ត្រូវមើលងាយ​ជាង​ ៤ ​ឆ្នាំស្ត្រី​ជនជាតិ​កូរ៉េ​រស់នៅ Kawasaki ប្តឹង​ទារ​សំណង​ជំងឺ​ចិត្ត

លោកស្រី Choi Kang Ija អាយុ ៤៨ ឆ្នាំជនជាតិកូរ៉េរស់នៅ Kawasaki បានដាក់ពាក្យប្តឹងបុរសអាយុ ៤០ ឆ្នាំម្នាក់ដែលរស់នៅតំបន់ភាគខាងជើង Kanto ទាមទារសំណងចំនួន ៣,០៥ លានយ៉េនថ្លៃជំងឺចិត្តព្រោះតែការរើស​អើង ដែលធ្វើអោយខូច​កេរ្តិ៍ឈ្មោះ​របស់គាត់លើ​បណ្ដាញ​សង្គម​ជាង ​៤ ​ឆ្នាំ​មក​ហើយ។

តាមការចោទប្រកាន់ចាប់តាំងពីខែមិថុនា ឆ្នាំ ២០១៦ បុរសម្នាក់នេះបានចង្អុលបង្ហាញលោកស្រី Choi ក្នុងអត្តបទ​ដែលបង្ហោះនៅលើ Blog ផ្ទាល់ខ្លួន​ជាមួយ​នឹង​ខ្លឹមសារ “អ្នកដែលមកពីប្រទេសសត្រូវនឹងជប៉ុន ចូរត្រឡប់ទៅផ្ទះវិញទៅ” ។ បន្ទាប់ពីត្រូវលោកស្រី Choi រាយការណ៍ការខូចខាតខណៈពេលនោះ គាត់បានលុបការបង្ហោះនោះ ប៉ុន្តែរហូតមកដល់ខែតុលា ឆ្នាំ ២០២០ បុគ្គលនេះបន្តនិយាយបង្កាច់បង្ខូចនៅលើ Blog ឬ Twitter ដោយ​ហៅលោក​ស្រី Choi ថាជា “អ្នកចាំសុំប្រាក់” “អាជីវកម្មជនរងគ្រោះ” ។

រូបភាព Yomiuri

នៅខែមីនា ឆ្នាំ ២០១៦ ពេលដែលបញ្ហា Hate speech (ពាក្យសម្តីវាយប្រហារ បង្កការស្អប់ខ្ពើមសំដៅលើបុគ្គលណា​មួយ) ជាមួយនឹងខ្លឹមសាររើសអើងជាតិសាសន៍បានក្លាយជាបញ្ហាដែលសង្គមចាប់អារម្មណ៍ លោកស្រី Choi ត្រូវបានអញ្ជើញទៅកាន់សភាជប៉ុនក្នុងនាមជាសាក្សី។ នៅទីនេះគាត់ត្អូញត្អែរអំពីការខូចខាតដែលខ្លួនបានទទួលដោយសារទង្វើនេះ។ អត្តបទបង្ហោះដែលមានខ្លឹមសារបង្ខូចកេរ្តិ៍បានចាប់ផ្តើមបន្ទាប់ពីព្រឹត្តិការណ៍នោះ។

នៅក្នុងសន្និសីទសារព័ត៌មានមួយ លោកស្រី Choi បាននិយាយថា “ប្រសិនបើទង្វើបង្ហោះអត្តបទបរិហារកេរ្តិ៍ត្រូវចាត់ទុកថាខុសច្បាប់ នេះនឹងក្លាយជាកម្លាំងជម្រុញយ៉ាង​ខ្លាំង​ក្នុង​ប្រតិបត្តិការបទប្បញ្ញត្តិ និងច្បាប់ដើម្បីលុបបំបាត់ការរើសអើង” ។ លើសពីនេះគាត់ក៏និយាយផងដែរថាខ្លួននឹងកំណត់អត្តសញ្ញាណ ហើយប្តឹងគណនីផ្សេងទៀតដែលមានការបង្ហោះរើសអើង ដែលមិនមែនមកពីបុរសនេះផងដែរ។

Sacchan

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: