ប៉ូលីសរកឃើញវីដេអូម្តាយ​ និង​មិត្ត​ប្រុស​វាយ​ក្មេង​ប្រុស​អាយុ​ ៣ ​ឆ្នាំ​មុន​ពេលស្លាប់

កាលពីខែសីហាឆ្នាំ ២០២១ កុមារាឈ្មោះ Orito Niimura អាយុ ៣ ឆ្នាំស្លាប់ក្នុងផ្ទះល្វែងនៅទីក្រុង Settsu ខេត្ត Osaka បន្ទាប់ពីត្រូវមិត្តប្រុសរបស់ម្តាយឈ្មោះ Takumi Matsubara ធ្វើទារុណកម្មដោយប្រើទឹកក្តៅ។ កាលពីថ្ងៃទី ២២ ខែកញ្ញា លោក Takumi Matsubara ត្រូវបានចាប់ខ្លួន និងចោទប្រកាន់ពីបទមនុស្សឃាត។ ក្រោយមកនៅថ្ងៃទី ២៧ ខែតុលាម្តាយរបស់ Orito ឈ្មោះ Juki Niimura ក៏ត្រូវចាប់ខ្លួនដោយសង្ស័យថាប្រើអំពើហិង្សាមកលើកូនប្រុស។

ក្រោយពេលត្រូវចាប់ខ្លួនលោក Matsubara បានសារភាពប្រាប់ប៉ូលីសថាខ្លួនគ្រាន់តែប្រឡែងផ្កាឈូកងូតជាមួយក្មេងប្រុស ហើយបន្ទាប់ពីចេញទៅក្រៅកំណត់សីតុណ្ហភាពខ្ពស់ជាងនេះ ទើបគាត់ប្រទះឃើញក្មេងប្រុសស្លាប់។

ប៉ូលីសបានរកឃើញវីដេអូប្រើហិង្សាចំពោះក្មេងប្រុសក្នុងទូរស័ព្ទរបស់ Matsubara ។ ប៉ូលីសសង្ស័យ​ថាក្មេង​ប្រុស​ម្នាក់​នេះ​ត្រូវ​អ្នកទាំង​ពីរធ្វើបាបរាល់ថ្ងៃ។ នៅក្នុងវីដេអូដែលថតបានកាលពីថ្ងៃទី ២០ ខែមិថុនា Juki ប្រើខ្នើយវាយ Orito នាងលើកខ្នើយខ្ពស់ហើយប្រើកម្លាំងវាយចុះមក។ បន្ទាប់​មក​គូស្នេហ៍​ទាំង​ពីរ​​នេះសើច​យ៉ាង​ស្រួលពេលស្តាប់សម្លេងយំរបស់ក្មេងប្រុស។ អ្នកទាំងពីរចាត់ទុកក្មេងប្រុសអាយុ ៣ ឆ្នាំដូចជារបស់លេង។

ក្នុងវីដេអូទាំង ៣ ដែលប៉ូលីសរកឃើញ Orito តែងតែត្រូវ Matsubara វាយចំមុខ និងក្បាលជាច្រើនដង។ ក្នុងវីដេអូ​មួយនៅពេលដែលក្មេងប្រុសដើរទៅរកម្តាយស្រាប់តែ Matsubara វាយ Orito ។ កន្លែងខ្លះទៀតក្មេង​ប្រុស​ត្រូវ​វាយដំ​យ៉ាង​ខ្លាំង​រហូត​ធ្លាក់ពី​កៅអី។ ជននោះប្រើខ្នើយ​វាយក្មេង​ប្រុសដើម្បីកុំអោយបន្សល់ស្លាកស្នាម។

ប្រហែលមួយខែមុននោះ Juki ធ្លាប់រាយការណ៍ទៅអាជ្ញាធរទីក្រុង Settsu ព្រោះបារម្ភទង្វើដ៏ឃោរឃៅរបស់ Matsubara ធ្វើចំពោះកូនប្រុស។ ប៉ុន្តែខ្លួននាងផ្ទាល់នៅតែថតវីដេអូទិដ្ឋភាពកូនយំផងស្រែកផង។ អាក្រក់​ជាង​នេះ​​ទៅ​​ទៀត​ភាគីអាជ្ញាធរក៏មិនបាន​ចាត់​វិធានការ​ណា​មួយ​ដើម្បី​ការពារ​កុមារដែរ។

បន្ទាប់ពី Orito ស្លាប់ ស្រ្តីនោះនិយាយការពារ Matsubara ម្តងហើយម្តងទៀតនៅចំពោះមុខអ្នកស្គាល់គ្នា ដោយ​សារ​ពួក​គេសង្ស័យថាគាត់ជាប់ពាក់ព័ន្ធនឹងការស្លាប់របស់ក្មេងប្រុសនេះ។ Juki បាននិយាយថា៖ “គាត់មើលថែកូនរបស់ខ្ញុំយ៉ាងយកចិត្តទុកដាក់ គាត់តែងតែប្រាប់ខ្ញុំថាទុកអោយគាត់ធ្វើ ដូច្នេះខ្ញុំគិតថាទម្លាក់កំហុសលើគាត់មិនត្រូវទេ” ។

RIN