ណែនាំលម្អិតហាងមី Soba ឈរដែលអ្នកគួរតែភ្លក់ម្តងបើមាន​ឳកាស​ទៅ​លេងជប៉ុន

នៅប្រទេសជប៉ុនបុគ្គលិក​ការិយាល័យហាក់ដូចជាមមាញឹកណាស់ ពួកគេរវល់ដល់ថ្នាក់គ្មានពេលទទួលទានអាហារថ្ងៃត្រង់។ អ្នកខ្លះទិញបាយប្រអប់អាហារ​ថ្ងៃត្រង់ អង្គុយញ៉ាំផង ធ្វើការផង ហើយប្រសិនបើពួកគេមានការងារនៅខាងក្រៅ​ក្រុម​ហ៊ុន សូម្បីតែពេលញ៉ាំបាយប្រអប់ក៏គ្មានដែរ។

ពេលនោះបុគ្គលិកការិយាល័យនឹងបរិភោគមី Soba ឈរដែលតែងតែមានលក់នៅស្ថានីយ៍រថភ្លើង។

ប្រសិនបើធ្លាប់ទៅជប៉ុន តើអ្នកធ្លាប់ឃើញហាងបែបនេះទេ?

រូបភាព https://notsushu.com/2017/11/14/post-21124/notsushu1/

សម្រាប់​អ្នក​ដែល​មិន​ធ្លាប់​ញ៉ាំ​អាហារ​នៅ​ទីនេះ ប្រាកដជាឃើញថាកន្លែងនេះចម្លែកបន្តិច ហើយមិនសូវចូលចិត្តប៉ុន្មាន​ទេ។ ដូច្នេះជាដំបូងក្នុងអត្ថបទនេះ ខ្ញុំនឹងបង្ហាញអ្នកពីរបៀបញ៉ាំនៅហាងមី Soba ដូចនេះ។

ដំបូងអ្នកត្រូវទិញប័ណ្ណអាហារ។

រូបភាព https://livinginjapan.net/ja/2020/07/00336-ja/

ម៉ាសុីនលក់ប័ណ្ណអាហារដាក់នៅមុខឬខាងក្នុងហាងជិតច្រកចូល របៀបប្រើមានភាពងាយស្រួល ដោយអ្នកគ្រាន់​តែ​ចុច​លើអាហារដែលញ៉ាំរួចបង់ប្រាក់។ ទោះជាយ៉ាងណាអ្នកគួរចំណាំជ្រើសរើសអាហារក្តៅឬត្រជាក់ ព្រោះម្ហូបដូចគ្នា ប៉ុន្តែមានក្តៅឬត្រជាក់។ អាស្រ័យតាមតំបន់មានកន្លែងខ្លះគ្មានម៉ាស៊ីនលក់ប័ណ្ណអាហារទេ។ ចំពោះករណីនេះអ្នក​អាច​បញ្ជាទិញផ្ទាល់ជាមួយបុគ្គលិក ពេលនោះបើជាជនបរទេសរឹតតែពិបាក។

ជំហានបន្ទាប់ប្រគល់ប័ណ្ណទៅអោយបុគ្គលិក ក្នុងករណីទិញប័ណ្ណក្នុងម៉ាសុីន។

អាស្រ័យ​លើ​ហាង ហាងខ្លះប័ណ្ណ​អាហារ​ដូច​គ្នា អ្នក​អាច​ទិញ Soba, Udon ប្រភេទ​ក្តៅឬ​ត្រជាក់។ ដូច្នេះប្រសិនបើបុគ្គលិក​សួរ​មិន​ចាំបាច់ភ័យទេ អាចឆ្លើយតាមសម្រួល។

ក្នុងអំឡុងពេលរង់ចាំចម្អិនអាហារ សូមយកទឹកផឹកដោយខ្លួនឯង ព្រោះនេះជាប្រភេទ self- service (ធ្វើខ្លួន​ឯង)។

ម្ហូបចេញមកហើយ។

ពេលអាហាររួចរាល់ បុគ្គលិកនឹងហៅអ្នកមកយក។

នៅលើប័ណ្ណអាហារមានដាក់លេខ ដូច្នេះមានកន្លែងមួយចំនួនបុគ្គលិកហៅតាមលេខ កន្លែងខ្លះហៅឈ្មោះមុខម្ហូប​តាម​ទម្រង់ “かけそばをお待ちのお客様” (kakesoba o omachi no okyakusama) – សូមអញ្ជើញភ្ញៀវដែលកំពុង​រង់​ចាំ​មុខម្ហូប Kakesoba (Kakesoba ដែលជាមី Soba ទឹកស៊ុបក្តៅ) ។

ដូច្នេះ​ប្រសិន​បើគេ​ហៅ  អ្នកទៅកាន់បញ្ជរ​យក​អាហារ​។

រយៈពេលរង់ចាំប្រហែល ២ ទៅ  ៣ នាទី ក្នុងករណីញ៉ាំមីកញ្ចប់ក៏​ត្រូវ​រង់ចាំ​ប្រហែល ​៣​ នាទី​ដែរ ដូច្នេះអាចនិយាយបានថា​ហាងចម្អិនអាហារលឿនទាន់ចិត្ត។

នៅក្នុងរូបភាពអ្នកអាចឃើញថាគេមិនដាក់ចង្កឹះលើថាសទេ ដូច្នេះអ្នកអាចយកចង្កឹះដោយខ្លួនឯងនៅបញ្ជរឬតុបរិភោគអាហារ។

បន្ទាប់ពីញ៉ាំរួច ចូរដាក់ឈុតទាំងអស់ (រួមមានចាន កែវទឹក ចង្កឹះដាក់ក្នុងថាស) រួចដាក់នៅ  返却口 (Henkyaku-guchi) ។

តាម​ការ​ប៉ាន់​ស្មាន​ជនជាតិជប៉ុនញ៉ាំមីមួយចាននេះចំណាយពេល​តែ ៥ នាទី​ប៉ុណ្ណោះ។

ទទួលទានអាហារថ្ងៃត្រង់ចំណាយពេលប៉ុណ្ណឹង តើអាចចាត់ទុកថា “លឿន និងគ្រោះថ្នាក់ពេក” ទេ?

មនុស្សមួយចំនួនបែរជាគិតថាចម្អិនលឿនអញ្ចឹង តើអាចនឹងឆ្ងាញ់ទេ? ចំពោះចំណុចនេះ អ្នកមិនចាំបាច់បារម្ភឡើយ ខ្ញុំនឹងណែនាំហាង Soba ឈរដែលមានរស់ជាតិឆ្ងាញ់ អ្នកគួរតែទៅភ្លក់។

ស្ថានីយ៍ Tokyu Kamata Shibusoba

រូបភាព https://getnavi.jp/cuisine/66919/

ហាងមី Soba ឈរនៅស្ថានីយ៍នេះល្បីណាស់ ហើយនេះជាមុខម្ហូបដែលពេញនិយមបំផុតក្នុងម៉ឺនុយ ピリ辛ねぎそば (Piri kara negi soba) – soba ខ្ទឹមបារាំងហឹរល្មម។

មី Soba នេះប្រើទឹកជ្រលក់ពិសេសលាយបញ្ចូលគ្នារវាង 豆板醤 (ជាប្រភេទទឹកម្ទេសចិន) ស្ករ ទឹកស៊ីអុីវ Soba ជា​ដើម។ លើសពីនេះរសជាតិខ្ទឹមបារាំងគួបផ្សំជាមួយនឹងរសជាតិហឹរល្មមរបស់ទឹកជ្រលក់ បង្កើតបានជារសជាតិដ៏អស្ចារ្យ។ ក្រៅពីខ្ទឹមបារាំង លើចានមី Soba មានបន្ថែមសាច់សាសុីវ ដូច្នេះទោះបីបរិមាណមើលទៅតិចក៏មានអារម្មណ៍ថាឆ្អែតដែរ។

ស្ថានីយ៍ Odakyu Shinjuku, Hakone Soba Honjin

ហាងនេះល្បីណាស់ តាមការប៉ាន់​ស្មានក្នុង​មួយ​ថ្ងៃមានភ្ញៀវចំនួន ២៦០០ នាក់។ ដើម្បីឆ្លើយតបទៅនឹងចំនួនអតិថិជន​ច្រើន ល្បឿនចម្អិនអាហាររបស់បុគ្គលិកនៅទីនេះក៏គួរអោយសរសើរដូចគ្នា។

ជាទូទៅហាងមានបុគ្គលិកតែ​ ១០ ​នាក់​ប៉ុណ្ណោះ ដើម្បីបំពេញតម្រូវការការងារ ពួកគេបម្រើការបញ្ជាទិញក្នុងរយៈពេល ១០ វិនាទី គ្រាន់តែមើលចលនារបស់បុគ្គលិកក៏ឃើញថាជំនាញណាស់។

ខ្ញុំសូមណែនាំមុខម្ហូបនេះមានឈ្មោះថា Yamakake soba ។

នៅជុំវិញព្រះច័ន្ទ (ពងក្រួច) គឺជា “ពពក” ការតុបតែមុខម្ហូបទាក់ទាញភ្នែក រសជាតិស្រទន់ល្មម។

ស្ថានីយ៍ Abiko Yayoiken

ប្រហែលមើលទៅមិនដូច ប៉ុន្តែ​នេះ​ជា​ហាងមី Soba ឈរមានរយៈពេល ៥០ ឆ្នាំមកហើយ។ មកដល់ទីនេះត្រូវតែភ្លក់ Soba Karaage (មាន់បំពង Soba) ។

ដោយសារតែទឹកស៊ុបនៅតំបន់ Kanto មានពណ៌រៀងខ្មៅ  ដូច្នេះមើលភ្លាមដឹងថាចម្អិនតាមបែប Kanto ។ លើស​ពី​នេះ Soba នៅតំបន់ Kanto សរសៃរមីមានលក្ខណៈធំ។

និយាយអញ្ចឹង Soba ប្រហិតសាច់ត្រីចៀន (ちくわ天そば) ក៏ឆ្ងាញ់ដែរ។

ថ្វីត្បិតតែហាង Soba ឈរភាគច្រើននៅស្ថានីយ៍ ប៉ុន្តែនៅតាមផ្លូវក៏មានច្រើនណាស់ដែរ។

ដោយផ្ទាល់ខ្ញុំចូលចិត្តហាង Soba ឈរនៅខាងក្រៅច្រកត្រួតពិនិត្យសំបុត្រ 2F ស្ថានីយ៍ Shibuya ។ មី Soba នៅទីនេះ​មានជាឈុត Tendon ឆ្ងាញ់​ពិសេស គួរអោយស្តាយ ដោយសារតែស្ថានីយ៍កំពុងជួសជុល ដូច្នេះមិនមានលក់នោះ​ទេ។

បន្ទាប់ពីស្ថានីយ៍ជួសជុលរួច ខ្ញុំប្រាកដជាទៅទីនោះញ៉ាំមួយចាន។ សង្ឃឹមថាអ្នកទាំងអស់គ្នានឹងទទួលបានបទពិសោធន៍ដ៏អស្ចារ្យនៅហាងមី Soba ឈរ ក្នុងប្រទេសជប៉ុន។

Kengo Abe