គោលការណ៍អនុវត្តចំពោះលោកបងធំ Yakuza ពេលជាប់ពន្ធនាគារ

នៅប្រទេសជប៉ុនមានកន្លែងមួយដែលអ្នកមិនងាយទៅដល់ ហើយប្រហែលជាមិនចង់ទៅលេងសូម្បីតែម្តងនោះគឺពន្ធនាគារ។ JAPO ក៏ធ្លាប់លើក​យក​អត្តបទ​និយាយពីជីវិតនៅក្នុងគុក ជាទូទៅអ្នកទោស៖

• ត្រូវបង្ខំអោយរស់នៅជាមួយមនុស្សជាច្រើន
• មិនមានរបស់ផ្ទាល់ខ្លួន
• ត្រូវបង្ខំអោយធ្វើពលកម្មសហគមន៍

នៅមានការកំណត់ជាច្រើនទៀតបើប្រៀបនឹងជីវិតខាងក្រៅ ដែលក្នុងនោះអ្នកទោសម្នាក់ៗមានស្ថានភាពខុសៗគ្នា កម្រិតបទល្មើសពី​ស្រាល​ទៅ​ធ្ងន់ ថែមទាំងមានបទល្មើស​ឃាតកម្ម​ដែរ​។ ជាការពិតក្រៅពីនេះក៏មាន Yakuza (ម៉ាហ្វីយ៉ាជប៉ុន) និងយុវជនដែលមើលទៅកាចសាហាវផងដែរ។

ខ្ញុំស្រាប់តែមានអារម្មណ៍ភ័យខ្លាចពេលដែលស្រមៃគិតខ្លួនជាប់​ក្នុង​កន្លែង​វឹកវរ​បែប​នេះ។

ក្នុង​ពន្ធនាគារ​អ្នកទាំងអស់មានភាពស្មើគ្នា ប៉ុន្តែបើមានវត្តមានរបស់លោកបងធំ Yakuza របបពិសេសនឹងត្រូវប៉ូលីសអនុវត្ត។ និយាយបែបនេះមិន​មែន​ប៉ូលីស​ខ្លាចរអាឬគោរពជននោះទេ អ្វីដែលពួកគេចង់បានគឺរក្សាសណ្តាប់​ធ្នាប់​ក្នុង​ពន្ធនាគារ​។ ដូច្នេះបើទុកអោយអ្នកមិនចូលចិត្ត Yakuza និង Yakuza នៅក្នុងបន្ទប់តែមួយនឹងធ្វើ​អោយរឿងកាន់តែអាក្រក់ទៅៗ។ ខណៈតួនាទីរបស់ពួកគេគឺការពារអំពើហិង្សាឬបញ្ហាណាមួយកើតឡើង​ក្នុងពន្ធនាគារ។ ដូច្នេះពួកគេបង្ខំចិត្តធ្វើដាក់លោកបងធំ Yakuza ពិសេសបន្តិច។

បន្ទប់ឃុំឃាំងដោយឡែក

រូបភាព https://www.ohk.co.jp/data/8196/pages/

ជាទូទៅបន្ទប់ឃុំឃាំងមាន​អ្នកទោស​ ៦​ នាក់​ ប៉ុន្តែអ្នកទោសនាំគ្នាបែងចែកឋានៈ។ ក្នុងនាមជា Yakuza លោក​បង​ធំ​បានប្រព្រឹត្តបទឧក្រិដ្ឋជាច្រើន ហើយត្រូវមនុស្សជាច្រើនស្អប់។ ប៉ូលីសមិនអាចដឹងពីគំនិតរបស់អ្នកទោសទាំង​អស់​នោះ​ទេ ដូច្នេះដើម្បីជៀសវាងអ្នកទោសមានគំនុំ និងបង្កគ្រោះថ្នាក់ដល់ Yakuza ប៉ូលីសត្រូវបង្ខំដាក់គាត់ក្នុង​បន្ទប់​ដោយឡែក។

ធ្វើការជាមួយអ្នកទោសចាស់

ក្នុងអំឡុងពេលជាប់គុក អ្នក​ទោស​ត្រូវ​បំពេញ​ការងារ​ដែល​គេ​​កំណត់។ ការងារនោះអាចជាការផលិតទូឈើ សំបកទូរស័ព្ទ iPhone ឬ​ប្តូរ​វេន​បោកគក់សម្លៀកបំពាក់អ្នកទោស។ សកម្មភាពនេះស្រដៀងនឹងរៀនជំនាញដែលផ្តល់អោយ​អ្នកទោសមានចំណេះដឹង និងជំនាញចាំបាច់ ដើម្បីត្រលប់ទៅជីវិតធម្មតាវិញបន្ទាប់ពីត្រូវបានដោះលែងចេញ​ពន្ធនា​គារ។

ជាទូទៅការងារធ្វើតាមទម្រង់ហាត់ប្រាណ Yakuza ក៏ត្រូវចូលរួមការងារដែរ ប៉ុន្តែលោកនឹងធ្វើការជាមួយអ្នកទោសមានវ័យចំណាស់ ហើយមិនមានប្រវត្តិទាក់ទងនឹង Yakuza ។ ពេលធ្វើការអ្នកទោសត្រូវកាន់ឧបករណ៍ផ្សេងៗជាច្រើន។ មនុស្សជាច្រើនអាចប្រើឧបករណ៍របស់ខ្លួនវាយ Yakuza អោយរបួស។ ដូច្នេះហើយរៀបចំអោយ Yakuza ធ្វើការជាមួយក្រុមអ្នកទោសវ័យចំណាស់ខាងលើជាជម្រើសដែលសុវត្ថិភាពបំផុត។

មិនអាចក្រឡេកមើលឆ្វេងស្តាំ

គ្រាន់តែអ្នកទោសម្នាក់មើលឃើញ ហើយផ្សព្វផ្សាយព័ត៌មានលោកបងធំ Yakuza កំពុងនៅទីនេះ ភ្លាមៗនោះបញ្ហានឹងកើតឡើង។ ដូច្នេះនៅពេលដែល Yakuza ធ្វើដំណើរចុះក្រោម អ្នកទោសផ្សេងទៀតនឹងត្រូវបញ្ជាឱ្យមើលក្រោមជើងរបស់ពួកគេ។ ធ្លាប់ផ្ទុះការប្រយុទ្ធជាច្រើនដងដោយសារតែភាគីទាំងពីរជួបគ្នា ដូច្នេះវិន័យនេះពិតជាចាំបាច់។

សរុបទៅប៉ូលីសធ្វើដាក់លោកបងធំ Yakuza តាមរបៀបពិសេសមិនមែនខ្លាចរអាទេ ប៉ុន្តែដើម្បីការពារបញ្ហា។ ក្រៅ​ពីចំណុចខាងលើ Yakuza អនុវត្តតាមច្បាប់ដូចមនុស្សគ្រប់គ្នាដូចជាមិនត្រូវផឹកស្រា ជក់បារី និងគ្មានសេរីភាព​ជា​ដាច់ខាត។

ប្រាកដ​ណាស់គ្មាននរណាម្នាក់ចង់ចូលកន្លែងបែបនេះទេ។

Kengo Abe