹស្តីរបស់អ្នកឈ្នះ អ្នកចាញ់គ្មានសិទ្ធិលើកសីលធម៌នោះទេ។

The Last Samurai

ប្រទេសមួយនៅក្នុងឧត្តមគតិរបស់ Saigo ហើយក៏ជាមូលហេតុដែលគាត់សុខចិត្តប្រថុយជីវិតដើម្បីប្រយុទ្ធ មិនត្រឹម​តែ​ជន​ជាតិ​ជប៉ុនប៉ុណ្ណោះទេ សូម្បីតែពិភពលោកទាំងមូលក៏​គួរ​គិត​ឲ្យ​បានម៉ត់ចត់ចំពោះរឿងនេះ។

Kengo Abe