យុទ្ធនាការផ្សព្វផ្សាយទេសចរណ៍ដ៏ពិសេសក្រោមប្រធានបទ “មនុស្សក្រៅភព”

នៅខេត្ត Oita មានកន្លែងស្នាក់នៅ ៤៥ កន្លែងចូលរួមយុទ្ធនាការផ្សព្វផ្សាយទេសចរណ៍ដ៏ពិសេសមួយ សម្រាប់ភ្ញៀវទេសចរណ៍ដែលមកលេងតំបន់នេះ។ នៅពេលមកដល់ភ្ញៀវនឹងកំណត់ខ្លួនឯងជា “មនុស្សក្រៅភព” មកពីអាកាស ដើម្បីទទួលបានការផ្តល់ជូនពិសេស។ យុទ្ធនាការនេះមានរយៈពេលរហូតដល់ខែកុម្ភៈ ឆ្នាំ ២០២២។

អ្នក​គ្រប់​គ្រង​សណ្ឋាគារ Mikuma អ្នកស្រី Setsuko Isayama កំពុងឱប “មនុស្សក្រៅភព” នៅ Hita ខេត្ត Oita កាល​ពី​​ថ្ងៃ​ទី ១៦ ខែធ្នូ ឆ្នាំ ២០២១។

ហេតុផលសម្រាប់ការផ្តល់ជូនដ៏ចម្លែកនេះ ដោយសារតែរដ្ឋាភិបាលខេត្ត Oita បានចុះហត្ថលេខាលើកិច្ចព្រមព្រៀងសហការជាមួយក្រុមហ៊ុន Virgin Orbit LLC របស់អាមេរិក ក្នុងខែមេសា ឆ្នាំ ២០២០។ ភាគី​ទាំង​ពីរ​គ្រោង​ប្រែក្លាយ​អាកាសយានដ្ឋាន Oita ឱ្យ​ទៅ​មជ្ឈមណ្ឌល “យានដ្ឋានអវកាស” ដើម្បីបើកដំណើរការបាញ់រ៉ុកកែតតាមជួរផ្តេកដឹកផ្កាយរណបសិប្បនិមិត្តខ្នាតតូចកណ្តាលអាកាសយន្តហោះធំ ហើយ​ចាប់ផ្តើម​ហោះហើរ​ពី​អាកាសយានដ្ឋាន Oita ក្នុង​ឆ្នាំ ២០២២ ឬយឺតជាងនេះ។

ក្នុងព្រឹត្តិការណ៍ផ្សព្វផ្សាយជាសាធារណៈកាលពីថ្ងៃទី ១៦ ខែធ្នូ យុទ្ធនាការបានចាប់ផ្តើម និងទាក់ទាញចំណាប់អារម្មណ៍​ពីប្រព័ន្ធផ្សព្វផ្សាយ។ នៅសណ្ឋាគារ Mikuma ទីក្រុង Hita ខេត្ត Oita ដាក់ស្លាកសញ្ញាដែលសរសេរថា “សូមស្វាគមន៍មនុស្សក្រៅភព” មុខច្រកចូលសណ្ឋាគារ។

ក្រៅពីនេះផ្ទាំង​ផ្សាយ​ពាណិជ្ជកម្ម​ក៏​ត្រូវ​បាន​សរសេរ​ជា ២ ភាសា រួមមានភាសា​ជប៉ុន និង​ភាសាមនុស្សក្រៅភព។

នៅពេលភ្ញៀវទេសចរណ៍មកកាន់សណ្ឋាគារ និងផ្ទះសំណាក់បែបជប៉ុន (ryokan) ទាំង ៤៥ កន្លែងសម្រាប់ចូលរួមក្នុង​យុទ្ធនាការ​នេះ។ ពួកគេនឹងសម្គាល់ខ្លួនជា “មនុស្សក្រៅភព” ដើម្បីទទួលការផ្តល់ជូននេះ។ លើសពីនេះកន្លែងមួយចំនួនថែមទាំងផ្តល់ការបញ្ចុះតម្លៃលើថ្លៃស្នាក់នៅសម្រាប់ភ្ញៀវទៀតផង។

ប្រសិនបើអ្នកមានឱកាសធ្វើដំណើរទៅកាន់ Oita ឥឡូវនេះ អ្នកនឹងមានឱកាសជួបជាមួយមនុស្សក្រៅភពភ្នែកធំ វែង និងក្បាលមានរាងសុ៊ត។ រដ្ឋាភិបាលខេត្ត Oita ថែមទាំងផលិតវីដេអូជាច្រើន ដោយមានវត្តមានរបស់មនុស្សក្រៅ​ភព​ដើម្បីផ្សព្វផ្សាយតំបន់ទេសចរណ៍ល្បីៗក្នុងខេត្ត។

អ្នកស្រី Setsuko Isayama អាយុ ៧១ ឆ្នាំគ្រប់គ្រងសណ្ឋាគារ Mikuma ឱបមនុស្សក្រៅភពហើយនិយាយថា “ខ្ញុំកំពុង​ពិចារណា​កម្មវិធីកំសាន្តអារម្មណ៍ដែលយកប្រធានបទមនុស្សក្រៅភពសម្រាប់ភ្ញៀវទេសចរណ៍” ។

រដ្ឋបាលខេត្តបានអោយដឹងថាយុទ្ធនាការទេសចរណ៍នេះ ក្រៅពីជម្រុញការអភិវឌ្ឍន៍គម្រោង “យានដ្ឋានអវកាស” ក៏ជាវិធានការស្តារមជ្ឈមណ្ឌលស្នាក់នៅក្នុងខេត្តដែលរងឥទ្ធិពលជំងឺកូវីដ ១៩ និងគ្រោះទឹកជំនន់ប៉ុន្មានឆ្នាំថ្មីៗនេះ។

ខេត្ត Oita សង្ឃឹម​ថា​នឹង​ក្លាយ​ជា​គោលដៅ​ដ៏​គួរ​ឱ្យ​ទាក់​ទាញ ព្រម​ទាំង​ទាក់ទាញ​ភ្ញៀវ​ទេសចរ​ណ៍មក​ពី​ជុំវិញ​ពិភព​លោក​ក្នុង​​ពេល​​ខាង​មុខ។

Japo Cambodia