កាលវិភាគប្រចាំថ្ងៃ និងរបបអាហាររបស់សាមូរ៉ៃលំដាប់លេខ ១ នៅជប៉ុន

តើអ្នកធ្លាប់ស្រមៃគិតថាមនុស្សម្នាក់ដែលគេចាត់ទុកជាសាមូរ៉ៃលេខ ១ នៅក្នុងប្រទេសជប៉ុន កាលវិភាគប្រចាំថ្ងៃនឹងមមាញឹកយ៉ាងណាទេ? ឧទាហរណ៍ដូចជាត្រូវក្រោកពីព្រលឹម ចូលគេងយប់ជ្រៅ ដោះស្រាយនយោបាយ។ល។ តើចំណុច​ទាំង​នេះ​ពិតទេ?

ក្នុងភាសាជប៉ុនមាន​សុភាសិតមួយពោលថា៖ “ជីវិត​ដែល​មាន​សុខភាពល្អមិនត្រូវការថ្នាំ” ប្រយោគនេះមានន័យថាពេលធ្លាក់ខ្លួនឈឺទើបប្រញាប់ប្រញាល់ទៅទិញថ្នាំ ចំណែកឯក្នុងជីវិតរស់នៅប្រចាំថ្ងៃ បើយើងរក្សាររបបរស់នៅមាន​សុខ​ភាព នោះសុខភាពរបស់យើងនឹងល្អ ជៀសឆ្ងាយពីជំងឺ (ខ្ញុំក៏នឹងចាប់ផ្តើមទទួលទានអាហារសុខភាព ចាប់ពី…ថ្ងៃស្អែក) ដែរ។

ក្នុងនាមជា Shogun នាំមុខគេនៅក្នុងប្រទេសជប៉ុន ប៉ុន្តែ Tokugawa Ieyasu បែរជាមិនរស់នៅបែបធូររលុងនោះទេ ផ្ទុយទៅវិញ គាត់ដឹង​ពី​របៀបថែរក្សាសុខភាព និងធ្វើតាមកាលវិភាគដែលជាប់លាប់។ នោះប្រហែលជាមូលហេតុ​ដែលគាត់រស់នៅដល់អាយុ ៧៣ ឆ្នាំ ជាក់ស្តែងកាលវិភាគរបស់ Tokugawa Ieyasu មានអ្វីខ្លះក្នុងមួយថ្ងៃ តោះចូរស្វែងយល់ជាមួយនឹង JAPO ។ ហើយប្រសិនបើអាច អ្នកក៏គួរតែពិគ្រោះ និងរៀនពីរបៀបរស់នៅរបស់គាត់ផងដែរ។

៦ៈ០០ ព្រឹក

ក្រោកពីគេង

មិនថារដូវរងា ឬរដូវក្តៅនោះទេ ឲ្យតែដល់ម៉ោង ៦ៈ០០ ព្រឹក គាត់នឹងភ្ញាក់ពីគេង ហើយធ្វើអនាម័យផ្ទាល់ខ្លួន ដូចជាដុសធ្មេញ លាងមុខ។

៨ៈ០០ ព្រឹក

អាហារពេលព្រឹក

អាហារពេលព្រឹករបស់គាត់សាមញ្ញណាស់។

រូបភាព https://intojapanwaraku.com/culture/94079/

មានតែបាយស ស៊ុបមីសូ និងត្រីអាំងប៉ុណ្ណោះ។ ជួនកាលមាន Oshinko ដែលជាជ្រក់បែបជប៉ុន។ ក្នុងនាមជា Shogun អាហារនេះហាក់ដូចជាសន្សំសំចៃពេកហើយ។

លើសពីនេះដើម្បីជៀសវាងការបំពុល គាត់ក៏មានអ្នកភ្លក់ម្ហូបមុនដែរ។ បន្ទាប់ពីម្នាក់នោះបានភ្លក់​ ហើយ​មិនមាន​​បញ្ហា​​​មួយ​​សន្ទុះ​ទើប​លោកហ៊ានទទួល​ទាន។ ប៉ុន្តែបរិភោគអាហារត្រជាក់គ្មានអ្វីសប្បាយឡើយ។

ខណៈពេលលោកទទួលទានអាហារពេលព្រឹក មានអ្នកសិតសក់ និងចងសក់ឲ្យ​គាត់។ ហើយបន្ទាប់មករាល់ព្រឹកនឹងមានគ្រូពេទ្យចំនួនប្រាំមួយនាក់មកចាប់ជីពចរ ដើម្បីត្រួតពិនិត្យសុខភាពទូទៅឲ្យ​លោក។

៩ៈ០០ ព្រឹក

កន្លែងដេករបស់ Shogun មិនជាក់លាក់នោះទេ ពួកគេដេកជាមួយ Ooku (大奥) ហើយចាប់ផ្តើមការងារពេលព្រឹក​ដោយ​ការគោរពវិញ្ញាណក្ខន្ធបុព្វបុរស Shogun ។

ហើយជាការពិតណាស់កន្លែងទាំងនោះមានតែ Ooku ប៉ុណ្ណោះ។

១០ៈ០០ ព្រឹក

សិក្សា

សាមូរ៉ៃដែលត្រូវគេគោរព លុះត្រាតែពួកគេមានទាំងប្រាជ្ញា និងភាពក្លាហាន ដើម្បីឈានទៅដល់កម្រិតកំពូល Shogun ត្រូវរៀនសូត្រ​ខណៈ​ពេលហាត់​ក្បាច់គុន។

១២ៈ០០ ថ្ងៃ

ទទួលទានអាហារថ្ងៃត្រង់។

អាហារថ្ងៃត្រង់ក៏សាមញ្ញាដូចជាអាហារពេលព្រឹកដែរ។ បន្ទាប់មកគាត់ចាប់ផ្តើមធ្វើការប្រហែល ២ ម៉ោង ដែលភាគច្រើនដូចជាទទួលរបាយការណ៍ពីមន្ត្រី។

ធ្វើការតែ ២ ម៉ោងទេឬ? បើអញ្ចឹងមែន សូម្បីតែនាយក​រដ្ឋមន្ត្រី​សព្វថ្ងៃក៏​ច្រណែន​ដែរ កុំថាតែខ្ញុំ។

ម៉ោង ២ រសៀល

នេះជាពេលវេលាកំសាន្តរបស់លោក ជិះសេះ ឬគូរគំនូរក៏ជាមធ្យោបាយបន្ធូរអារម្មណ៍ផងដែរ។ អ្វីដែលសំខាន់ធ្វើឲ្យ​ខ្លួន​​មាន​អារម្មណ៍​ល្អ គ្មាន​សម្ពាធ និង​មិន​ធ្វើ​ការ​លើសកម្រិត។ 

ត្រង់​ចំណុច​នេះ​ខ្ញុំ​ពិតជាច្រណែន​ណាស់។

៥ៈ០០ ល្ងាច

ដំបូងគាត់នឹងងូតទឹក ប៉ុន្តែ​មិន​មែន​ម្នាក់​ឯង​ទេ ប៉ុន្តែទៅជាមួយអ្នកបម្រើជួយដុសសម្អាតខ្លួនឲ្យ​លោក។

៦ៈ០០ យប់

ទោះបីជាអាហារពេលយប់ច្រើនជាងអាហារពេលព្រឹក និងថ្ងៃត្រង់ ប៉ុន្តែជាទូទៅក៏សាមញ្ញណាស់ដែរ។ បន្ទាប់មកជាពេល​ទំនេរ។

១០ យប់

ម៉ោងចូលគេង

ក្នុងខ្សែភាពយន្តចិន អ្នកឃើញថាជារៀងរាល់ថ្ងៃស្តេចរើសស្រីស្នំម្នាក់សម្រាប់ផ្ទុំជាមួយ ប៉ុន្តែនៅក្នុងប្រទេសជប៉ុនប្រព័ន្ធនេះត្រូវបានកំណត់ទុកមុន។ ជាងនេះទៅ​ទៀត ដើម្បីកុំឲ្យ​មានអារម្មណ៍ខ្លាំងចំពោះនារីនោះ មាននារីម្នាក់ទៀត​មក​ដេកក្បែរពួកគេទាំងពីរនាក់ ស្តាប់ការសន្ទនា និងការពារកុំឲ្យ“អារម្មណ៍” រំជើបរំជួលហួស។ ព្រោះគោល​បំណង​ដេក​​ជា​​មួយ​នេះ​ដើម្បីមេទ័ពមានកូនស្នងតំណែង ដូច្នេះមិនដូចប្តីប្រពន្ធធម្មតាទេ រវាងពួកគេមិនមានស្នេហា ឬអារម្មណ៍​​ឡើយ។

ដើម្បីរស់ឲ្យ​បានយូរ Shogun ត្រូវតែថែរក្សាសុខភាព។ ដូច្នេះទម្លាប់ប្រចាំថ្ងៃត្រូវទទួលទានអាហារសាមញ្ញ មិនធ្វើ​ការ​លើសកម្រិត សម្រាកឲ្យ​បានគ្រប់គ្រាន់។ លើសពីនេះសម័យអេដូជាសម័យសន្តិភាព និងវិបុលភាព ដូច្នេះហើយ Shogun ក៏មិនមានអ្វីធ្វើច្រើនដែរ។

Kengo Abe