ទោះប្រឈមនឹងសេចក្តីស្លាប់ក៏សាមូរ៉ៃនៅតែរក្សាស្មារតី និងភាព​ក្លា​ហាន​របស់ខ្លួន

ប្រសិនបើអ្នកដឹងថាខ្លួនស្លាប់នៅថ្ងៃស្អែក តើថ្ងៃនេះអ្នកនឹងរស់នៅថ្ងៃ​ចុង​ក្រោយយ៉ាងដូចម្ត៉េច?

អ្នកនឹងទទួលទានអាហារទាំងអស់ដែលខ្លួនចូលចិត្ត?

ឬប្រឹងចាយប្រាក់សន្សំឲ្យអស់?

ជាការពិតអ្នកខ្លះក៏មិនជឿលើវាសនា ខំប្រឹងរកផ្លូវគេចចេញមែនទេ?

នៅលើពិភពលោកមនុស្សមានច្រើនប្រភេទ ដូច្នេះការប្រឈមនឹងសេចក្តីស្លាប់ក៏ខុសគ្នាដែរ។

ក្នុងភាសាជប៉ុនមានពាក្យថា៖

立つ鳥、あとを濁さず

Tatsu tori, ato wo nigosazu

ប្រយោគនេះមានន័យថា បក្សីត្រដាងស្លាបហើរទៅឆ្ងាយ ចេញពីផ្ទៃទឹកដ៏ស្ងាត់ស្ងៀម បន្សល់នូវផ្ទៃទឹកស្អាត​ដែលធ្លាប់មានពីមុន។ ក្នុងន័យតែមួយពេលគិតពីជីវិតមនុស្ស មនុស្សម្នាក់រហូតដល់ចុងបញ្ចប់នៃជីវិតនៅតែល្អ មិនបង្កបញ្ហាដល់អ្នកដទៃ នោះជាការគិតរបស់ជនជាតិជប៉ុនចំពោះ​សេចក្តី​ស្លាប់ដែលមានន័យ។

ដើម្បីឲ្យសេចក្តីស្លាប់មានន័យ តើត្រូវរស់នៅយ៉ាងណា?

ក្នុងប្រវត្តិសាស្រ្តធ្លាប់មានសាមូរ៉ៃជាច្រើនដើរតាមទស្សនៈសេចក្តីស្លាប់មានន័យដែលបង្ហាញយ៉ាងច្បាស់ពេលលា​ចាក​លោក។ 

សាមូរ៉ៃ Takeda Shingen លាក់បាំងសេចក្តីស្លាប់ព្រោះខ្លាចធ្វើឲ្យពាក់ព័ន្ធប្រទេស និងគ្រួសារ។

រូបភាព https://intojapanwaraku.com/culture/100112/

នៅសម័យសង្គ្រាមរដ្ឋដែលសម្គាល់អំឡុងពេលប្រវត្តិសាស្ត្រដ៏អស្ចារ្យរបស់សាមូរ៉ៃក្នុងបំណងចង់លាតត្រដាង ក្លាយជា​សាមូរ៉ៃលេខមួយនៅក្នុងប្រទេស​ជប៉ុន។ សាមូរ៉ៃ Takeda Shingen រស់ក្នុងសម័យសង្គ្រាមរដ្ឋដែលគេហៅថា “គ្មាន​គូប្រៀប” ។

សូម្បីតែ Nobunaga Oda សាមូរ៉ៃដែលនាំមុខប្រទេសរហូតមកដល់ពេលនេះ ទោះបីអាចគេចនឹងការប្រយុទ្ធជាមួយ Shingen តែក៏ត្រូវកោតសរសើរពីភាពរឹងមាំរបស់លោកដែរ។

Takeda Shingen ទទួលមរណៈភាពនៅអាយុ ៥៣ ឆ្នាំពេលដេកលើគ្រែ អ្វីដែលធ្វើឲ្យ​គាត់ព្រួយបារម្ភបំផុតនោះ​គឺកូន​ប្រុស ហើយក៏ជាអ្នកស្នងតំណែងរបស់ខ្លួន Takeda Katsuyori ។ នៅពេលស្តាប់ឮដំណឹង Takeda Shingen ទទួលមរណៈភាព សត្រូវទាំងអស់នឹងវាយប្រហារក្នុងពេលដំណាលគ្នា។

ដោយគិតទុកមុនពីស្ថានភាព គាត់បានបន្សល់ទុកពាក្យចុងក្រោយនេះទៅកាន់កូនប្រុសថា៖

“បន្ទាប់ពីយើងស្លាប់មិនត្រូវកោះហៅទាហានតាមអំពើចិត្តនោះទេ។ លះបង់ខ្លួនឯងដើម្បីពង្រឹងនយោបាយក្នុងប្រទេស ប្រសិនបើសត្រូវចូលមកត្រូវរកវិធីការពារ បើពួកវារត់ត្រូវដេញតាម។ ប្រើគ្រប់មធ្យោបាយត្រូវលាក់បាំងរឿងយើងស្លាប់យ៉ាងហោចណាស់បីឆ្នាំ” ។

នោះហើយជាស្មារតីអមតៈរបស់សាមូរ៉ៃ នាទីចុងក្រោយក្នុងជីវិតនៅតែដាក់ប្រទេស និងកូនប្រុសរបស់ខ្លួន​លើស​ពី​សេចក្តី​ស្លាប់​របស់​ខ្លួន។

Samurai Date Masamune – រហូតដល់ស្លាប់នៅតែរក្សាមោទនភាព វីរភាពជានិច្ច។

Date Masamune ជាស្តេចនៅតំបន់ Tohoku ។

លោកជាអ្នកដែលមានសមត្ថភាពដឹកនាំប្រទេសជប៉ុន ប៉ុន្តែដោយសារបញ្ហាភូមិសាស្រ្តក៏ដូចជាកើតយឺតជាងអ្នកចម្បាំង​នៅសម័យសង្គ្រាមរដ្ឋផ្សេងទៀត ដូច្នេះមិនអាចឡើងដល់កំពូលបាន។

ដោយសារជំងឺអុតស្វាយ Date Masamune ត្រូវរស់នៅក្នុងភាពឯកោមួយរយៈពេល ទោះជាយ៉ាងណា ភាពតក់ស្លុតដែល​បាត់​បង់ភ្នែកម្ខាងបានក្លាយជាកម្លាំងទឹកចិត្តយ៉ាងខ្លាំង ដែលជម្រុញឲ្យបុរសម្នាក់នេះក្រោកឈរបង្រួប​បង្រួម​តំបន់ Tohoku ទាំងមូល។

Date Masamune ក៏ទទួលមរណភាពដោយសារជំងឺដែរ។ នៅថ្ងៃចុងក្រោយលោកចំណាយពេលភាគច្រើនដេកក្នុងបន្ទប់។

សាមូរ៉ៃមានប្រពន្ធដើមម្នាក់ហើយស្រលាញ់នាងយ៉ាងខ្លាំង ប៉ុន្តែបែរជាតាំងចិត្តមិនឲ្យ​ប្រពន្ធចូលបន្ទប់ជំងឺមុន​​ពេលស្លាប់នោះទេ។ ប្រសិនបើដូច្នោះ Date Masamune នឹងស្លាប់ដោយមិនអាចមើលឃើញមុខប្រពន្ធជាលើកចុងក្រោយ។

Date Masamune ផ្តាំផ្ញើអ្នកនាំពាក្យប្រាប់ប្រពន្ធរបស់លោកថា៖

“នៅក្នុងការចងចាំរបស់នាង ខ្ញុំចង់ឲ្យ​រូបភាពរបស់ខ្ញុំនៅតែជាមនុស្សម្នាក់ដែលពោរពេញដោយភាពក្លាហាន និងសុច្ឆន្ទៈ” ។

Date Masamune ខ្លាច​ប្រពន្ធ​ឃើញ​ខ្លួន​ទន់ខ្សោយ ចុះខ្សោយដោយសារជំងឺ ខ្លាច​រូបភាព​ទាំង​នោះនឹងនៅក្នុងការចងចាំរបស់​ប្រពន្ធ។ លោកចង់ឲ្យ​ប្រពន្ធចងចាំខ្លួនពេលដែលរុងរឿងបំផុត។

Shibata Katsuie – ប្រើដៃលូកយកគ្រឿងក្នុងរបស់ខ្លួនរួចស្លាប់ទៅ

Katsuie ព្រោះតែជឿលើ Oda Nobunaga ពេកក៏ត្រូវស្លាប់នៅពេលប្រទេសជប៉ុនបង្រួបបង្រួម។ ប្រពន្ធរបស់លោកស្លាប់ដោយសារជំងឺ ក្រោយពេលរស់នៅម្នាក់ឯងឯកោ នៅពេលដែល Nobunaga ហៀបនឹងចាញ់ លោកទទួលប្អូនស្រីរបស់ Nobunaga ឈ្មោះ Oichi មកធ្វើជាប្រពន្ធ។

ពេលនោះអំណាចធ្លាក់ពីដៃរបស់ Nobunaga ទៅ Hideyoshi Toyotomi ។ Hideyoshi រកគ្រប់មធ្យោបាយកម្ចាត់កងទ័ពរបស់ Nobunaga ។ ក្នុងអំឡុងពេលនោះលោកនិយាយប្រាប់ប្រពន្ធ Oichi របស់ខ្លួនថា៖

“អូនជាប្អូនស្រីរបស់ Nobunaga ។ Hideyoshi មិន​យក​ជីវិតរបស់​អូន​ទេ ដូច្នេះចូររត់ទៅ” ។

Oichi ឆ្លើយថា៖

“ទេ អូននឹងនៅក្បែរ Katsuie រហូតដល់នាទីចុងក្រោយ។ អូនបានត្រៀមចិត្តរួចជាស្រេចហើយ” ។

សន្ទនាបានពាក់កណ្តាលកងទ័ពរបស់ Hideyoshi មកដល់។

“អញ្ចឹងយើងចាកចេញ”

“ចាស!”

បន្ទាប់មក Hideyoshi កាត់ក្បាលរបស់ Oichi ។

ដោយប្រឈមនឹងសេចក្តីស្លាប់របស់ប្រពន្ធ Katsuie ស្រក់​ទឹក​ភ្នែក បន្ទាប់​មក​ទាញ​យក​ដាវ​វះ​ពោះ។

លោកស្រែកផងលូកយកគ្រឿងក្នុងទាំងអស់ចេញ លុះ​ពេល​អ្នកក្រោមបង្គាប់កាត់​ក្បាលទើបសម្លេងស្រែក​បញ្ឈប់។

មិនត្រឹមតែ Katsuie ប៉ុណ្ណោះទេ សូម្បីតែ Oichi ក៏ស្លាប់មានន័យដែរ អ្នកទាំងពីហានប្រឈមនឹងសត្រូវ មិនកំសាករត់គេចខ្លួនឡើយ ជាចុងក្រោយនៅតែប្រាថ្នាចង់រស់តាមការចង់បាន។

ស្មារតីទទួលយកសេចក្តីស្លាប់ ប៉ុន្តែនៅតែរក្សាភាពក្លាហានរបស់ខ្លួន រស់ឲ្យប្រាកដជារស់នោះជាស្មារតីពិសេសរបស់​ជនជាតិជប៉ុនចំពោះសេចក្តីស្លាប់។

តើ​អ្នក​គិត​យ៉ាង​ណា​ចំពោះសេចក្តីស្លាប់របស់សាមូរ៉ៃខាងលើ? 

Kengo Abe