ភ្នំហ្វូជីនឹងផ្ទុះនៅថ្ងៃណាមួយ ទោះមិនបណ្តាលអោយគ្រោះថ្នាក់ដល់មនុស្ស ប៉ុន្តែមិនត្រូវធ្វេសប្រហែសឡើយ

ភ្នំហ្វូជីគឺជាកន្លែងមួយដែលមានទេសភាពទាក់ទាញ និយាយពីកម្ពស់ទោះបីភ្នំហ្វូជីមិនអាចប្រៀបនឹងភ្នំផ្សេងទៀត​​នៅលើពិភពលោក ប៉ុន្តែរូបរាងភ្នំមានតុល្យភាព ស្រស់ស្អាត លើសពីនេះទេសភាពធម្មជាតិប្លែកៗ ធ្វើឱ្យរូបភាព​​ភ្នំ​ហ្វូជីកាន់តែល្បីមិនត្រឹម​តែនៅប្រទេសជប៉ុនប៉ុណ្ណោះទេ ថែមទាំងល្បីនៅលើពិភពលោកទៀតផង។

រូបភាព https://gunosy.com/articles/ePHVu?s=s

ទោះជាយ៉ាងណាវានៅតែជាភ្នំភ្លើង។

ភ្នំភ្លើង​ដែល​កើត​ចេញ​ពី​បន្ទុះភ្នំភ្លើងត្រូវ​បាន​បែង​ចែក​ជា ៣ ប្រភេទ។

ដំបូងគេគឺ (Shikazan) សំដៅលើភ្នំភ្លើងដែលបានរលត់ លែងមានលទ្ធភាពផ្ទុះ បន្ទាប់មកគឺ (Kyuukasan) សំដៅ​លើភ្នំភ្លើងដែលកំពុងដេកលក់ អសកម្មបណ្តោះអាសន្ន និងជាចុងក្រោយគឺ (Katsukazan) ជាភ្នំភ្លើងសកម្ម។

កាលខ្ញុំនៅតូច ភ្នំហ្វូជីត្រូវគេរាប់ក្នុងប្រភេទភ្នំដែលកំពុងដេកលក់ ប៉ុន្តែការបែងចែកបច្ចុប្បន្នទៅជាភ្នំភ្លើងសកម្ម។ ភ្នំហ្វូជីគឺជាភ្នំភ្លើងមួយក្នុងចំណោមភ្នំភ្លើងសកម្មទាំង ១០៨ នៅទូទាំងប្រទេសជប៉ុន ប៉ុន្តែមិនដឹងថាពេល​ណា​នឹង​ផ្ទុះ​នោះទេ។ កម្រិត​គ្រោះ​ថ្នាក់របស់ភ្នំទាំង​នេះខ្ពស់ខ្លាំងណាស់ ព្រោះពិបាកក្នុងការព្យាករណ៍។

តាមរយៈលទ្ធផលសង្កេតសកម្មភាពដែលនៅសេសសល់ ករណីផ្ទុះកាលពីឆ្នាំ ៧៨១ រហូតមកដល់ពេលនេះ​កត់​សម្គាល់​ឃើញ​ថា​ករណី​ភ្នំភ្លើងផ្ទុះចំនួន ១៧ ដង ដូច្នេះជាមធ្យមភ្នំភ្លើងនឹងផ្ទុះរាល់ ៧៣ ឆ្នាំម្តង។

ភ្នំភ្លើងផ្ទុះនៅពេលដែល Magma ខាងក្នុងប្រមូលផ្តុំឈានដល់កម្រិត ហើយផ្ទុះក្នុងពេលតែមួយ។ ទាំងនេះមាន​ន័យ​ថា ប្រសិនបើភ្នំភ្លើងមិនផ្ទុះអស់​រយៈ​ពេល​ជាច្រើនឆ្នាំ បរិមាណ Magma ដែលប្រមូលផ្តុំនៅក្រោមដីច្រើន នឹងធ្វើឱ្យការខូចខាតដែលបណ្តាលមកពីបន្ទុះភ្នំភ្លើងធ្ងន់ធ្ងរកាន់តែខ្លាំងឡើង។

ភ្នំហ្វូជីអសកម្មអស់រយៈពេល ៣១៥ ឆ្នាំមកហើយ ចាប់តាំងពីករណីផ្ទុះចុងក្រោយកើតឡើងនៅឆ្នាំ ១៧០៧ ។ នេះ​បើ​យោង​តាមហ្វ្រេកង់ជាមធ្យមដែលបានប៉ាន់ប្រមាណខាងលើ ឃើញថាមួយរយៈពេលបានកន្លងផុតទៅ។ ដូច្នេះមាន​ន័យ​ថា​បរិមាណ Magma នៅក្រោមដីកំពុងកើនឡើងច្រើនលើសពីការគិតទៅទៀត ត្រឹមចំណុចនេះគួរអោយខ្លាច​ណាស់​ទៅ​ហើយ។

និយាយអីញ្ចឹងចំពោះករណីផ្ទុះធំនៅឆ្នាំ ១៧០៧ មុននោះ ៤៩ ថ្ងៃជប៉ុនទទួលរងរញ្ជួយដីដ៏គួរឱ្យភ័យខ្លាចមួយ។ ក្នុងអំឡុងពេលផ្ទុះឆ្នាំ ៨៦៤ មុនពេលផ្ទុះនៅ Kanto ក៏មានរញ្ជួយដីផងដែរ។ ករណីបន្ទុះភ្នំភ្លើងមានច្រើនដែលក្នុងនោះបណ្តាលមកពីរញ្ជួយដី។ ជាក់ស្តែងនៅឆ្នាំ ២០០០ ក៏ធ្លាប់​មាន​ហានិ​ភ័យបន្ទុះភ្នំភ្លើង។ ក្នុងឆ្នាំនោះករណីផ្ទុះភ្នំភ្លើងមួយចំនួនកើតឡើង ចំនួនករណីបន្ទុះភ្នំភ្លើងបណ្តាលមកពីរញ្ជួយដីនៅក្រោមជើងភ្នំហ្វូជីកើនឡើងដោយសារមូលហេតុ​នេះ។ ពាក់កណ្តាលឆ្នាំដំបូងកើតមានរញ្ជួយដីញឹកញាប់ ប៉ុន្តែ​បាន​ស្ងប់ស្ងាត់​ទៅ​វិញ។

គ្រោះមហន្តរាយដ៏ធំដែលបានកើតឡើងនៅឆ្នាំ ២០១១ បួនថ្ងៃបន្ទាប់ពីរញ្ជួយដីធំកើតឡើង តំបន់ក្រោមជើងភ្នំហ្វូជីញ័រយ៉ាងខ្លាំង ក្រុមអ្នកស្រាវជ្រាវនៅ​ពេល​នោះ​បានស្នើសុំឱ្យត្រៀមស្មារតីភ្នំហ្វូជីនឹងផ្ទុះ។

ទោះ​ជា​យ៉ាង​ណា​មក​ទល់​ពេល​នេះ​មិន​ទាន់​មាន​ករណី​ផ្ទុះ​នៅ​ឡើយ​ទេ។ តាមការរាយការណ៍រញ្ជួយដីនៅជិតភ្នំហ្វូជីកើត​ឡើង​ញឹក​ញាប់នៅចុងឆ្នាំ ២០២១ ពិតណាស់អាចកើតមានហានិភ័យផ្ទុះ។

ដើម្បីត្រៀមសម្រាប់ស្ថានភាពអាក្រក់ ចាំបាច់ត្រូវធ្វើត្រាប់តាមអ្វីដែលនឹងកើតឡើងនៅពេលភ្នំភ្លើងផ្ទុះ។ ហានិ​ភ័យ​លេច​ធ្លាយ Magma និងលំហូរកម្អែរ ប៉ុន្តែនោះមិនមែនជាកង្វល់ធំបំផុតឡើយ ព្រោះចំនួនប្រជាជនដែលរស់នៅក្នុងតំបន់នោះមានចំនួនតិចតួច។ ផលប៉ះពាល់ដ៏អាក្រក់បំផុតគឺមកពីផេះភ្នំភ្លើង និងកម្រិតគ្របដណ្តប់យ៉ាងទូលាយ។

រូបភាព https://www.nhk.or.jp/ashitanavi/article/2795.html

ភ្នំហ្វូជីផ្ទុះនឹងបណ្តាលអោយបរិមាណផេះភាយទៅ​លើ​អាកាស មានរយៈកម្ពស់រហូតដល់ ២០ គីឡូម៉ែត្រ។ បន្ទាប់មក​បរិមាណ​ផេះ​នេះត្រូវ​ខ្យល់​បក់​រាល​ដាល​ទៅ​​តំបន់​​ផ្សេងៗ។ ប្រសិនបើ​បរិមាណ​ផេះ​ច្រើន​កកកុញ​លើ​ដំបូល​អគារ អាច​បណ្តាល​​ឱ្យ​អគាររលំ​។ ផេះភ្នំភ្លើងមានមុខងារនាំចរន្តអគ្គិសនី ដូច្នេះប្រសិនបើជាប់នឹងខ្សែភ្លើង អាចបណ្តាលឱ្យដាច់​ចរន្ត​អគ្គិសនី។ តាមការរំពឹងទុកផេះភ្នំភ្លើងនឹងប្រមូលផ្តុំជាង ២ សង់ទីម៉ែត្រក្នុងតំបន់ទីក្រុង។

ប្រហែលជាបន្ទុះភ្នំហ្វូជីមិនបង្កការខូចខាតច្រើនដល់មនុស្សនោះទេ ប៉ុន្តែចំពោះផលប៉ះពាល់ខ្នាតធំរបស់ផេះភ្នំភ្លើង បញ្ហាដាច់ភ្លើង ផ្គត់ផ្គង់ទឹក និងបញ្ហាបង្ហូរទឹកអាចរារាំងយ៉ាងខ្លាំងដល់ជីវិតប្រចាំថ្ងៃ។

អ្នកកុំភ័យស្លន់ស្លោ ប៉ុន្តែត្រូវត្រៀមខ្លួននៅពេលដែលស្ថានភាពខាងលើកើតឡើង។ លើសពីនេះបន្ទុះភ្នំភ្លើងអាចបណ្តាលអោយរូបរាងភ្នំផ្លាស់ប្តូរ ប្រហែលជាភ្នំហ្វូជីលែងមានរូបរាងស្អាតដូចសព្វថ្ងៃទៀតហើយ។ បើ​ដូច្នេះ​មែននេះ​ក៏​ជា​ការ​​បាត់​​បង់​ដ៏​ធំ​របស់​ជប៉ុន​។

Kengo Abe

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: