ស្ថានភាពលោកឪពុកជប៉ុនប្រើអំពើហិង្សាចំពោះកូនខ្លួនឯង

ថ្ងៃព្រហស្បតិ៍ 09/12/2021 | 16:53 ល្ងាច

កាលពីឆ្នាំមុនកើតមានករណីបុរសជនជាតិជប៉ុនវាយកូនស្រីអាយុមួយខែបណ្តាលអោយស្លាប់។ បន្ទាប់ពីករណីស្រដៀងគ្នាជាច្រើនកើតឡើង ជប៉ុនបានលើកអំពីបញ្ហាអប់រំមាតាបិតា និងរបៀបមើលថែកូនសម្រាប់ឪពុក។

បុរសជនជាតិជប៉ុនឈ្មោះ Natsuki Nakashima អាយុ ២៣ ឆ្នាំ ដើមឡើយបានដិសេធថាខ្លួនមិនបានបង្ករបួសលើកូនស្រី Kokona នៅ Kanoya ខេត្ត Kagoshima ទេ ប៉ុន្តែក្រោយមកគាត់បានសារភាពចំពោះការចោទប្រកាន់។

នៅពេលដែលឧប្បត្តិហេតុកើតឡើង Natsuki Nakashima កំពុងនៅផ្ទះជាមួយ Kokona និងកូនបួននាក់ផ្សេងទៀតរបស់ខ្លួន។ គាត់បានសារភាពថា “ខ្ញុំមានអារម្មណ៍តានតឹង ហើយវាយកូនព្រោះវាមិនព្រឹមឈប់យំ” ។

ករណីអំពើហិង្សាមួយចំនួនកើតចេញពីបាតុភូត パパ見知り (Papamishiri) នៅជប៉ុន។ ពាក្យ Papamishiri មានន័យថាក្មេងមិនចូលចិត្តឪពុក ចាត់ទុកដូចជាមនុស្សមិនស្គាល់ ពេលឪពុកចូលមកជិតឱបនឹងយំ។

អ្នកជំនាញមួយចំនួនបានពន្យល់ថា Papamishiri គឺជាសញ្ញាបង្ហាញថាការយល់ដឹងរបស់ទារកកំពុងអភិវឌ្ឍ។ ប៉ុន្តែចំពោះឪពុកដែលមិនមានបទពិសោធ នេះអាចជាការទទួលយកមិនបានពេលកូនបដិសេធ។

រូបភាពតំណាង

សាស្ត្រាចារ្យចិត្តវិទ្យា Masako Ishii នៅសាកលវិទ្យាល័យ Showa Women’s នៅទីក្រុងតូក្យូបានអោយដឹងថាទារកអំឡុងពេលអភិវឌ្ឍន៍ការយល់ដឹង អាចដឹងពីភាពខុសគ្នារវាងឪពុកម្តាយ និងការផ្លាស់ប្តូរតាមរយៈការបី។ អ្នកស្រីបន្តថាក្នុងគ្រួសារដែលម្តាយទទួលបន្ទុកមើលថែកូនច្រើន នៅពេលកូនមានអាយុចន្លោះពី ៦ ទៅ ៨ ខែ កូនតែងតែបដិសេធឪពុកមួយរយៈពេល។

សម្រាប់ឪពុកមួយចំនួនដែលមិនដឹងពីរបៀបដោះស្រាយបាតុភូតនេះ ស្ថានភាពអាចកាន់តែយ៉ាប់យ៉ឺន ហើយបន្សល់នូវផលវិបាកធ្ងន់ធ្ងរ រហូតដល់បាត់បង់ជីវិត។

យោងតាមការស្ទង់មតិរបស់ក្រសួងសុខាភិបាល ការងារ និងសុខុមាលភាពជប៉ុន ប្រហែលពាក់កណ្តាលករណីស្លាប់ដោយសារអំពើហិង្សាលើកុមារក្នុងឆ្នាំសារពើពន្ធ ២០១៩ ដែលទាក់ទងនឹងកុមារមានអាយុក្រោម ១ ឆ្នាំ។

ចំពោះករណីមួយផ្សេងទៀត នៅក្នុងឆ្នាំនេះលោក Kazuki Takakura ត្រូវបានតុលាការស្រុក Mito កាត់ទោសអោយជាប់ពន្ធនាគារ ៩ ឆ្នាំពីបទមនុស្សឃាត។ ជនរងគ្រោះជាកូនស្រីអាយុ ១០ ខែ ឈ្មោះ Hazuki ។ ចុងចោទបានប្រកែកថាគាត់មានអារម្មណ៍តានតឹង ដោយសារតែកូនស្រីមិនទទួលយកខ្លួន នេះក៏ជាមូលហេតុប្រើអំពើហិង្សាលើរាងកាយបណ្តាលអោយ Hazuki ស្លាប់។

លោក Takakura បាននិយាយក្នុងបទសម្ភាសន៍នៅពន្ធនាគារ Mito ថា៖ “កូនរបស់ខ្ញុំយំព្រោះតែមើលឃើញមុខខ្ញុំ រឿងនេះធ្វើអោយខ្ញុំទទួលយកមិនបាន។ ខ្ញុំមានការព្រួយបារម្ភយ៉ាងខ្លាំង ព្រោះកូនមិនអោយខ្ញុំបី ហើយខ្ញុំមិនអាចចែករំលែករឿងនេះជាមួយអ្នកណា” ។

បុរសម្នាក់នៅខេត្ត Chiba ភាគខាងកើតទីក្រុងតូក្យូត្រូវកាត់ទោសពីបទបង្ករបួសស្នាមដល់កូនប្រុសអាយុ ៤ ខែរបស់ខ្លួនក្នុងឆ្នាំ ២០១៩ ក៏នៅក្នុងស្ថានភាពស្រដៀងគ្នាដែរ។ គាត់បានសារភាពនៅចំពោះមុខតុលាការថា “កូនយំរាល់ពេលដែលប្រពន្ធរបស់ខ្ញុំមិននៅទីនោះ” ។

ខែវិច្ឆិកាគឺជាខែបង្ការការរំលោភបំពានលើកុមារនៅក្នុងប្រទេសជប៉ុន។ អ្នកជំនាញដូចជា Ishii យល់ថាគួរតែបង្កើតសេវាកម្មប្រឹក្សា ដើម្បីណែនាំឪពុកអំពីរបៀបមើលថែ និងទំនាក់ទំនងជាមួយកូន។ ក្រៅពីកូន ម្តាយក៏ត្រូវការជំនួយផងដែរ ព្រោះពួកគេងាយនឹងកើតជំងឺដូចជាជំងឺធ្លាក់ទឹកចិត្តក្រោយសម្រាលក្នុងករណីឪពុកគ្មានបទពិសោធ។

រូបភាពតំណាង

ដើម្បីឆ្លើយតបនឹងការអំពាវនាវនេះ នាយកដ្ឋានបានចាប់ផ្តើមកម្មវិធីឧបត្ថម្ភធនមួយ ដើម្បីលើកទឹកចិត្តដល់សមត្ថកិច្ចក្នុងតំបន់ឱ្យបង្កើតក្រុមជំនួយ ដោយអញ្ជើញលោកឪពុកដែលមានបទពិសោធមកនិយាយអំពីការចិញ្ចឹមបីបាច់កូន ក៏ដូចជាស្នើអោយបណ្តាទីក្រុងបង្កើតមជ្ឈមណ្ឌលគាំពារកុមារឱ្យបានឆាប់។

អ្នកជំនាញ Ishii បន្ថែមថា “នៅពេលដែលកុមារមិនយល់ភាសា ឪពុកម្តាយងាយនឹងទទួលរងសម្ពាធ” ។ ជាពិសេសឪពុកដែលមិនធ្លាប់ពពោះដូចអ្នកម្តាយ ពេលវេលាដែលដឹងអំពីទំនួលខុសក្នុងនាមជាឪពុកក៏ខ្លីដែរ ដូច្នេះពួកគេត្រូវការការអប់រំ និងជំនួយបន្ថែមទៀត។