អាទិទេពព្រះអាទិត្យ Himiko និង Yamataikoku ដែលជាអាថ៌កំបាំងនៃប្រវត្តិសាស្ត្រជប៉ុន

រឿងនេះកើតឡើងមុនសម័យសាមូរ៉ៃទៅទៀត រឿងតំណាលថាមានរាជនី​មួយ​អង្គ​ព្រះនាម Himiko ដែល​ប្រសូត​ក្នុង​ឆ្នាំ ២០០ ក្រោយគ.ស។

នៅសម័យនោះជប៉ុនមិនទាន់មានវប្បធម៌ថែរក្សាសៀវភៅប្រវត្តិសាស្ត្រទេ ប៉ុន្តែតួអង្គបង្ហាញខ្លួនក្នុងឯកសារមានឈ្មោះ​ថា Gishiwajinden ដែលជាឯកសារចិនបុរាណនិយាយពីជប៉ុន។

ពេលនោះជនជាតិចិនហៅ​ជប៉ុន​ថា Wakoku (មហា​នគរ)។ ក្នុងមហា​នគរមាន​នគរ​តូច​មួយដែលត្រូវបាន​កត់ត្រា​​ក្នុង​​សៀវ​ភៅ​​ប្រវត្តិសាស្ត្រ​ហៅថា Yamataikoku ។ ទោះបីជា Himiko ត្រូវគេចាត់ទុកដូចជារាជនីនៃនគរតូចនោះ ប៉ុន្តែ​អ្វី​​ដែល​​ចម្លែករាជនីមាននៅក្នុងឯកសារខាងលើប៉ុណ្ណោះ។ ជាក់ស្តែងទីតាំងភូមិសាស្ត្រ Yamataikoku ឬវត្តមានតួអង្គ Himiko រហូតមកដល់ពេលនេះ គ្មាននរណាម្នាក់ដឹងច្បាស់នោះទេ។

នៅយុគសម័យ Yayoi (ពី ៣០០ មុនគ.ស. ដល់ ២៥០ ក្រោយគ.ស) គឺជាពេលដែលអរិយធម៌ដាំស្រូវចាប់ផ្តើម “ដុះពន្លក” ក្នុងប្រទេសជប៉ុន។ ជា​មួយ​នឹង​ការរីកចម្រើននៃការធ្វើស្រែ ជនជាតិជប៉ុនពេលនោះរស់នៅជាក្រុមតាមភូមិ ហើយផលិតស្រូវជាអាហារចម្បងតាមផែនការ។ តាំងពីពេលបង្កើតភូមិ គម្លាត​រវាង​អ្នក​មាន​ និង​អ្នកក្រ​កាន់​តែ​ច្បាស់ ដែលបណ្តាលឲ្យ​មានបញ្ហាបែងចែកវណ្ណៈសង្គម។ មិនត្រឹម​តែប៉ុណ្ណឹង សង្រ្គាមរវាងភូមិដែលនៅជិតគ្នា ដើម្បីពង្រីកទឹកដីកើតឡើងស្ទើរតែរាល់ថ្ងៃផងដែរ លុះដល់ Himiko ឡើងគ្រងរាជ្យទើបស្ថានភាពសង្រ្គាមនេះឈានដល់​ទី​បញ្ចប់។

Himiko (Miko – ទេវតាស្រីមើលថែប្រាសាទ) បម្រើអាទិទេពព្រះអាទិត្យ ការទស្សន៍ទាយរបស់គាត់ប្រើសម្រាប់ដំណើរ​ការ​ម៉ាសុីន​នយោបាយ។

នៅក្នុងជំនឿសាសនាជាច្រើនលើពិភពលោក អាទិទេពព្រះអាទិត្យតែងតែត្រូវគេគោរពបូជា ដោយឡែកនៅជប៉ុន​តួនាទីរបស់អាទិទេពព្រះអាទិត្យកាន់តែខ្ពស់ជាងនេះ។ អាទិទេពព្រះអាទិត្យ Amaterasu Ookami គឺជាអាទិទេព​នៅកណ្តាលរវាងអាទិទេពក្នុងទេវកថារបស់ជប៉ុន។ មិនត្រឹម​តែប៉ុណ្ណឹង សូម្បីតែក្នុងព្រះពុទ្ធសាសនាតួអង្គតំណាងដូចជា Vairocana ជាផ្នែកមួយនៃវប្បធម៌គោរពអាទិទេពព្រះអាទិត្យនៅតែមានរហូតមកដល់សព្វ​ថ្ងៃ​នេះ។

នៅពេលនោះ Wakoku (ជប៉ុនសម័យសព្វថ្ងៃ) យោងតាមសម្តីរបស់ Himiko តែងតែផ្ញើសួយសារអាករទៅកាន់ប្រទេសចិន។ ជាការឆ្លើយតប អធិរាជចិនបានផ្ញើត្រាមាស និងកញ្ចក់សំរឹទ្ធចំនួន ១០០ ទៅកាន់ Wakoku ។ ទំនាក់​​ទំនង​ល្អ​រវាង​ភាគី​ទាំង​ពីរ​រឹង​មាំ​​ណាស់ ដូច្នេះ​ហើយ​ទើប​ Wakoku ក្លាយ​ជា​ប្រទេស​មាន​ទ្រព្យ​ធន​ និង​រីក​ចម្រើន។

តាមតំណាលរឿងនិយាយថាមនុស្សមិនច្រើនទេដែលបានឃើញ Himiko ហើយក៏កម្របង្ហាញខ្លួនជាសាធារណៈផង​ដែរ។ Himiko មិនមានប្តីទេ ប្អូនប្រុសជាអ្នកមើលថែទាំគាត់។

ពាក្យសម្តីទាំងអស់របស់ Himiko សុទ្ធតែត្រឹមត្រូវ ហើយដោយសារធ្វើតាមបញ្ជារបស់គាត់ ទើបប្រទេសជាតិកាន់​តែ​រីក​ចម្រើន។ ប៉ុន្តែបន្ទាប់ពី Himiko ទទួលមរណភាព អំណាចធ្លាក់ក្នុងដៃមនុស្សប្រុស ជោគវាសនារបស់ Wakoku ធ្លាក់ក្នុងភាពវឹកវរម្តងទៀត។

ចំពោះអាថ៌កំបាំងទីតាំងភូមិសាស្ត្ររបស់ Yamataikoku គ្មាននរណាម្នាក់ដឹងច្បាស់ថាកន្លែងនេះស្ថិតនៅទីណានោះ​ទេ។ ក្នុងអំឡុងពេលពិភាក្សាជាមួយអធិរាជចិន ទូតរបស់ Yamataikoku តែងតែស្នើឲ្យ​ជួបនៅកន្លែងដែលងាយស្រួលសម្រាប់ភាគីចិន ដូចជាតំបន់ជុំវិញ Kyuushuu ។ ពិត​ជា​គ្មាន​ដាននិយាយពី Yamataikoku ទេ។

តាមការកត់ត្រានៅពេលដែល Himiko ទទួលមរណភាព មនុស្សម្នាក់ ១០០ នាក់កប់ខ្លួនឯងទាំងរស់តាមគាត់។ ទ្រង់ទ្រាយផ្នូរធំ ប៉ុន្តែរហូតមកដល់សព្វថ្ងៃមិនទាន់មាននរណារកឃើញផ្នូរនោះទេ។ ហើយផ្នូរស្តេចក្រាញ់​ក្នុង​តំបន់​ផ្សេង​ទៀត គេរកឃើញកញ្ចក់​សំរិទ្ធ។ តាមការស្មានកញ្ចក់សំរិទ្ធទាំងនេះជាអំណោយរបស់អធិរាជចិន ហើយ Himiko ជូនស្តេចក្រាញ់ផ្សេងទៀតដើម្បីបង្ហាញពីចំណងដ៏រឹងមាំដែលគាត់បានបង្កើត។ ប្រសិនបើការស្មាននេះត្រឹម​ត្រូវ នោះវត្តមានរបស់ Himiko ក៏ពិតជាមានមែន។

ថ្វីត្បិតតែ ជីវិត និងវត្តមានរបស់ Himiko មានអាថ៌កំបាំងច្រើន នៅសម័យដែលគាត់គ្រប់គ្រងប្រទេសមានសន្តិភាព និងអភិវឌ្ឍន៍រឹងមាំ។ លុះ​ដល់​ពេល​ស្ដេច​ប្រុសខាង​ត្បូង​ឡើង​សោយ​រាជ្យ ភាព​ចលាចល​ក៏​ផ្ទុះ​ឡើង​ម្ដង​ទៀត។ អ្នកដែលព្រួយបារម្ភចំពោះស្ថានភាពនេះបានបញ្ជូននារីម្នាក់ឈ្មោះ Iyo ដែលជាសាច់ញាតិរបស់ Himiko ឡើងសោយរាជ្យ ហើយសន្តិភាពត្រូវបានស្តារឡើងវិញ។

មិនដឹងថានេះគ្រាន់តែជាភាពចៃដន្យ ឬមានមូលដ្ឋានណាមួយ តើការលើកស្រ្តីឡើងធ្វើជាអ្នកគ្រប់គ្រងអាចការ​ពារ​អំពើហិង្សា និងសង្គ្រាមដែរទេ?

មនុស្សមួយចំនួនជឿលើវត្តមានរបស់ Yamataikoku និងរាជនី Himiko ហើយក៏នៅតែមានអ្នកប្រវត្តិសាស្រ្តខ្លះបដិសេធ​វត្តមាននេះដែរ។

ក្រៅពីនេះ ខ្ញុំ​សូម​ពន្យល់​បន្ថែម​ដល់​អ្នក​ដែល​កំពុង​រៀន​ភាសា​ជប៉ុន។ ជាដំបូងចូរក្រឡេកមើល Kanji នេះ។

邪馬台国 (Yamataikoku)

តួអក្សរទីមួយ 邪 ប្រើក្នុងពាក្យ 邪神 (jashin) – អានថា Yokoshima ។ នេះមិនមែនជា Kanji ដែលមានអត្ថន័យល្អនោះទេ។

ក្រៅពីនេះ …

卑弥呼 (Himiko)

អក្សរ Kanji ទីមួយក្នុងឈ្មោះរបស់គាត់ 卑 មានន័យថាអ្នកបម្រើ ទាសករ បុគ្គលដែលមានឋានៈទាប។

ដូចដែលបានរៀបរាប់ខាងលើ រឿង Yamataikoku និង Himiko មានតែនៅក្នុងសៀវភៅប្រវត្តិសាស្ត្រចិនប៉ុណ្ណោះ ដូច្នេះឈ្មោះ Kanji គឺជន​ជាតិ​ចិន​សរសេរ​ឡើង​វិញ។ ហេតុ​នេះមិនច្បាស់ថា អក្ខរាវិរុទ្ធខាងលើគ្រាន់តែស្របនឹងការបញ្ចេញសំឡេង ឬមនុស្សសម័យបុរាណមានចេតនាសរសេរបែបនោះ ដើម្បីបង្ហាញថាប្រទេសចិនជាប្រទេសដែលមាន​អរិយធម៌ និងជឿនលឿនជាង ដូច្នេះបានជាបន្ទាបសម្ព័ន្ធមិត្តរបស់ខ្លួន?

ម្យ៉ាងវិញទៀត Himiko ស្រដៀងទៅនឹង អាទិទេពព្រះអាទិត្យស្រី Amaterasu Ookami ។ 

នៅក្នុងទេវកថា Amaterasu Ookami លាក់ខ្លួនក្នុងរូងភ្នំមួយមានឈ្មោះថា Amano iwato ស្រដៀងនឹងរឿងរបស់រាជនី Himiko ដែលមិនសូវបង្ហាញខ្លួនសាធារណៈ។

មិនមែនជាការបំផ្លើសទេដែលនិយាយថា Yamataikoku និង Himiko គឺជាចម្ងល់ក្នុងប្រវត្តិសាស្ត្រជប៉ុន។

តើអ្នកគិតថារាជនីនេះពិតជាមានវត្តមានមែនដែរទេ?

Kengo Abe