មនុស្សយន្ត “មុខឆ្មា” គួរឱ្យស្រលាញ់នៅភោជនីយដ្ឋានមី Soba ជប៉ុន

ថ្ងៃចន្ទ 06/12/2021 | 13:22 ល្ងាច

ភោជនីយដ្ឋានលក់មី Soba មួយកន្លែងនៅទីក្រុង Hokkaido ភាគខាងជើងប្រទេសជប៉ុន បានណែនាំឆ្មាមនុស្សយន្តដែលបម្រើសេវាកម្មលើកដំបូងក្នុងខេត្ត។ មនុស្សយន្តមានឈ្មោះថា “Belle Bot” ជាមួយនឹងសម្លេងគួរឱ្យស្រលាញ់ ធ្វើជាបុគ្គលិកបម្រើសេវាកម្មអាហារនៅសាខា Hitsujigaoka-dori ស្រុក Kiyota ទីក្រុង Sapporo កាលពីថ្ងៃទី ២៨ ខែវិច្ឆិកាកន្លងទៅ។

Bella Bot មានកម្ពស់ ១២៩ សង់ទីម៉ែត្រជាមួយនឹងអង្កត់ផ្ចិតតួខ្លួនប្រហែល ៥៥ សង់ទីម៉ែត្រ ការរចនាមនុស្សយន្តរួមមាន ៤ ជាន់ផ្ទុកអាហារលើកអោយភ្ញៀវ។ ទម្រង់មុខឆ្មាមនុស្សយន្តជាអេក្រង់ Touch Screen ពេលប៉ះត្រចៀកមនុស្សយន្តនឹងបង្ហាញអារម្មណ៍ខុសៗគ្នា។

Belle Bot ត្រូវបានណែនាំនៅហាងមី Soba នេះ ដើម្បីកាត់បន្ថយការទំនាក់ទំនង និងឆ្លើយតបចំពោះការខ្វះខាតកម្លាំងពលកម្មដោយសារជំងឺរាតត្បាត។ ក្រៅពីបម្រើអាហារ មនុស្សយន្តឆ្មាក៏អាចផ្សព្វផ្សាយផលិតផលមួយចំនួន និងច្រៀងផងដែរ។ បច្ចុប្បន្ននេះ សាខា Hitsujigaoka-dori កំពុងផ្តោតលើមុខងារបម្រើសេវាកម្មរបស់មនុស្សយន្ត មុខងារទាំងពីរនេះនឹងត្រូវប្រើប្រាស់នាពេលអនាគត។

Yukie Komi អាយុ ៣០ ឆ្នាំដែលកំពុងគ្រប់គ្រងហាងបាននិយាយថា៖ “ខ្ញុំសប្បាយចិត្តណាស់ដែលអតិថិជនតាំងពីក្មេងរហូតដល់ចាស់ចូលចិត្តឆ្មាមនុស្សយន្តនេះ។ យើងចង់ឱ្យឆ្មាមនុស្សយន្តបម្រើសេវាកម្មប្រកបដោយប្រសិទ្ធភាពក្នុងអំឡុងពេលមមាញឹកចុងឆ្នាំ ដោយសារជនជាតិជប៉ុនមានទម្លាប់ទទួលទានមី Soba យប់ឆ្លងឆ្នាំ” ។