បាតុភូត Johatsu រលាយបាត់ខ្លួនចេញពីសង្គមព្រោះតែជំពាក់បំណុល សម្ពាធការងារ ឬអាពាហ៍ពិពាហ៍បែកបាក់

លាក់បាំងអត្តសញ្ញាណរបស់ខ្លួន រត់ចេញពីសង្គម និងរស់នៅក្នុងភាពឯកោ នោះជាអ្វីដែលជនជាតិជប៉ុនមួយចំនួន​ធ្វើ​នៅ​ពេល​ជំពាក់​បំណុល សម្ពាធការងារ ឬអាពាហ៍ពិពាហ៍បែកបាក់។ មនុស្សទាំងនោះអាចហៅម្យ៉ាងទៀត​ថា “រលាយបាត់ខ្លួន” ។

តាមគេហទំព័រ Oddity Central (អង់គ្លេស) នៅក្នុងសង្គមជប៉ុនមនុស្ស “រលាយបាត់ខ្លួន” មានច្រើនរហូតដល់ថ្នាក់ជប៉ុនប្រើពាក្យដោយឡែកសំដៅ​លើ​បាតុភូតនេះគឺ “Johatsu” ។ Johatsu មិនមែនបាត់ខ្លួនចេញពីពិភព​លោក​នេះ​ទេ គ្រាន់តែប្តូរឈ្មោះ កន្លែងស្នាក់នៅ និងការងារប៉ុណ្ណោះ ពួកគេហាក់ដូចជាចង់លុបចោលជីវិតកាលពីមុនទាំងស្រុង។

រូបភាព Unplash

ហេតុផលទូទៅបំផុតដែលមនុស្សមួយចំនួនចង់គេចចេញពីជីវិតបច្ចុប្បន្ន ព្រោះតែពួកគេចង់ចាកចេញពីជីវិតដែលមានភាពតានតឹង។

ទោះជាយ៉ាងណាមានកត្តាវប្បធម៌មួយចំនួនដែលបានធ្វើឱ្យបាតុភូតនេះពេញនិយមនៅប្រទេសជប៉ុន ជាជាងកន្លែងផ្សេងទៀតនៅលើពិភពលោក។ ជន​ជាតិ​ជប៉ុនអាម៉ាស់មុខនៅពេលត្រូវប្រឈមនឹងបំណុលគ្រួសារ អាពាហ៍​ពិពាហ៍​បែក​បាក់ ឬសម្ពាធការងារដ៏អាក្រក់ ជនជាតិជប៉ុនច្រើនមិនអាចទទួល​យក​បាន។

សម្ពាធក្នុងជីវិតធ្វើឱ្យពួកគេមិនមានជម្រើស ពួកគេសុខចិត្តបញ្ចប់ជីវិតខ្លួនឯងឬធ្វើការមិនឈប់រហូតដល់ស្លាប់ ជាជាងបាត់បង់មុខមាត់។ មនុស្សជាច្រើនត្រូវបង្ខំឱ្យក្លាយជា Johatsu ។

សង្គមវិទូជប៉ុនលោក Hiroki Nakamori បានសិក្សាបាតុភូត Johatsu នៅក្នុងប្រទេសជប៉ុនអស់រយៈពេលជាច្រើន​ឆ្នាំ។ គាត់បាននិយាយថាពាក្យ “រលាយបាត់ខ្លួន” ចាប់ផ្តើមប្រើនៅក្នុងប្រទេសអាស៊ីភាគឦសានក្នុងទសវត្សរ៍​ទី ៦០ នៅពេលដែលមនុស្សយល់ថាបាត់ខ្លួនចេញពីជីវិត ជារឿងងាយស្រួលបំផុតសម្រាប់ខ្លួនឯង និងក្រុមគ្រួសាររបស់ពួកគេ។ ប្រឈមនឹងសម្ពាធ​ដែល​មើល​ទៅ​ហាក់​ដូច​ជា​មិន​អាចឆ្លងផុតក្នុងជីវិត។

លោក Hiroki Nakamori និយាយថា “នៅប្រទេសជប៉ុន រឿងនេះហាក់ដូចជាងាយស្រួល។ ប៉ូលីសមិនជ្រៀតជ្រែកក្នុងជីវិតឯកជនរបស់ពលរដ្ឋនោះទេ លុះត្រាតែមានហេតុផលពិសេស ដូចជាបទឧក្រិដ្ឋឬគ្រោះថ្នាក់។ សូម្បីតែសមាជិក​គ្រួសារក៏មិនអាចជ្រៀតជ្រែកក្នុងការស្វែងរកឬមើលព័ត៌មាន​ហិរញ្ញវត្ថុ​របស់សាច់ញាតិ។ អ្វី​ដែល​ពួក​គេ​​អាច​​ធ្វើ​បាន​គឺ​ជួល​អ្នក​ស៊ើប​អង្កេត​ឯកជន​ម្នាក់​ឬ​រង់ចាំ” ។

នៅប្រទេសជប៉ុនភាពឯកជនជាបញ្ហាសំខាន់ ដូច្នេះអ្នកដែលសម្រេចចិត្តធ្វើជា Johatsu ស្ទើរតែរលាយបាត់ចេញជីវិត ដោយមិនចាំបាច់ខ្លាចត្រូវគេរកឃើញ។ ពួកគេមិនចាំបាច់ព្រួយបារម្ភត្រូវគេរកឃើញតាមរយៈកាមេរ៉ាឃ្លាំមើល ឬនរណាម្នាក់ប្រើកាតឥណទានរបស់ពួកគេនៅម៉ាស៊ីន ATM ឡើយ។

ប៉ុន្មានឆ្នាំថ្មីៗនេះបាតុភូត Johatsu កាន់តែច្រើនឡើងនៅក្នុងប្រទេសជប៉ុន រហូតដល់ក្រុមហ៊ុនជាច្រើនបើកសេវាកម្ម​ជួយ​ដល់​អ្នក “រលាយបាត់ខ្លួន” ដែលគេហៅថាសេវាកម្ម “ដឹកជញ្ជូនពេលយប់” ។ ដូច្នេះក្រុមហ៊ុនទាំងនេះនឹងជួយ Johatsu រៀបចំផែនការបាត់ខ្លួន និងផ្តល់កន្លែងស្នាក់នៅបណ្តោះអាសន្នក្នុងទីតាំងសម្ងាត់សម្រាប់ពួក​គេ។

ម្ចាស់សេវាកម្ម “ដឹកជញ្ជូនពេលយប់” ឆ្លើយតបបទសម្ភាសន៍របស់ទស្សនាវដ្តី TIME ថាតម្លៃសេវាកម្មអាស្រ័យទៅ​លើ​ទ្រព្យ​សម្បត្តិដែលអតិថិជនចង់យកទៅ ចម្ងាយដែលពួកគេចង់លាក់ទ្រព្យសម្បត្តិ និងរយៈពេល “រលាយបាត់ខ្លួន” ។ សរុបទៅតម្លៃនេះប្រហែលពី ៤៥០ ដុល្លារទៅ ២៦០០ ដុល្លារ។

សម្រាប់​អ្នក​ដែល​ចង់​នាំ​ក្មេងឬ​អ្នក​ដែលគេច​ពី​បំណុល ថ្លៃ​សេវា​អាច​នឹង​ខ្ពស់​ជាងនេះ។ ម្ចាស់ក្រុមហ៊ុនម្នាក់ដែលផ្គត់ផ្គង់សេវាកម្មនេះបាននិយាយថា ពួកគេជួយមនុស្សប្រហែល ១០០ ទៅ ៥០០ នាក់ឱ្យក្លាយជា Johatsu ជារៀងរាល់ឆ្នាំ។

ចំពោះអ្នកដែលមិនមានលទ្ធភាពបង់ថ្លៃសេវាកម្ម “រលាយបាត់ខ្លួន” ឬចង់ “រលាយបាត់ខ្លួន” ដោយខ្លួនឯង ពួក​គេ​អាច​ស្វែង​រក​ការ​​ណែ​​នាំ​នៅ​លើ​អុីនធឺណេត។

AD