ដាវល្បីដែលធ្វើដោយជាងដែក Masamune និងរឿងវ៉ាវជាងដែកកាត់ដៃកូនប្រុសរបស់ខ្លួន

អ្នកចម្បាំងជប៉ុនគេសំដៅលើសាមូរ៉ៃ អាវុធដែលសាមូរ៉ៃប្រើក៏ជាប្រភេទដាច់ដោយឡែកហៅថាដាវជប៉ុន (Nihon tou) ។

ថ្វីត្បិតតែ មិនធ្លាប់ឃើញផ្ទាល់ភ្នែក ក៏ប្រហែលជាមានមនុស្សជាច្រើនធ្លាប់ឃើញដាវជប៉ុន តាមរយៈខ្សែភាពយន្ត ហ្គេម​ជាដើម។ ដាវជប៉ុនល្បីនៅលើពិភព​លោក ថែមទាំងមានពាក្យចចាមអារ៉ាមថា “គ្មានអ្វីដែលដាវជប៉ុនមិនអាច​កាត់​ផ្តាច់បានឡើយ” ។

ជាការពិតណាស់ ពាក្យចចាមអារ៉ាមនេះត្រូវបានបំផ្លើស ប៉ុន្តែបើប្រៀបធៀបទៅនឹងដាវដែលផលិតនៅប្រទេសផ្សេងៗ ដាវ​ជប៉ុន​ត្រូវ​បាន​ធ្វើ​ឡើង​យ៉ាង​ល្អិតល្អន់​ជាមួយ​នឹង​ដំណើរការ​​ហ្មត់ចត់​ដែល​ធ្វើ​ឲ្យ​មនុស្ស​ជា​ច្រើន​ភ្ញាក់ផ្អើល។

ជាងដាវជប៉ុនគេហៅថា 刀鍛冶 (katana kaji) ។ មានរឿងអាស្រូវជាច្រើននិយាយពីសាមូរ៉ៃ និងដាវរបស់ពួកគេ ប៉ុន្តែ​ប្រហែលជាមនុស្សមិនច្រើនទេដែលដឹងថាជាងដែកទាំងនេះក៏មានរឿងព្រេងតំណាលដូចគ្នាដែរ។

លើកនេះ JAPO នឹងនិយាយប្រាប់អ្នកពីរឿងរ៉ាវរបស់ជាងដែកដ៏ល្បីម្នាក់ ដែលជាអ្នកមានគុណសម្បតិ្តធ្វើដាវល្បីជាច្រើនក្នុងប្រវត្តិសាស្ត្រ។ លោកមានឈ្មោះថា 正宗 (Masamune) ។

ជាដំបូង តើអ្នកឃើញថាឈ្មោះ Masamune ដូចជាធ្លាប់ស្គាល់ទេ? ប្រសិនបើអ្នកលេងហ្គេម អ្នកប្រហែលជាធ្លាប់ស្គាល់​ឈ្មោះ​នេះ គេដាក់ឈ្មោះអាវុធមួយប្រភេទ ព្រោះដាវធ្វើដោយជាងដែក Masamune ល្បីណាស់។

ថ្វីត្បិតតែ រឿងដែលបានរៀបរាប់នេះមិនដឹងថាពិតប៉ុន្មានភាគរយ ហើយប៉ុន្មានភាគរយត្រូវគេបំផ្លើស​និយាយ​តៗ​គ្នា ប៉ុន្តែរឿងរ៉ាវរបស់បុរសម្នាក់នេះពិតជាគួរឲ្យ​ចាប់​អារម្មណ៍​ណាស់។

ដាវ Masamune គឺជាដាវដ៏អស្ចារ្យ វាមានភាពមុតស្រួច និងរូបរាងដាវគួរឲ្យ​មានមោទនភាព។ ជាការពិតណាស់ បុគ្គល​សម័យ​នោះ​តែងតែប្រាថ្នាចង់បានដាវ Masamune ប៉ុន្តែដាវនេះមិនអាចផលិតបានក្នុងចំនួនច្រើននោះទេ។ ខណៈពេលដែលកេរ្តិ៍ឈ្មោះដាវកាន់តែល្បី កូនប្រុសរបស់ Masamune ក៏កាន់តែលោភលន់ គិតគ្រប់មធ្យោ​បាយ​ទាញ​យក​ប្រយោជន៍។ លោកឪពុកផ្ទេរជំនាញផលិតដាវទៅឲ្យកូនប្រុស ប៉ុន្តែបុរសជាកូនមិនប្រើសម្រាប់​ផលិតដាវ​ក្នុងផ្លូវល្អនោះទេ បែរ​​ជា​​ដើម្បី​​ប្រយោជន៍​នយោបាយ។

ដោយ​ខឹង​នឹង​ដឹង​រឿង​នេះ Masamune បាន​កាច់​ដៃ​កូនប្រុសរបស់ខ្លួន។ មានពាក្យចចាមអារ៉ាមថា បន្ទាប់ពីហេតុការណ៍នោះ បុរសជាកូនកែប្រែខ្លួន ប៉ុន្តែមិនធ្វើជាជាងដែក Nihon tou ទៀតទេ ប្តូរមកធ្វើកាំបិតហាន់សាច់វិញ។

រឿងរ៉ាវខាងលើមានចំណុចលម្អិតគួរឲ្យ​ភ្ញាក់ផ្អើល ប៉ុន្តែនៅពេលដាក់បញ្ចូលក្នុង “កម្រងសៀវភៅនិទាននៅដើមរដូវព្រិលធ្លាក់” ហើយត្រូវបានសម្តែងជាល្ខោន Kabuki កាន់តែល្បីខ្លាំង។ ក្រៅពីនេះ ទោះបីជាមិនទាន់មានការបញ្ជាក់ ប៉ុន្តែរឿងនេះបានធ្វើឲ្យ​ជនជាតិជប៉ុនសម័យនោះរំជួលចិត្ត ហើយឈ្មោះ Masamune ត្រូវគេលើក​មក​និយាយ​ច្រើន។

រឿងព្រេងគ្រាន់តែជារឿងព្រេង ប៉ុន្តែរឿងនិយាយពីលោក Masamune ដាវដែលមានតម្លៃរបស់លោកពិតជាមាន​មែន ហើយត្រូវបានបញ្ជាក់ជាសម្បត្តិជាតិ។

ចូរយើងក្រឡេកមកមើលដាវដ៏មានតម្លៃទាំងនេះជាមួយនឹង JAPO ។

中務正宗（Nakatsukasa Masamune）

ម្ចាស់ដាវនេះគឺលោក Honda Tadakatsu ជាមន្ត្រីដែលមានឥទ្ធិពលបម្រើគ្រួសារ Tokugawa ។ ដាវមានប្រវែង ៦៧ សង់ទីម៉ែត្រ ដាវត្រូវបានទទួលស្គាល់ជាសម្បត្តិជាតិ។

日向正宗（Hyuga Masamune)

នេះគឺជាដាវខ្លីដែលមានប្រវែងត្រឹមតែ ២៤,៨ សង់ទីម៉ែត្រប៉ុណ្ណោះ ដែលជាកម្មសិទ្ធិរបស់ Mizuno Yuga no Mori Katsunari ។ ដាវជប៉ុនល្បីដោយសារ Hamon គឺជារូបសិល្បៈដែលឆ្លាក់លើដាវ។ ប៉ុន្តែ Hamon នៅលើស៊េរីដាវរបស់ Masamune កាន់តែពិសេសជាងនេះ។

ដាវនេះក៏ជាសម្បត្តិជាតិផងដែរ។

石田正宗（Ishida Masamune)

ដាវដែលត្រូវបានបង្ហាញតាំង​ដើម​អត្ថបទ​រហូត​មក​ដល់​ពេល​នេះ​មិនច្បាស់ពីតម្លៃនោះទេ។ ព្រោះ​ជា​សម្បត្តិ​ជាតិ ដូច្នេះ​គ្មាន​អ្នក​ណា​ទិញ​បាន​ឡើយ។

Masamune គឺជាជាងដែកដ៏ស្មោះត្រង់ម្នាក់ មិនត្រឹមតែលើកកម្ពស់ជំនាញប៉ុណ្ណោះទេ ថែមទាំង​មាន​ចិត្តស្រលាញ់សិប្បកម្មរបស់ខ្លួនផងដែរ។ ទោះបីជារឿងកាត់ដៃកូនប្រុសនៅតែជាអាថ៍កំបាំងនៅឡើយ ក៏​ជន​ជាតិ​ជប៉ុននៅតែនិយាយតៗគ្នារឿងនេះ ព្រោះតែចង់ឲ្យ​មនុស្សគ្រប់គ្នាស្គាល់ Masamune ជាអ្នកតំណាងឲ្យកម្មករ​ជប៉ុន មិនដោយ​សារ​តែ​អំណាច ព្រមលក់មនសិការរបស់ខ្លួនឡើយ។

Kengo Abe