ជប៉ុនបង្កើតម៉ាសបញ្ចេញពន្លឺអាចជួយរកឃើញវីរុសកូវីដ ១៩

ក្រុមអ្នកវិទ្យាសាស្ត្រមកពីសាកលវិទ្យាល័យមួយក្នុងទីក្រុងក្យូតូ (KPU) នៅភាគខាងលិចប្រទេសជប៉ុន បានបង្កើត​​ប្រភេទ​ម៉ាសមានមុខងារអាចបញ្ចេញពន្លឺ ប្រសិនបើប៉ះពាល់នឹងវីរុសដែលបណ្តាលឱ្យមានការរាតត្បាតជំងឺ​កូវីដ ១៩ ។

ម៉ាសប្រភេទថ្មីនេះនឹងភ្លឺក្រោមពន្លឺអ៊ុលត្រាវីយូឡេ ប្រសិនបើប៉ះពាល់នឹងកូវីដ ១៩ ។

អ្នកវិទ្យាសាស្ត្របានបង្កើតប្រតិកម្មនេះ ដោយប្រើអង្គបដិប្រាណដែលយកចេញពីស៊ុតរបស់អូទ្រុស។ សត្វអូទ្រុស​មាន​សមត្ថភាពផលិតអង្គបដិប្រាណឬប្រូតេអុីនផ្សេងៗគ្នា ដើម្បីបន្សាបសារធាតុចម្លែកចូលទៅក្នុងខ្លួន។

រូបភាព https://mainichi.jp/english/articles/20211208/p2g/00m/0sc/043000c

គំរូវីរុសកូវីដលើតម្រងម៉ាស់ បន្ទាប់ពីជ្រលក់ថ្នាំដែលផ្ទុកសារធាតុ fluorescent ដែលមានអង្គបដិប្រាណចំពោះកូវីដ ១៩ បញ្ចេញពន្លឺក្រោមពន្លឺអ៊ុលត្រាវីយូឡេ។

កាលពីខែកុម្ភៈ ឆ្នាំ ២០២០ ក្រុមស្រាវជ្រាវបានចាក់ប្រភេទវីរុស SARS-CoV-2 អសកម្ម និងមិនបង្កគ្រោះថ្នាក់ដល់សត្វអូទ្រុសញី។ ពួកគេបានចម្រាញ់អង្គបដិប្រាណយ៉ាងច្រើនដោយជោគជ័យពីស៊ុតរបស់វា។

បន្ទាប់មកក្រុមអ្នកវិទ្យាសាស្ត្របានបង្កើតស្រទាប់តម្រងពិសេសដែលអាចបញ្ចូលទៅក្នុងម៉ាស។ ដើម្បីត្រួតពិនិត្យ​អ្នកប្រើអាចបើកមើលស្រទាប់តម្រងនេះក្នុងម៉ាស ហើយបាញ់ថ្នាំ fluorescent ដែលមានផ្ទុកអង្គបដិប្រាណដែលចម្រាញ់ចេញពីស៊ុតរបស់សត្វអូទ្រុស។ ប្រសិនបើមានវីរុសតម្រងនឹងបញ្ចេញពន្លឺពេលប៉ះនឹងពន្លឺអ៊ុលត្រា​វីយូ​ឡេ។

នៅពេលដែលក្រុមអ្នកស្រាវជ្រាវធ្វើការពិសោធន៍លើមនុស្សចំនួន ៣២ នាក់ដែលបានឆ្លងជំងីកូវីដ ១៩ ក្នុងរយៈពេល ១០ ថ្ងៃតាមលំដាប់ស្តង់ដារ។ លទ្ធផលបង្ហាញថាម៉ាសទាំងអស់ដែលពួកគេពាក់បញ្ចេញពន្លឺនៅក្រោមកាំរស្មី​អ៊ុល​ត្រាវីយូ​ឡេ។ ពន្លឺនេះនឹងបាត់ទៅបន្តិចម្តងៗ ហើយបរិមាណវីរុសរបស់ពួកគេក៏ថយចុះដែរ។

គោលដៅបន្ទាប់របស់អ្នកវិទ្យាសាស្ត្រគឺពង្រីកការពិសោធន៍ដោយមានការចូលរួមពីមនុស្ស ១៥០ នាក់។

ប្រធានសាលា KPU Yasuhiro Tsukamoto អាយុ ៥២ ឆ្នាំ ដែលជាអ្នកដឹកនាំក្រុមស្រាវជ្រាវខាងលើបានរកឃើញថាខ្លួនគាត់ឆ្លងកូវីដ ១៩ ដោយពឹងលើម៉ាសនេះ។ ក្រោយ​មកលទ្ធផល​តេស្ត​បញ្ជាក់​ថា​គាត់​មាន​ជំងឺ។ គាត់សង្ឃឹមថាម៉ាសអាច​លក់​ទៅ​អោយអ្នកប្រើប្រាស់បានយ៉ាងងាយ ហើយពិនិត្យមើលថាតើពួកគេឆ្លងវីរុសដែរអត់។

លោក Yasuhiro Tsukamoto បាននិយាយថា “យើងអាចផលិតអង្គបដិប្រាណជាច្រើនពីស៊ុតសត្វអូទ្រុសក្នុងតម្លៃទាប។ នៅពេលអនាគត ខ្ញុំចង់ប្រែក្លាយផលិតនេះទៅជាឧបករណ៍តេស្តយ៉ាងស្រួលដែលអ្នកណាក៏អាចប្រើបាន” ។

ផលិតផលនេះកំពុងស្ថិតនៅក្នុងដំណើរការសម្រេច អ្នកវិទ្យាសាស្ត្រជប៉ុនរំពឹងថារដ្ឋាភិបាលអាច​អនុញ្ញាត​ឱ្យ​លក់​ម៉ាស​ប្រភេទ​នេះ​លើ​ទីផ្សារ​នៅ​ឆ្នាំ​ក្រោយ។

Yukie

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: