បុរសម្នាក់បើកឡានទំនើប Ferrari លក់ដំឡូងអាំង តើកាលទើបប្រមូលថ្លៃដើមវិញទេ?

នៅប្រទេសជប៉ុនរដូវរងាត្រជាក់ខ្លាំងណាស់ ពេលដើរនៅតាមផ្លូវ ហើយគិតក្នុងចិត្តថា “ឥឡូវបើមានអ្វីក្តៅៗញ៉ាំ” អ្នក​ប្រហែលជាឮសំឡេងបន្លឺពីចម្ងាយ៖

“ដំឡូងអាំង ដំឡូងអាំងក្តៅៗ”

នេះជាសម្លេងដែលចេញពីរថយន្តលក់ដំឡូងអាំងចល័ត។

រូបភាព https://otonano-shumatsu.com/articles/6797

ដំឡូងអាំងថ្មគឺជាដំឡូងដែលត្រូវបានចម្អិនដោយបរិមាណកាំរស្មីអុីនហ្វ្រារ៉េដដែលចេញពីកំដៅដុំថ្ម។

នៅពេលដែលកាន់ដំឡូងក្តៅក្នុងដៃ អ្នកនឹងមានអារម្មណ៍ពេញចិត្តខ្លាំង។ ពេលខាំមួយមាត់ រសជាតិឆ្ងាញ់នឹងធ្វើអោយអ្នកលាន់មាត់និយាយថា “រដូវរងាល្អណាស់” (សុំទោស ​ប្រសិន​បើ​ខ្ញុំនិយាយពន្លើស) ។

អាចនិយាយបានថាម្ហូបនេះជាមិត្តដ៏ល្អសម្រាប់អ្នកដែលកំពុងប្រឈមនឹងអាកាសធាតុត្រជាក់។

មនុស្សជាច្រើនប្រហែលជាធ្លាប់ញ៉ាំដំឡូងអាំង ប៉ុន្តែ​តើ​អ្នក​ធ្លាប់​ឃើញ​រថយន្ត​ដឹក​ដំឡូងអាំងដូច​នេះ​ទេ?

រូបភាព https://gunosy.com/articles/eROPu?s=s

អូរមិនគួរអោយជឿទេ ហេតុ​អ្វីបានជាព្យួរទង់លក់ដំឡូងអាំងនៅលើរថយន្តទំនើបបែបនេះ???

នេះជាទិដ្ឋភាពពេញ។

រូបភាព https://news.nicovideo.jp/watch/nw4829191

ហេតុ​អ្វីបានជាមានរ៉ឺម៉កនៅពីក្រោយរថយន្តដែលមើលទៅដូចជា Ferrari (ខ្ញុំពិតជាមិនជឿថានេះជា Ferrari នោះ​ទេ) ។ ប្រហែលជាដំឡូងអាំងនៅលើរ៉ឺម៉ក ការរួបបញ្ចូលនេះពិតជាប្លែក ប៉ុន្តែមិនមានន័យអ្វីទេ។

រថយន្តលក់ដំឡូងអាំងចម្លែកនេះជារបស់លោក Harada ដែល​បច្ចុប្បន្ន​កំពុងបើក​ហាង​ជួសជុល​រថយន្ត។ លោក Harada ជាមនុស្សដែលចូលចិត្តរថយន្ត ជាពិសេស Ferrari ទន្ទឹមនឹងនេះដែរគាត់ក៏ចូលចិត្តដំឡូងអាំងផងដែរ។

គំនិតនេះកើតចេញមកពីលោក Harada ចង់រួមបញ្ចូលចំណង់ចំណូលចិត្តរបស់ខ្លួន។

ទោះបីចំណូលចិត្តមានច្រើន ប៉ុន្តែមិនមានន័យថាត្រូវបញ្ចូលចំណង់ចំណូលចិត្តនោះចូលគ្នាឡើយ។

ទោះជាយ៉ាងណាការរួមបញ្ចូលគ្នាដ៏ពិសេសនេះបានក្លាយជាប្រធានបទដែលគួរអោយចាប់អារម្មណ៍ ហើយថែមទាំងផ្សាយលើទំព័រសារព័ត៌មានផងដែរ។ ដោយមូលហេតុ​នេះការលក់ដំឡូងហាក់ដូចជាអំណោយផលខ្លាំងណាស់។

តើដល់ពេលណាទើបប្រាក់លក់ដំឡូងគ្រប់ថ្លៃដើមទិញ Ferrari វិញ? គ្រាន់តែគិតក៏ឈឺក្បាលដែរ។

Kengo Abe