តើធ្វើយ៉ាងអាចកំណត់ទង្វើរបស់ជនល្មើសដូចករណីអគ្គីភ័យឆេះអគារ Osaka ថ្មីៗនេះ?

កាលពីពេលថ្មីៗនេះសារព័ត៌មានចុះផ្សាយករណីដុតបំផ្លាញអគារ​នៅ​ទីក្រុង Osaka ដែលបណ្តាលអោយខូចខាតធ្ងន់ធ្ងរ និងសម្លាប់មនុស្ស ២៥ នាក់​។ អ្នក​ដែល​ពាក់ព័ន្ធ​ក្នុង​ហេតុការណ៍​នេះសុទ្ធ​តែ​ជា​ជន​រង​គ្រោះ ពួកគេមិនបាន​ធ្វើ​អ្វីអាក្រក់ចំពោះជនល្មើសឡើយ។

ជនល្មើសដែលបង្កសោកនាដកម្មនេះគឺ Tanimoto Morio ។ តាមពិតកាលពី ១០ ឆ្នាំមុន បុរសម្នាក់នេះធ្លាប់ប្រព្រឹត្តិ​អំពើ​ឃោរឃៅ ប៉ុន្តែបើគិតពីករណីថ្មីៗនេះ អាចចាត់ទុកថាជននេះឆ្កួតទៅហើយ។

ហេតុ​អ្វី​បាន​ជា​មនុស្ស​ម្នាក់មាន​សតិ​មិនប្រក្រតីអាចដើរហើរដោយសេរីក្នុងទីក្រុង? តើមានវិធីណាការពារគ្រោះថ្នាក់ស្រដៀងគ្នានេះកើតឡើងវិញ? នេះ​ជា​បញ្ហា​សំខាន់​ពីរ​ដែល​អ្នក​និយម​លេង​អុីនធឺណេត​ជប៉ុន​មាន​ការ​ព្រួយ​បារម្ភ​ក្នុង​ពេល​នេះ។

នៅឆ្នាំ ១៩៥៦ លោក Tanimoto Morio ដែលជាកូនប្រុសទីពីរ កើតក្នុងគ្រួសារមានបងប្អូន ៤ នាក់ ដំណើរការ​រោងចក្រផលិតបន្ទះដែក។ បន្ទាប់​ពី​បញ្ចប់​វិទ្យាល័យគាត់មិនបន្តសិក្សា ប៉ុន្តែធ្វើជាកម្មកររោងចក្រ។ តាំងពីពេល​បង​ប្រុស​របស់​គាត់ឡើងកាន់កាប់មុខជំនួញ គាត់ត្រូវផ្ទេរពីរោងចក្រមួយទៅ​រោង​ចក្រ​មួយទៀត។

លោក Tanimoto រស់នៅក្នុងទីក្រុង Osaka ជាមួយនឹងគ្រួសារ ៤ នាក់ រួមទាំងប្រពន្ធ និងកូនប្រុស ២ នាក់។ រហូតដល់ខែកញ្ញា ឆ្នាំ​ ២០០៨ គាត់​ត្រូវ​ប្រពន្ធ​សុំ​លែង។ ទោះ​បី​ជា​បែប​នេះ​ក្តី លោក Tanimoto នៅតែបន្ត​តាម​ប្រពន្ធសុំត្រូវគ្នាវិញ។ ប្រពន្ធ​គាត់​មិន​ព្រម​ ទើបសម្រេចចិត្តរស់នៅ​បែកពីគ្នា។ ចាប់តាំងពីពេលនោះមក Tanimoto តែងតែមានចិត្តគំនិត “ចង់ស្លាប់”​ ។

ប៉ុន្តែគាត់មិនអាចធ្វើអត្តឃាតខ្លួនឯង។

ដូច្នេះហើយគាត់សម្រេច​ចិត្ត “សម្លាប់​អ្នក​ណា​ម្នាក់ បន្ទាប់មកស្លាប់” រួច​ក៏​សម្រេច​ចិត្ត​ចាត់ការ​​កូន​ប្រុស​ច្បង។

ឱកាសមកដល់កាលពីខែ​វិច្ឆិកា ឆ្នាំ​ ២០០៩ កូន​ប្រុស​ច្បង​អញ្ជើញ​ក្រុម​គ្រួសារ​ទាំង ៤ នាក់​ទៅ​មើល​កុន។ គម្រោងរបស់គាត់ បន្ទាប់ពីទៅមើលកុនគាត់នឹងឆ្លៀតចូលផ្ទះប្រពន្ធកំពុងរស់នៅ ដោយយកលេសថា “ទៅយក Sushi” ដើម្បីត្រឡប់ទៅផ្ទះរបស់ខ្លួន។ នៅ​ពេល​នោះ Tanimoto យកតាមកាំបិត ២ កាំភ្លើងអគ្គិសនី Pepper Spray ​ញញួរ និង Sushi ។

បន្ទាប់​មក Tanimoto ទៅ​ផឹក​ស្រាស្រវឹង ដើម្បីសម្រេច​មហិច្ឆតា​របស់ខ្លួន។ Tanimoto ចូលទៅជិតប្រើកាំបិតវាយប្រហារកូនប្រុសច្បង។ នៅពេលកូនប្រុសច្បងដួល Tanimoto ​បន្ត​យក​កាំបិតចាក់ជា​ច្រើន​ដង​ទៀត ។ ក្នុងអំឡុងពេល​តបត កូនប្រុសច្បងព្យាយាមទាញឪពុកចេញទៅ Genkan (ជាកន្លែងទទួលភ្ញៀវរបស់ជនជាតិជប៉ុន) កន្លែង​កើត​ហេតុ​​ប្រឡាក់សុទ្ធតែ​ឈាម។

ទោះបីរបួសពេញខ្លួន ប៉ុន្តែសំណាងមិនធ្ងន់ធ្ងរដល់ជីវិត និងជាសះស្បើយបន្ទាប់ពីសម្រាកព្យាបាលនៅមន្ទីរពេទ្យ​រយៈ​ពេល​ពីរសប្តាហ៍។ ជាការពិតណាស់ Tanimoto ត្រូវប៉ូលីសចាប់ខ្លួន។ ប៉ុន្តែដោយសារការ​ខូចខាត​មិន​ច្រើន ដូច្នេះ​​គាត់​ត្រូវកាត់ទោសជាប់​ពន្ធនាគារ​តែ ៤ ឆ្នាំ​ប៉ុណ្ណោះ។ បន្ទាប់ពីការអនុវត្តទោសបានបញ្ចប់ គាត់ចេញពីគុក ហើយ​បន្ត​បង្ក​ឱ្យមានករណីធ្ងន់ធ្ងរនៅ Osaka ដូចដែលបានរៀបរាប់នៅដើមអត្ថបទ។

អ្នកទោសចេញពីគុកចូលរួមក្នុងសហគមន៍វិញជារឿងធម្មតាណាស់ ប៉ុន្តែចំពោះករណីរបស់ Tanimoto កាលពី ១០ ឆ្នាំមុនមានចំណុចមិនធម្មតាទៅហើយ។ ខ្លួនចង់ស្លាប់ ហេតុ​អ្វីសម្លាប់កូនប្រុសរបស់ខ្លួន? ករណីប្រព្រឹត្តបទល្មើសដោយសារភាពអាត្មានិយម និងទង្វើដ៏គួរឱ្យភ័យខ្លាចបែបនេះមិនច្រើនទេ។ ដូច្នេះមិននឹកស្មានថាឧក្រិដ្ឋជននឹងប្រព្រឹត្តបទល្មើសដដែលៗបន្ទាប់ពីត្រូវបានដោះលែង។ ថ្វីត្បិតតែកូនប្រុសច្បងព្យាយាមជៀសវាង និងកាត់បន្ថយរបួសលើខ្លួនឯង បញ្ហាមិនស្ថិតលើចំណុចនេះទេ ប៉ុន្តែដោយសារទង្វើឆ្កួតលីលារបស់ Tanimoto ។

តុលាការជប៉ុនមានទំនោរធ្វើការវិនិច្ឆ័យលើភាពធ្ងន់ធ្ងរនៃឧក្រិដ្ឋកម្ម ដោយផ្អែកលើការប្រៀបធៀបជាមួយនឹងករណី​កន្លងមក ក៏ដូចជាពិនិត្យមើលទំហំនៃការខូចខាតផងដែរ។។ ប៉ុន្តែតើការគិតនេះត្រឹម​ត្រូវដែរឬទេ? ខ្ញុំ​គិត​ថា​យើង​គួរ​តែ​​ពិចារណា​​ឡើង​វិញ។

Kengo Abe