ការនិយមរស់នៅលើរថយន្តបោះជំរុំអាចធ្វើដំណើរគ្រប់ទីកន្លែង

ថ្មីៗនេះអាជីវកម្មរថយន្តបោះជំរុំដំណើរការយ៉ាងរលូននៅក្នុងប្រទេសជប៉ុន។ រថយន្តបោះជំរុំគឺជាយានជំនិះដែលផ្នែក​ខាងក្នុងត្រូវបានបែងចែកទៅជាកន្លែងផ្សេងៗ (ដូចជាបន្ទប់) សម្រាប់គោលបំណងបោះជំរុំ។ មូលហេតុ​ដែលធ្វើ​អោយអាជីវកម្មអំណោយផលប្រហែលមកពីមនុស្សជាច្រើនមានការព្រួយបារម្ភប្រើមធ្យោបាយដឹកជញ្ជូនសាធារណៈ​​ក្នុងរដូវការរីករាលដាលនៃជំងឺកូវីដ ១៩ ។

នៅសហរដ្ឋអាមេរិករថយន្តបោះជំរុំមានទំហំធំប៉ុនឡានក្រុង។

រូបភាព https://www.asahi.com/and/article/20200311/10416320/

ជាមួយនឹងទំហំធំបែបនេះយើងអាចរៀបចំផ្នែកខាងក្នុងដូចជាផ្ទះចល័ត ប៉ុន្តែ​ជា​ការ​ពិត​ណាស់​ទំហំ​ស្របទៅនឹងតម្លៃ មិនត្រឹម​តែប៉ុណ្ណឹងរថយន្តធំមិន​សាក​សម​​នឹង​​ស្ថានភាព​ផ្លូវ​នៅ​ប្រទេស​ជប៉ុន​នោះទេ។

នៅជប៉ុនរថយន្តបោះជំរុំភាគច្រើនមានទំហំតូចដូចបានបង្ហាញខាងក្រោម។

រូបភាព https://rental-camper.jp/shops/kanto/tokyo/9503/

ទំហំំនេះសាកសមសម្រាប់ការធ្វើដំណើរលើគ្រប់សណ្ឋានដីនៅប្រទេសជប៉ុន។ អ្នកអាចធ្វើដំណើរជាមួយក្រុមគ្រួសារ មិត្តភក្តិ និងគូស្នេហ៍ទៅគ្រប់កន្លែង។ ក្រៅពីរថយន្តបោះជំរុំនេះនៅមានមួយប្រភេទទៀត ប៉ុន្តែត្រូវមានលិខិតអនុញ្ញាតពិសេស ដូច្នេះគេមិនសូវពេញនិយមឡើយ។

ថ្វីត្បិតតែ មានទំហំតូចជាង ប៉ុន្តែគ្រឿងសង្ហារិមនៅតែប្រកបដោយគុណភាពល្អ។ អាស្រ័យលើម្ចាស់ ពួកគេនឹងបំពាក់រថយន្តធ្វើយ៉ាងណាអាចបំពេញតម្រូវការចាំបាច់ដូចជាកន្លែងសម្រាក គ្រែធំ កន្លែងធ្វើការ កន្លែងចម្អិនអាហារជាដើម។

តោះមកក្រឡេកមើលរថយន្តបោះជំរុំនៅប្រទេសជប៉ុនទាំងអស់គ្នាណា!!!

រថយន្តមានគ្រែពីរជាន់ថេរ។

រូបភាព https://news.drimo.jp/campingcar-description/camping-car-bed-dainet/

ដោយសារវាមិនមែនជាប្រភេទបត់ ដូច្នេះមិនពិបាកប្រើពេកទេ។ លើសពីនេះថែមទាំងមានតុ អ្នកអាចប្រើសម្រាប់​ទទួលទានអាហារ ឬធ្វើការ។

ចំណែកនេះជាការរចនាគ្រឿងសង្ហារិមមួយផ្សេងទៀត គ្រែនៅខាងលើកៅអីអ្នកបើកបរ។

ក្នុងរូបភាពខាងក្រោម តើអ្នកឃើញថាដំបូល​រថយន្ត​មាន​លក្ខណៈ​ចម្លែក​បន្តិចបើប្រៀបទៅនឹងរថយន្តផ្សេងទៀត​ទេ? ផ្នែកដែលគូសរង្វង់ពណ៌ក្រហមក្នុងរូបភាពជាកន្លែងសម្រាប់ដាក់គ្រែ។ ដោយសារទំហំនៅទីនេះទាបបន្តិច ដូច្នេះគ្រែសម្រាប់តែគេងប៉ុណ្ណោះ ផ្ទុយទៅវិញកន្លែងផ្សេងទៀតធំទូលាយ។

ក្រៅពីនេះក៏មានប្រភេទរថយន្តក្រាលពូកធ្វើជាគ្រែផងដែរ។

ការដំឡើងប្រភេទនេះមានភាពស្មុគស្មាញបន្តិច ប៉ុន្តែអ្នកនឹងទទួលបានកន្លែងដេកធំទូលាយ។ ពេល​មិន​ចាំ​បាច់​គ្រាន់​តែក្រាលពូកពីរបីធ្វើជាកន្លែងអង្គុយគេង។

នៅជ្រុងខាងស្តាំមានផ្ទះបាយខ្នាតតូចដែលអនុញ្ញាតអោយអ្នករៀបចំអាហារងាយៗ។

ប្រសិនបើអ្នកមិនចូលចិត្តបរិយាកាសតូចចង្អៀត អ្នកប្រហែលជាចូលចិត្តប្រភេទរថយន្តបោះជំរុំដំបូលខ្ពស់នេះ។

ដោយសារតែដំបូលអាចលើកឡើងដាក់ចុះ ដូច្នេះបរិយាកាសខាងក្នុងក៏ធំជាងដែរ។ គួរអោយស្តាយប្រភេទនេះសព្វថ្ងៃឈប់លក់ហើយ។

ផ្នែកខាងក្រោមជារថយន្តបោះជំរុំពិសេស​សម្រាប់​បើកពិធី​ជប់លៀង។

ក្នុងរថយន្តមានអេក្រង់ ដូច្នេះអ្នកអាចបើកពិធីជប់លៀងច្រៀងខារ៉ាអូខេ។ អ្នកអាច​ច្រៀង​ខារ៉ាអូខេ​នៅក្នុង​ព្រៃភ្នំឬសមុទ្រ​ដ៏​ធំ​ទូលាយ​ ដោយ​មិន​ខ្លាច​រំខាន​អ្នក​ជិត​ខាង តើមានអ្វីល្អជាងនេះទៀត?

ក្រៅពីប្រើរថយន្តទាំងនេះសម្រាប់បោះជំរុំ មនុស្សមួយចំនួនថែមទាំងរស់នៅលើរថយន្តផងដែរ។

ក្នុងរូបភាពពួកគាត់ទាំងពីររស់នៅលើរថយន្តរយៈពេល ៣ ឆ្នាំមកហើយ។

រូបភាព https://news.drimo.jp/knowledge/ym-cabcom210604

ថ្វីត្បិតតែទំហំតូច ប៉ុន្តែមានបំពាក់ទៅដោយគ្រែ ផ្ទះបាយ បង្គន់ និងផ្កាឈូកងូត។

បញ្ហាមានតែមួយ​គត់​គឺដោះស្រាយទឹក​សំណល់ចេញពី​បង្គន់។ ដោយមូលហេតុនេះរថយន្តបោះជំរុំភាគច្រើនដែលផលិតនៅជប៉ុនមិនមានបង្គន់ទេ។ ទោះជាយ៉ាងណា អ្នកអាចប្រើបង្គន់នៅតាមហាងលក់ទំនិញនានាទូទាំងប្រទេស នៅពេលត្រូវការងូតទឹកគ្រាន់តែចូល Sento ឬ Onsen រីឯបោកគក់គ្រាន់តែដាក់ចូលម៉ាសុីនបោកគក់ប្រើកាក់។ ជប៉ុនជាប្រទេសដែលសាកសមសម្រាប់ដំណើរកំសាន្តលើរថយន្តណាស់មែនទេ?

នៅប្រទេសជប៉ុនកំពុងនិយមធ្វើការពីចម្ងាយ (Remote Work) ដោយសារបញ្ហាជំងឺកូវីដ ១៩ ។ ការដំឡើង​អុីន​ធឺណេត​​លើរថយន្តក៏មិនពិបាកដែរ ដូច្នេះជីវិតធ្វើដំណើរគ្រប់ទីកន្លែងមិនមែនមានតែនៅក្នុងភាពយន្តប៉ុណ្ណោះទេ។

ទោះជាយ៉ាងណា មនុស្សមួយចំនួនដែលមិនអាចសម្របខ្លួនភ្លាមៗ ក្នុងករណីនេះខ្ញុំសូមណែនាំជួល​រថយន្តធ្វើដំណើរសាកល្បង​មួយ​សប្តាហ៍សិន។

តើអ្នកចង់ផ្លាស់ប្តូរការរស់ជាមួយនឹងរថយន្តបោះជំរុំដែរទេ?

Kengo Abe