ហេតុ​អ្វី​បាន​ជា​គេដាក់​ចាន​អំបិល​នៅ​មុខ​ទ្វារភោជនីយដ្ឋាន​ជប៉ុន?

តើអ្នកដឹងទេថាអំបិលសំខាន់យ៉ាងណាក្នុងវប្បធម៌ជប៉ុន?

អំបិលគឺជាគ្រឿងទេសទូទៅមួយប្រភេទដូចជាស្ករ Shoyu, Miso ជាដើម ប៉ុន្តែក្រៅពីធ្វើជាគ្រឿងទេស ជនជាតិជប៉ុន​ប្រើអំបិលក្នុងគោលបំណងផ្សេងទៀត ដែលតំណាងឲ្យ​វប្បធម៌ពិសេសរបស់ខ្លួន។

មុនពេលចាប់ផ្តើមការប្រកួតកីឡាចំបាប់ Sumo មានទម្លាប់បាចអំបិល (យកមួយក្តាប់តូចរួចបោះទៅលើ) ។ បន្ទាប់​ពីចូលរួមពិធីបុណ្យសព មុន​ចូល​ផ្ទះ ជនជាតិ​ជប៉ុន​នឹងបាច​អំបិល​លើ​ខ្លួន។ នៅមុខភោជនីយដ្ឋានតែងតែដាក់ចានអំបិល ។ល។ ទំនៀមទំលាប់ទាំងអស់នេះសុទ្ធតែមានអត្ថន័យបន្សុទ្ធក្នុងវប្បធម៌ជប៉ុន។

អំបិលចម្រាញ់ចេញពីសមុទ្រ ដែលជារឿយៗសមុទ្រប្រៀបដូចជាម្តាយ ដូច្នេះហើយ ជនជាតិជប៉ុនឲ្យ​តម្លៃអំបិលដូច​ជា​អំណោយដែលទទួលបានពីកន្លែង​ពិសិដ្ឋ ផ្តល់ជីវិតដល់ពួកគេ។

នៅក្នុងទេវកថារបស់ជប៉ុន មានមនុស្សម្នាក់ឈ្មោះ Izanagi Mikoto ក្រោយពេលត្រឡប់មកពីឋាននរកប្រើទឹកសមុទ្រលាងជម្រះភាពកខ្វក់ក្នុងព្រលឹងវិញ្ញាណ។ តាម​រយៈ​រឿង​នេះឃើញ​ថាវប្បធម៌​បន្សុទ្ធដោយអំបិលមាន​តាំង​ពី​យូរ​យារ​ណាស់​មក​ហើយ។

តាមរយៈទេវកថានេះបង្កើតបានជាពិធីលាងបាប (大祓 – ō harae) ដែលនៅក្នុង Shinto ជាសាសនាពិសេសរបស់​ជប៉ុន។

ពិធីបុណ្យនេះប្រារព្ធធ្វើឡើងកន្លះឆ្នាំម្តង ក្នុងគោលបំណង “សម្អាត” ភាពកខ្វក់នៅលើខ្លួនប្រាណដោយប្រើទឹកសមុទ្រ។ ក្នុងភាសាជប៉ុន នៅពេលចង់បំភ្លេចរឿងអ្វី​មួយ មានរបៀបនិយាយ 水に流す (mizu ni nagasu ន័យចំមានន័យថាទឹកហូរទៅឆ្ងាយ តាមន័យធៀបមានន័យថា ទុកឲ្យ​អ្វីមួយទៅជាអតីតកាល) ។ ប្រភពដើមពាក្យនេះ​មក​​ពី​​ពិធី​​លាង​បាបដែល​​បាន​​រៀប​រាប់​​ខាង​​លើ។

ទំនៀម​ទម្លាប់បាច​អំបិលលើខ្លួនបន្ទាប់ពីចូលរួមពិធីបុណ្យសព ដើម្បីកុំឲ្យ​ចំហាយមិនបរិសុទ្ធ​របស់អ្នកស្លាប់ចូល​ផ្ទះ ក៏​មក​ពី​ទេវកថា​នេះ​ដែរ។

ក្រៅពីនេះ តើអ្នកធ្លាប់បានឃើញ Sumo បាចអំបិលមុនការប្រកួតដែរទេ?

រូបភាព https://www.memcode.jp/4812

សកម្មភាពនេះមានអត្តន័យសម្អាតសង្វៀន ក្រៅពីនេះ នៅពេលដែលមិនចូលចិត្តនរណាម្នាក់ ជនជាតិជប៉ុនតែង​តែ​បាច​អំបិលលើបុគ្គលនោះ ដើម្បីបន្សុទ្ធ “ចំណុចអាក្រក់” ដែលធ្វើឲ្យ​ខ្លួនឯងមិនចូលចិត្ត។

ត្រលប់មកប្រធានបទវិញ ហេតុ​អ្វី​បាន​ជានៅមុខភោជនីយដ្ឋានជប៉ុនតែងតែដាក់ចានអំបិល?

ប្រសិនបើអ្នកចាប់អារម្មណ៍ អ្នកប្រាកដជាឃើញភោជនីយដ្ឋានបែបជប៉ុនច្រើនដាក់ចានអំបិលដែលមានរាងទាក់ទាញភ្នែកនៅមុខទ្វារ។

វត្ថុនេះគេហៅថា 盛り塩 (mori-jio) ។ រូបរាងរបស់ Mori-jio មានកំពូលខ្ពស់ស្រួច។

ក្នុងភាសាជប៉ុន “ដាក់ជាគំនរ” ក៏មានអត្ថន័យទីពីរថា “រស់រវើក អ៊ូអរ” ម្យ៉ាងទៀត រូបរាងដ៏រឹងមាំដូចភ្នំក៏តំណាង​ឲ្យ​ការជូនពរឲ្យ​អាជីវកម្មរីកចម្រើន ជោគជ័យ។

មិនត្រឹម​តែប៉ុណ្ណឹង វត្ថុនេះក៏បង្កប់អត្ថន័យថា នេះជាទីកន្លែងដែលទេវតាបានយាងចុះមក។

ដូច​អ្នក​រាល់​គ្នា​បាន​ដឹង​ហើយ​ថា ជនជាតិ​ជប៉ុន​មាន​ចំនួន​ពាក្យ​ស្មុគស្មាញ​ខ្លាំង​ក្នុង​ការ​រាប់​លេខ។ ប្រសិនបើរាប់មនុស្សជនជាតិជប៉ុនប្រើ 一人 (hitori, មនុស្សម្នាក់), 二人 (Futari, ពីរនាក់) ចំណែកឯរាប់ទេវតាជនជាតិជប៉ុននិយាយ​ថា 一柱 (Icchuu, មួយសសរ), 二柱 (nichuu, ពីរសសរ) ។

ជនជាតិជប៉ុនជឿថាទេវតាជួយទ្រពិភពលោក ដូច្នេះពួកគេប្រើប្រព័ន្ធរាប់ “សសរ” ។ ហេតុនេះនៅកន្លែងដែលទេវតាយាងមកជាសសរខ្ពស់ស្រួច ជាពិសេសត្រូវតែជាអំបិលសម្រាប់បន្សុទ្ធ តាមអត្ថន័យដែលបានពន្យល់ខាង​លើ។

តាំងពីរូបរាងរហូតដល់ធាតុផ្សំសុទ្ធតែមានអត្តន័យច្បាស់លាស់ ដូច្នេះហើយពេលឃើញអំបិលមួយចាននេះ សូមកុំ​ប៉ះ​ពាល់ ​ឬភ្លក់ឡើយ។

ជាងនេះទៅទៀត នៅប្រទេសចិនសម័យបុរាណមានរឿងមួយនិយាយពីស្រីស្នំម្នាក់ ព្រោះតែចង់ឲ្យ​ព្រះចៅអធិរាជ​ផ្ទុំជាមួយនាង ក៏បាចទឹកអំបិលលើស្លឹកឫស្សី ដើម្បីទាក់ទាញចៀមឲ្យ​ស៊ី។ នៅសម័យនោះមានទំនៀមទម្លាប់​នាំចៀមដើរលេង ប្រសិនបើចៀមឈប់នៅបន្ទប់ស្រីស្នំណា យប់នោះអធិរាជនឹងផ្ទុំជាមួយម្នាក់នោះ។

នៅពេលដែលរឿងនេះទៅដល់ប្រទេសជប៉ុន វិវត្តន៍ក្លាយជា “ប្រើអំបិលអញ្ជើញភ្ញៀវឲ្យ​ចូលហាង” ដូច្នេះហាងជប៉ុនច្រើនដាក់ចានអំបិលនៅមុខទ្វារ។ ប៉ុន្តែបើគិតឲ្យ​ច្បាស់ចៀមចូលចិត្តស៊ីស្លឹកឬស្សីរោយទឹកអំបិល តែបើទុក​ចាន​អំបិល​ទាំង​មូលពិតជាគួរឲ្យ​អាណិតណាស់។

សរុបទៅចានអំបិលមានអត្ថន័យច្រើន ដូច្នេះប្រសិនបើមើលឃើញ សូមកុំលេងឲ្យ​សោះ។

ប្រសិនបើអ្នកកំពុងបើកអាជីវកម្មភោជនីយដ្ឋាន ហើយចង់សាកល្បងប្រើអំបិលធម្មជាតិដែលចម្រាញ់ចេញពីសមុទ្រ។ តាមគំនិតរបស់ខ្ញុំអំបិលថោកៗភាគច្រើនដែលទិញនៅជប៉ុនសុទ្ធតែសិប្បនិម្មិត បាត់បង់ទំនាក់ទំនងជាមួយ​នឹងសមុទ្រ ដូច្នេះប្រហែលជាមិនល្អទេ។

Kengo Abe

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: