ក្រុមអ្នកស្រាវជ្រាវជប៉ុនផលិតអង្ករទៅជា​វ៉ាក់សាំង​ការពារ​ជំងឺ​អាសន្នរោគ

គ្រាន់តែកិនអង្ករទៅជាម្សៅ ហើយដាក់ក្នុងកែវទឹក រួចផឹក ដូច្នេះអ្នកអាចទប់ទល់នឹងជំងឺឆ្លងជាច្រើនមុខ។

ទាំងនេះជាការសន្និដ្ឋានមូលដ្ឋាននៃការស្រាវជ្រាវរបស់ក្រុមអ្នកវិទ្យាសាស្ត្រជប៉ុនមកពីសាកលវិទ្យាល័យតូក្យូ ក្នុង​គោល​បំណងបង្កើតប្រភេទវ៉ាក់សាំងផឹក ដែលអាចការពារជំងឺជាច្រើន។

ការប្រើប្រាស់អង្ករជាមធ្យមរបស់មនុស្សម្នាក់នៅប្រទេសជប៉ុនគឺ ៥០ គីឡូក្រាមក្នុងមួយឆ្នាំ អង្ករដើរតួនាទីយ៉ាងសំខាន់ក្នុងជីវភាពរស់នៅរបស់ប្រជាជនជប៉ុន។ ប្រភេទអាហារបំប៉នប្រចាំថ្ងៃ ក្រុមអ្នកស្រាវជ្រាវនៅវិទ្យាស្ថានវិទ្យា​សាស្ត្រវេជ្ជសាស្ត្រនៃសាកលវិទ្យាល័យតូក្យូ (IMSUT) បានបង្កើតអង្ករមួយប្រភេទមានផ្ទុកប្រូតេអុីនពិសេស ដែលដើរ​តួជា​វ៉ាក់​សាំងការពារការចាប់ផ្តើមនៃជំងឺអាសន្នរោគ រួមទាំងជំងឺរាគផងដែរ។

ជំងឺអាសន្នរោគឆ្លងរីករាលដាលដោយសារការប្រើប្រាស់ទឹកដែលមានមេរោគបាក់តេរីជំងឺអាសន្នរោគ លើសពីនេះអាហារសមុទ្រដែលមិនទាន់ចម្អិនក៏ត្រូវបានចាត់ទុកជាប្រភពជំងឺផងដែរ។ ជំងឺនេះប៉ះពាល់ដល់មនុស្ស ៤ លាននាក់ ដែលមានករណីស្លាប់ ១៤០,០០០ នាក់ក្នុងមួយឆ្នាំ ហើយជាពិសេសរីក​រាល​ដាល​នៅ​ក្នុង​ប្រទេសកំពុងអភិវឌ្ឍន៍។

ថ្វីត្បិតតែមានវ៉ាក់សាំងការពារជំងឺអាសន្នរោគជាប្រភេទផឹក ប៉ុន្តែនៅតែមានឧបសគ្គមួយចំនួនក្នុងការប្រើប្រាស់​ទូលំ​ទូលាយ ដូចជាវ៉ាក់សាំងត្រូវដាក់ក្នុងទូរទឹកកក។

ដូច្នេះក្រុមស្រាវជ្រាវ IMSUT ដែលដឹកនាំដោយសាស្ត្រាចារ្យ Hiroshi Kiyono មានគោលបំណងបង្កើតអង្ករប្តូរ​ហ្សែន ដែលអាចរក្សាទុកក្នុងសីតុណ្ហភាពបន្ទប់ ជំនួសវ៉ាក់សាំងជំងឺអាសន្នរោគ។

ពួកគេបានបង្កើតពូជស្រូវប្តូរហ្សែនក្នុងគោលបំណងផលិតប្រូតេអុីនសម្រាប់ប្រើក្នុងដំណើរការស្រូបយកជាតិពុលនៃជំងឺអាសន្នរោគក្នុងពោះវៀន ប៉ុន្តែមិនបង្កគ្រោះថ្នាក់ដល់រាងកាយនោះទេ។

គ្រាប់ស្រូវ​ត្រូវ​បាន​ផលិត​បន្ទាប់ពី​ប្រមូលផលរួច កិនទៅជាម្សៅលាយជាមួយទឹកសូលុយស្យងអំបិល។ ដូច្នេះសមាសធាតុសំខាន់ៗក្នុងប្រភេទអង្ករនេះស្រូប​ចូល​តាម​ពោះវៀនបង្កើតជាអង់ទីករ ហើយជួយអ្នកប្រើមានភាពស៊ាំនឹងជំងឺអាសន្ន​រោគ។

ជាដំបូងអ្នកស្រាវជ្រាវបានធ្វើការផ្ទៀងផ្ទាត់សុវត្ថិភាព និងប្រសិទ្ធភាពវ៉ាក់សាំងស្រូវលើសត្វដូចជាកណ្តុរ ជ្រូក ស្វា។ បន្ទាប់មកនៅឆ្នាំ ២០១៥ និង ២០១៦ ក្រុមការងារបានបន្តធ្វើការសាកល្បងព្យាបាលលើបុរសពេញវ័យចំនួន ៦០ នាក់នៅមន្ទីរពេទ្យ IMSUT ។

លទ្ធផលដែលទទួលបានគឺវិជ្ជមាន អ្នកដែលប្រើមិនមានផលប៉ះពាល់ធ្ងន់ធ្ងរណាមួយឡើយ។ អង់ទីករទប់ស្កាត់ការស្រូបយកជាតិពុលអាសន្នរោគត្រូវបានផលិតក្នុងឈាមពី ៤០ ទៅ ៧៥% នៃអ្នកធ្វើតេស្ត។ ក្រុមការងារក៏បានរកឃើញ​ថា បើកម្រិតថ្នាំវ៉ាក់សាំងស្រូវកាន់តែច្រើន អង់ទីករដែលត្រូវបានផលិតក៏កាន់តែច្រើនដែរ។

បច្ចុប្បន្នក្រុមស្រាវជ្រាវកំពុងដាំដុះពូជស្រូវតាមគោលបំណងនៅ IMSUT ស្រុក  Shirokanedai ទីក្រុងតូក្យូ។ ពួកគេក៏មានគម្រោងធ្វើការជាមួយសាកលវិទ្យាល័យ Chiba និងអង្គភាពផ្សេងទៀត ដើម្បីពង្រីកគំរូនៃការដាំដុះស្រូវប្តូរ​ហ្សែន​នេះ។

សាស្ត្រាចារ្យ Hiroshi Kiyono បាននិយាយថា ការធ្វើតេស្តសត្វទទួលបាន​ជោគជ័យ នៅពេលប្រើអង្កររក្សាទុកក្នុងសីតុណ្ហភាពបន្ទប់រយៈពេល ៣ ឆ្នាំ។ លោកក៏បានបន្ថែមថា ប្រភេទវ៉ាក់សាំងអង្ករសម្រាប់ផឹកនេះ ក៏អាចបង្កើតជាវ៉ាក់សាំងការពារជំងឺកូវីដ ១៩ ដែលជាវីរុសឆ្លងពីមនុស្សម្នាក់ទៅមនុស្សម្នាក់ទៀតតាមរយៈផ្លូវដង្ហើម និងមេរោគផ្សេងៗទៀត។

ឥឡូវនេះក្រុមការងារកំពុងសង្ឃឹមថាអាចសហការជាមួយអាជីវកម្ម ដើម្បីធ្វើការសាកល្បងព្យាបាលបន្ថែមលើទ្រង់​ទ្រាយ​ធំជាងនេះ។ ដើម្បីវាយតម្លៃប្រសិទ្ធភាពវ៉ាក់សាំងអោយបានត្រឹម​ត្រូវបំផុត ឆ្ពោះទៅរកគោលដៅប្រើប្រាស់ជាក់​ស្តែង​នា​ពេល​អនាគត។

លោក Hiroshi Kiyono បានអោយដឹងថា “គ្រាប់ស្រូវមិនត្រូវការម្ជុលឬទូរទឹកកកទេ ដូច្នេះវាអាចក្លាយទៅជាវ៉ាក់សាំង​ដែល​ល្អ​បំផុត។ យើង​សង្ឃឹម​ថា​នឹង​ដាក់​ឱ្យ​ប្រើឆាប់តាមដែលអាចធ្វើទៅបាន” ។

Yuki