មហាសេដ្ឋីជប៉ុន Review រឿង Manga ដែលខ្លួនចូលចិត្តនៅលើស្ថានីយអវកាសអន្តរជាតិ

មហាសេដ្ឋីជប៉ុនលោក Yusaku Maezawa ដែលកំពុងតែល្បីនៅលើបណ្តាញសង្គមតាមរយៈគម្រោងបញ្ជូនមនុស្ស “ធម្មតា” ធ្វើដំណើរទៅកាន់​លំហ​អាកាស ថ្មីៗនេះគាត់បានបង្ហោះវីដេអូជាច្រើននិយាយពីបទពិសោធន៍នៅស្ថានីយ៍​អវកាស​អន្តរជាតិ។

អ្នកអាចចុះឈ្មោះគេហទំព័រ Youtube របស់មហាសេដ្ឋីនៅទីនេះ។

លោក Yusaku Maezawa បានក្លាយជាភ្ញៀវទេសចរណ៍ដំបូងគេដែលមកដល់ស្ថានីយ៍អវកាសអន្តរជាតិ។ ក្នុងដំណើរ​កំសាន្តរបស់ខ្លួន លោកបានបង្ហាញសកម្មភាពគួរអោយចាប់អារម្មណ៍ជាច្រើន ដូចជា PR Uber Eats អួតបង្គន់នៅលើលំហ ហើយនិយាយពី Manga ដែលខ្លួនចូលចិត្ត។

ជាមួយនឹងគំនិត “ទេសចរណ៍អវកាស” លោក Maezawa បានទទួលការរិះគន់ជាច្រើនពីអ្នកប្រើបណ្តាញសង្គម ដោយ​យល់​ថានេះជាការអួតបង្ហាញពីភាពប្រណិតរបស់អ្នកមាន។ ទោះជាយ៉ាងណាក្តីស្រមៃ​របស់​មហាសេដ្ឋី​រូប​នេះ គឺ​ចង់​បញ្ជូន​មនុស្ស​កាន់​តែ​ច្រើន​ទៅកាន់លំហដើម្បីទេសចរណ៍។ ថ្វីត្បិត​តែ​បច្ចុប្បន្ននេះ លោកផ្តោតលើអ្នកនយោបាយ​ និងតារាល្បីៗ ប៉ុន្តែក្នុងរយៈពេលខាងមុខ មហាសេដ្ឋីសង្ឃឹមថាមនុស្សកាន់តែច្រើនអាចរកឃើញភាព​ស្រស់​ស្អាតនៃភពខាងក្រៅ។

Manga ដែលលោក Maezawa review ក្នុងវីដេអូរបស់ខ្លួនគឺ Space Brothers របស់អ្នកនិពន្ធ Chuya Koyama ។ Manga និយាយ​ពី​បង​ប្អូនអវកាសយានិកពីរនាក់ ស្នាដៃនេះបានកែសម្រួលទៅជា Anime ក៏ដូចជា Live action ផងដែរ។ តើ​នេះ​ជា Manga ដំបូង​គេ​ដែល​ត្រូវ​បាន​បញ្ជូន​ទៅ​កាន់​លំហឬ?

ក្នុងវីដេអូលោក Maezawa បាននិយាយថា “ខ្ញុំចង់យកសៀវភៅរឿង Manga Space Brothers ទាំង ៤០ ភាគមកទីនេះសម្រាប់អាន ប៉ុន្តែដោយសារចំនួនច្រើនពេក ដូច្នេះយកតាមទាំងអស់មិនបាន” ដូច្នេះហើយគាត់យកតាម ២៧ ភាគ។

ខ្លឹមសារវគ្គនេះយកតាមបរិបទក្នុង ISS (ឈ្មោះសរសេរកាត់នៃស្ថានីយ៍អវកាសអន្តរជាតិ) មានឥទ្ធិពលយ៉ាងខ្លាំង​មក​លើ​លោក​មហាសេដ្ឋី។ នេះក៏ជាមូលហេតុដែលលោកចង់អាននៅ ISS ផងដែរ។

រឿងមានឥទ្ធិពលយ៉ាងខ្លាំងមកលើមហាសេដ្ឋីរហូតធ្វើអោយគាត់យំ។ “គ្រាន់តែនឹកឃើញឈុតឆាកណាមួយក៏​ធ្វើ​អោយ​ខ្ញុំ​ស្រក់​ទឹកភ្នែកទៅហើយ។ នេះជាអ្វីដែល Manga អាចធ្វើបាន” ។

តើការ review ដ៏ពិសេសនេះធ្វើឱ្យអ្នកចង់អានរឿងនេះដែរឬទេ?

Sacchan