អ្នក​ស្រុក​អូសាកា​ជាច្រើនគ្រួសារទទួលបានស្រោមសំបុត្រប្រាក់​ក្នុង​ប្រអប់​​សំបុត្រ

ប្រសិនបើថ្ងៃណាមួយ នៅពេលដែលអ្នកឆែកប្រអប់សំបុត្រដូចរាល់ដង ស្រាប់តែឃើញស្រោមសំបុត្រមានប្រាក់ក្នុងនោះ តើអ្នកមានអារម្មណ៍យ៉ាងណា?

ព្រឹត្តិការណ៍​ចម្លែកៗ​ជា​បន្តបន្ទាប់​បាន​កើត​ឡើង​ក្នុង​តំបន់​លំនៅដ្ឋាន Asahi ទីក្រុង Osaka ។ អ្នកស្រុកដែលត្រូវបាន​ជ្រើស​រើស​ដោយចៃដន្យមួយចំនួន រកឃើញស្រោមសំបុត្រប្រាក់ក្នុងប្រអប់សំបុត្រ។

ស្រោមសំបុត្រប្រាក់អាថ៌កំបាំងត្រូវបានប្រទះឃើញលើកដំបូងក្នុងខែតុលា នៅពេលដែលអ្នកស្រុកម្នាក់ឃើញស្រោម​សំបុត្រ​ដែលមិនមានស្លាកសញ្ញាពណ៌ត្នោតទុកក្នុងប្រអប់សំបុត្រ។ មិនយូរប៉ុន្មាន អ្នកស្រុកជិតខាងក៏ទទួលបានស្រោមសំបុត្រពណ៌ត្នោតស្រដៀងគ្នា។

ប្រអប់​សំបុត្រ​ដែល​ទទួល​បានប្រាក់​នៅលើផ្លូវ និងក្នុងតំបន់ដូចគ្នា ប៉ុន្តែមិនមែនគ្រប់គ្នាទទួលបានចំនួនដូចគ្នានោះទេ។ ស្រោមសំបុត្រទាំងនេះមានចំនួនសាច់ប្រាក់ខុសៗគ្នាចាប់ពីប៉ុន្មានពាន់យ៉េនរហូតដល់ជាង ១ ម៉ឺនយ៉េន។ អ្នកស្រុកម្នាក់និយាយថា ពួកគេទទួលបានស្រោមសំបុត្រមានក្រដាសប្រាក់ ១ ម៉ឺនយ៉េន និងប្រាក់ ១ ពាន់យ៉េនចំនួន ៣ សន្លឹក ប្រាក់សរុបស្មើនឹង ១៣,០០០ យ៉េន។

ស្រោមសំបុត្រចម្លែកទាំងនេះមានចំនួនទឹកប្រាក់សរុប ២០ ម៉ឺនយ៉េន ប៉ុន្តែនោះគ្រាន់តែជាចំនួនដែលប៉ូលីសទទួល​បាន​ប៉ុណ្ណោះ ព្រោះ​អាច​មាន​មនុស្សមួយចំនួនមិន​ជូន​ដំណឹង​ដល់​អាជ្ញាធរ ជាក់ស្តែងចំនួនទឹកប្រាក់អាចនឹង​ច្រើន​ជាង​នេះ។

តាមច្បាប់ ប៉ូលីសបានអនុញ្ញាតឱ្យអ្នកដែលទទួលបានប្រាក់មានសិទ្ធិប្រើប្រាស់ ពួកគេមិនចាំបាច់រាយការណ៍ឬធ្វើបែបបទណាមួយឡើយ។ ទោះជាយ៉ាងនេះក្តី ប្រជាជនមួយចំនួនមានការដឹងគុណយ៉ាងខ្លាំងចំពោះអំណោយនេះ ប៉ុន្តែពួកគេមានអារម្មណ៍មិនស្រួលពេលទទួលបានចំនួនទឹកប្រាក់នោះ ដូច្នេះពួកគេបានរាយការណ៍ទៅប៉ូលីស។

ទាំងប្រជាជន និងរដ្ឋាភិបាលមិនដឹងថាប្រាក់មកពីណាឬហេតុអ្វីបានជាមានក្នុងប្រអប់សំបុត្រនៅតំបន់លំនៅដ្ឋាន​ពិសេស​នេះ​ទេ។ មនុស្សជាច្រើនបញ្ចេញ​មតិ​ដូច​ខាង​ក្រោម៖

“ប្រហែលជារបស់សាន់តាក្លូស”

“នៅអូសាកា សាន់តាក្លូសពិតជាមានចិត្តសប្បុរស”

“ខ្ញុំសង្ឃឹមថានោះមិនមែនជាប្រាក់ឧក្រិដ្ឋកម្ម …”

“Yakuza លាងប្រាក់? ហើយ​ប្រសិន​បើ​អ្នក​ចាយ អ្នកនឹងត្រូវគេគំរាមយកប្រាក់?”

“ខ្ញុំភ្នាល់ថានោះជា Youtuber ណាម្នាក់ចង់ថតវីដេអូ”

“គួរអោយស្ដាយក្នុងចំណោមផ្ទះទាំងនេះគ្មានកាមេរ៉ាឃ្លាំមើលទេ។ នោះប្រហែលជាមូលហេតុ​ដែលផ្លូវទាំងនេះត្រូវបាន​ជ្រើស​រើស?”

Yuki