សម្រាប់អ្នកចូលចិត្តស្រាជប៉ុន “SAKE POST” សេវាកម្មផ្ញើ “គំរូស្រា” តាមប្រៃសណីយ៍

ពេលនិយាយពីវប្បធម៌ម្ហូបអាហាររបស់ជនជាតិជប៉ុន មនុស្សគ្រប់គ្នាតែងតែគិតដល់ Sushi ប៉ុន្តែមិនអាចខ្វះស្រា Sake បានឡើយ។ នេះជាភេសជ្ជៈដ៏ល្បី និងពេញនិយមបំផុតនៅក្នុងប្រទេសជប៉ុន។

ក្រុមហ៊ុនទទួលខុសត្រូវមានកម្រិត FARM8 (ទីក្រុង Nagaoka ខេត្ត Niigata) សហការជាមួយក្រុមហ៊ុន FERMENT8 Co., Ltd. (ទីក្រុង Nagaoka ខេត្ត Niigata) បានបង្កើតគេហទំព័រផ្គត់ផ្គង់សេវាចែកចាយស្រាមានឈ្មោះថា “SAKE POST” ។

“SAKE POST” ដំណើរការស្រដៀងនឹងគំរូចុះឈ្មោះទិញកាសែតប្រចាំខែ។ ប្រសិនបើចុះឈ្មោះ SAKE POST ជារៀងរាល់​ខែអ្នកនឹងទទួលបានស្រាគំរូចំនួន ៣ ប្រភេទមកពីម៉ាកស្រាក្នុងតំបន់ Niigata តាមរយៈប្រអប់សំបុត្រ។

រូបភាព https://jp.sake-times.com/special/press/pp_sakepost

គំរូ SAKE POST នីមួយៗមានចំណុះ ១០០ មីលីលីត្រ។

ជម្រើសនៃការចុះឈ្មោះមានពីរ៖

• កញ្ចប់ធម្មតាមានតម្លៃ ១,២១០ យ៉េន/ខែ (រួមទាំងពន្ធ)។ កញ្ចប់នេះរួមមានប្រភេទស្រា Sake ប្រពៃណីដែលអ្នកស្រុកចូលចិត្ត ដូចជា Honjozo-shu ស្រាអង្ករសុទ្ធ និងស្រាធម្មតា។
• កញ្ចប់ស្រា Ginjo កម្រិតខ្ពស់ជាងមានតម្លៃ ១,៩៨០ យ៉េន/ខែ (រួមទាំងពន្ធ)។ Ginjo Sake ជាប្រភេទស្រា Sake ដែលអ្នកអាចផឹកក្នុងឱកាសពិសេសប៉ុណ្ណោះ។ ស្រានេះត្រូវបានផលិតយ៉ាងយក​ចិត្ត​ទុក​ដាក់ មានក្លិនឈ្ងុយ ព្រម​ទាំងរសជាតិពិសេស។ នេះជាប្រភេទស្រា Sake ដែលមានតម្លៃថ្លៃ តែងយកធ្វើជាអំណោយ។ ស្រាគំរូក្នុងកញ្ចប់​មួយ​ចំនួនរួមមាន Junmai Daiginjo, Daiginjo, Junmai Ginjo និង Ginjo Sake ។

កញ្ចប់ “SAKE POST” ជួយអោយអ្នកអាចប្រៀបធៀបភាពខុសគ្នារវាងប្រភេទស្រាដូចគ្នា ប៉ុន្តែម៉ាកផ្សេងគ្នា។ លើស​ពី​នេះ​អតិថិជនអាចចូល QR កូដដែលភ្ជាប់នៅលើថង់ស្រានីមួយៗ ដើម្បីអានមតិយោបល់អ្នកដទៃចំពោះប្រភេទ​ស្រាទាំងនោះ។

រូបភាព https://sakepost.jp/

ម៉្យាងទៀតអ្នកអាចផ្ញើមតិយោបល់របស់ខ្លួនទៅកាន់រោងចក្រផលិតស្រា។ នេះជាឱកាសដ៏ល្អសម្រាប់អ្នកផលិតស្រា​ស្តាប់​យោបល់របស់អតិថិជន ហើយកែលម្អគុណភាពស្រារបស់ខ្លួន។

សេវាកម្ម SAKE POST សង្ឃឹមថានៅពេលអនាគតអាចបង្រួមគម្លាត និងធ្វើឱ្យទំនាក់ទំនងរវាងអ្នកផលិត និងអ្នក​ប្រើ​ប្រាស់​កាន់​តែស៊ីជម្រៅ។

Yukie