ក្បួនដង្ហែសត្វ​ភេនឃ្វីន​ដ៏​ល្បី​នៅ​សួន​សត្វហុកកៃដូប្រទេស​ជប៉ុន

នៅតំបន់ភាគខាងជើងកោះហុកកៃដូប្រទេសជប៉ុន ទិដ្ឋភាពហ្វូងសត្វភេនឃ្វីនដើរនៅលើព្រិលយ៉ាងគួរអោយស្រលាញ់​ដែល​​ភ្ញៀវ​​ទេស​ចរណ៍​​ទន្ទឹង​​រង់ចាំរាល់ពេលពួកគេមកលេងនៅទីនេះ។ ក្បួនដង្ហែលើព្រិលជាប្រពៃណីដ៏យូរអង្វែង​របស់សត្វភេនឃ្វីននៅសួនសត្វ Asahiyama កោះហុកកៃដូ។ ព្រឹត្តិ​ការណ៍​ឆ្នាំ​នេះនៅតែបន្តទាក់ទាញមនុស្សជា​ច្រើន ព្រោះពួកគេចង់ឃើញទិដ្ឋភាពនេះផ្ទាល់ភ្នែក។

ឆ្នាំនេះហ្វូងភេនឃ្វីនដើរនៅជុំវិញជម្រករបស់វាមានចម្ងាយប្រហែល ៤០០ ម៉ែត្រ។ ព្រឹត្តិការណ៍នេះប្រារព្ធធ្វើឡើងពីរដងក្នុងមួយថ្ងៃ ម៉ោង ១១ៈ៣០ ព្រឹក និង ២ៈ៣០ រសៀល រហូតដល់ពាក់កណ្តាលខែមីនានៅពេលដែលព្រិលរលាយ។

ព្រឹត្តិការណ៍ប្រចាំឆ្នាំនេះចាប់ផ្តើមពីឆ្នាំ ២០០២ ដោយសារតែបុគ្គលិកសួនសត្វចង់ផ្តល់ឱកាសឱ្យសត្វភេនឃ្វីនធ្វើលំហាត់ប្រាណក្នុងរដូវរងា។ ការធ្វើលំហាត់ប្រាណជាប្រចាំជួយឱ្យសត្វភេនឃ្វីនទាំងនេះមិនធាត់ព្រោះតែមិនបានធ្វើចលនា។

ក្រុមប្រឹក្សាគ្រប់គ្រងសួនសត្វក៏មិននឹកស្មានថា “ក្បួនដង្ហែសម្រកទម្ងន់” នេះបែរជាទទួលបានការគាំទ្រ ហើយបាន​ក្លាយ​ជា​ព្រឹត្តិ​ការណ៍មួយដែលទាក់ទាញអ្នកទស្សនាជាច្រើននោះទេ។

Asahiyama គឺជាសួនសត្វដែលល្បីមួយនៅក្នុងប្រទេសជប៉ុន ដែលមានសត្វចំនួន ១៥០ ប្រភេទខុសៗគ្នា ក្នុងនោះមានសត្វរស់នៅតំបន់ត្រជាក់ច្រើន។ ជារៀងរាល់ឆ្នាំសួនសត្វទទួលស្វាគមន៍អ្នកទស្សនារាប់លាននាក់ ច្រើនជាងចំនួន​ប្រជាជន​ក្នុងស្រុកដល់ទៅប៉ុន្មានដង។

អ្នកទស្សនាទាំងអស់ឈរតម្រង់ជួរមើលក្បួនដង្ហែសត្វភេនឃ្វីន។ ព្រឹត្តិការណ៍ឆ្នាំនេះចាប់ផ្តើមយឺតជាងធម្មតា ១០ ថ្ងៃ ដោយសារព្រិលធ្លាក់តិច។

ក្នុងអំឡុងពេលហាត់សមកាលពីថ្ងៃទី ២៤ ខែធ្នូ សត្វភេនឃ្វីន ១៦ ក្បាល ដើរចេញពីច្រកទ្វារក្នុងពេលតែមួយ ហើយ​ដើរ​រយៈ​ពេលប្រហែលកន្លះម៉ោងនៅលើព្រិលធ្លាក់។

ក្បួនដង្ហែសត្វ​ភេនឃ្វីន​ធ្វើ​ឱ្យ​អ្នក​ទស្សនា​ឈរ​តម្រង់​ជួរ​ទាំង​សងខាង​រំភើប​ចិត្ត​យ៉ាង​ខ្លាំង។ ម៉ាសុីនថតជាច្រើនចាប់​យក​ទិដ្ឋភាព​គួរ​ឱ្យស្រឡាញ់របស់​សត្វ​ភេន​ឃ្វីនដែលកម្រចូលជិតមនុស្ស។

សត្វ​ភេនឃ្វីន​ដើរ​ជា​ជួរ​ នៅខាងមុខមានអ្នកកាន់ឧបករណ៍​បំពង​សំឡេងណែនាំ ចំណែក​នៅ​ពី​ក្រោយ​មាន​មនុស្សពីរបីនាក់តាមអមដំណើរ និងជួយសត្វ​ភេន​ឃ្វីន​ដែល​​រអិលដួល។

Tensei Kato អាយុប្រាំបីឆ្នាំ ដែលបានទៅសួនសត្វជាមួយឪពុកម្តាយក្នុងឳកាសថ្ងៃឈប់សម្រាករដូវរងានៅសាលា​បឋម​សិក្សា​និយាយ​ថា “សត្វ​ភេន​ឃ្វីន​មាន​ទំហំ​ធំជាងការគិត នៅពេលត្រដាងស្លាប​គួរ​ឱ្យ​ស្រលាញ់ណាស់” ។

អ្នកស្រី Midori អាយុ ៤២ ឆ្នាំ ជាម្តាយរបស់ Tensei Kato បាននិយាយថា “ពួកយើងពិតជាសំណាងណាស់ដែលបានទស្សនា​ការ​សម្តែង​របស់សត្វភេនឃ្វីននៅឆ្នាំនេះ” ។

Yuki