ពិតជាគួរឱ្យអស់សំណើចបើ “ថ្ងៃណាមួយគ្រឿងផ្សំមីកំប៉ុងអណ្តែតក្នុងអាងត្រាំទឹកក្តៅរបស់អ្នក”

ក្រុមហ៊ុនមីកញ្ចប់ជប៉ុន Nissin បានបង្ហោះនៅលើ Twitter កាលពីថ្ងៃទី ២៦ ខែវិច្ឆិកាដូចតទៅ៖ “យើងបង្កើតប្រដាប់​ប្រដា​ពេលងូតទឹកមួយចំនួនដោយផ្អែកលើគំរូគ្រឿងផ្សំមីកំប៉ុង”។ ភ្ជាប់មកជាមួយរូបថតបុរសម្នាក់កំពុងសម្រាកក្នុងអាងងូតទឹក នៅជុំវិញខ្លួនពោពេញទៅដោយគ្រឿងផ្សំមីដែលលក់ដាច់បំផុតនៅជប៉ុន ខុសគ្នាត្រឹម​តែទំហំប៉ុណ្ណោះ។ ក្រុមហ៊ុនក៏និយាយផងដែរថា ទោះបីជាលើកនេះទាំងអស់ត្រូវបានធ្វើដោយដៃ ប៉ុន្តែប្រសិន​បើ​ការ​ឆ្លើយ​តបរបស់អ្នកប្រើប្រាស់ល្អ យើងអាចនឹងពិចារណាលើការធ្វើពាណិជ្ជកម្មផលិតផល។

គ្រឿងផ្សំដែលអ្នកមើលឃើញក្នុងរូបភាពរួមមានស៊ុត សាច់ “អាថ៌កំបាំង” (謎肉) បង្គាលាបពណ៌ដូចជារបស់ពិត។ បន្ទាប់ពីបង្ហោះបាន ១ ម៉ោង ការ​បង្ហោះ​នេះ​ទទួល​បាន Retweet ជាង ៦០០០ និង ១៣០០០ Like ។ មនុស្សជាច្រើន​គិត​ថាក្រុមហ៊ុនគួរតែលក់ផលិតផលដូចក្នុងរូបភាព អ្នកខ្លះថែមទាំងសួរថាទិញនៅឯណា។ មតិ​មួយ​ទៀត​បាន​​និយាយ​​ថា​៖ “ជាជាងដាក់គ្រឿង​ផ្សំ​ចូលអាងងូតទឹក ខ្ញុំ​ចូល​ចិត្ត​ដាក់​សរសៃរមីជាង” ។

ក្រុមហ៊ុន Nissin បន្ថែមថាទំហំគ្រឿងផ្សំក្នុងរូបភាពប្រហែល ១២ សង់ទីម៉ែត្រ ដែលធ្វើពីអេប៉ុង ហើយលាបពណ៌ពី​លើ។

“យើងបានយក​គំនិត​នេះ​ចេញ​ពី​ធាតុផ្សំ​សំខាន់​ទាំង​បី ហើយ​បង្កើន​ទំហំ​របស់ពួក​វា។ ព្រោះតែថ្ងៃទី ២៦ ខែវិច្ឆិកាជា​ថ្ងៃ Bath Day ដូច្នេះយើងសង្ឃឹមថាអ្នកប្រើប្រាស់ទាំងអស់នឹងរីករាយជាមួយនឹងគំនិតនេះ” ។

ទោះបីជាមិនមានគម្រោងធ្វើពាណិជ្ជកម្មផលិតផល ប៉ុន្តែ Nissin ក៏បាននិយាយបន្ថែមថា “នឹងពិចារណាប្រសិន​បើ​ទទួល​បាន​មតិ​យោបល់​វិជ្ជមានពីអ្នកប្រើប្រាស់”។

នៅប្រទេសកម្ពុជាភាគច្រើនមិនមានវប្បធម៌ត្រាំអាងទឹកក្តៅនោះទេ ដូច្នេះប្រដាប់ប្រដាលេងបែបនេះប្រហែលជាមិនពេញនិយមនោះទេ ប៉ុន្តែប្រសិនបើ Nissin អភិវឌ្ឍបង្កើតអេប៉ុងដុសខ្លួនតាមទម្រង់ខាងលើ ប្រហែលជាអាចពេញនិយម។

Chee